[1] Һәгәр нава мәрьвада шәр'-дә'w чебә у әw ль бәр диwане бьсәкьньн, бьра һ'акьм диwана wан бькьн: Йе һәq бе сущ бькьн у йе нәһәq жи сущдар бькьн.
[2] Һәгәр йе нәһәq лайиqи к'ӧтане йә, бьра һ'акьм ә'мьр кә, кӧ wи вәләзиньн у ль бәр ч'ә'вед һ'акьм анәгори нәһәqийа wи бьк'ӧтьн.
[3] Жь чьл дәрби зедәтьр һ'акьм нәдә wи, чьмки гава тӧ ве зедәтьр леди, тӧ бьрайе хwә ль бәр ч'ә'ве щьмә'те беһӧрмәт дьки.
[4] Дәве гайе бедәреда дьхәбьтә гьренәдә.
[5] Һәгәр бьра т'әвайи бьжин, йәк жь wан бьмьрә ле кӧр'е wи т'ӧнәбә, бьра жьна йе мьри мәрьве хәрибр'а, аwа готи жь малбәте дәр нәйе дайине, т'ийе wе гәрә һәр'ә щәм wе у wе хwәр'а бьстинә у бь ви аwайи борще т'ийитийе бьqәдинә.
[6] Ньхӧрийе кӧ әwе бинә wе кӧр'е бьре мьри бе һ'әсабе, wәки наве wи ль нава Исраелда нәйе һьлдане.
[7] Ле һәгәр әв мәрьв нәхwазә бука хwә бьстинә, һьнге бьра бука wи дәрк'әвә ль бәр дәргәһ щәм р'успийа у бежә: ‹Т'ийе мьн нахwазә к'ока бьрайе хwә ль нава Исраелда шин кә, әw нахwазә борще т'ийитийе бьqәдинә›.
[8] Һьнге р'успийед бажер бьра гази wи кьн у wир'а хәбәр дьн. Ле һәгәр әw йа хwә бькә у бежә: ‹Әз нахwазьм wе бьстиньм›
[9] һьнге бьра бука wи незики wи бә у ль бәр ч'ә'ве р'успийа сола wи жь ньге wи бехә, т'уйи р'уйе wи кә у бежә: ‹Һа тиньнә сәре wи мәрьви, йе кӧ мала бьре хwә ава накә›.
[10] Бьра нава Исраелда мала wир'а бежьн: ‹Мала йе бе сол›.
[11] Һәгәр мер һәвр'а бькьнә шәр' у жьна йәки жь wан незик бә wәки мере хwә дәсте йе дьн дәрхә, дәсте хwә бавеже у батийе йе дьн бьгьрә,
[12] һьнге дәсте wе бьбьр'ә, бьра һ'әйфа тә ль wе нәйе.
[13] Бьра к'иське тәда дӧ щур'ә кәвьре мезине, аwа готи сьвьк у гьран т'ӧнә бьн.
[14] Бьра мала тәда дӧ щур'ә дәрданед чапкьрьне, аwа готи бьч'ук у мәзьн т'ӧнә бьн.
[15] Кәвьре тәйи мезине у дәрдане тәйи чапкьрьне гәрә т'ам у р'аст бьн, wәки ә'мьре тә дьреж бә ль сәр ә'рде кӧ Хӧдан Хwәдейе тә дьдә тә.
[16] Чьмки кьрьна йе ве йәке, йан йе кӧ нәр'астийе дькә, к'ьретийә ль бәр Хӧдан Хwәдейе тә.
[17] Бир бинә Амалек р'ева чь ани сәре тә, гава кӧ һун жь Мьсьре дәрдьк'әтьн.
[18] Әw жь Хwәде нәтьрсийа у пьштева һ'ьщуми ль сәр тә кьр, чахе тӧ wәстийайи у qӧдумк'әти буйи у йед сьстбуйи qьр' кьрьн.
[19] Аwа гава Хӧдан Хwәдейе тә, тә жь һәр дьжмьнед дора тәйә ль сәр wи ә'рди р'ьһ'әт бьһелә, к'ижан кӧ Хӧдан Хwәдейе тә чаwа мьлк' дьдә тә, кӧ qазьнщ ки, наве Амалек бьн п'әр'е ә'зменда р'әсит ки. Бир нәки!