[1] Мәһа Абибе хwәйи кә у Щәжьна Дәрбазбуне Хӧдан Хwәдейе хwәр'а бькә, чьмки мәһа Абибеда Хӧдан Хwәдейе тә шәв тӧ жь Мьсьре дәрхьсти.
[2] Жь пәз у дәwаре хwә Хӧдан Хwәдейе хwәр'а Щәжьна Дәрбазбуне сәржекә, ль wи щийе кӧ Хӧдане бьбьжерә wәки наве хwә ле дайнә.
[3] Т'әви wе т'ӧ тьште һәвиртьр'шккьри нәхwә, һ'әфт р'ожа т'әви wе нане шкәва бьхwә, аwа готи нане зәлулийе, чьмки тӧ ләзә-ләз жь Мьсьре дәрк'әти. Wәки һ'әму р'ожед ә'мьре хwәда, р'ожа хwәйә жь wәлате Мьсьре дәрк'әтьне бир бини.
[4] Ль нава т'әмамийа синоре тәда һ'әфт р'ожа гәрәке һәвиртьр'шк т'ӧнәбә у гоште qӧрбана евара р'ожа йәке бьра нәминә һ'әта сьбәһе.
[5] Тӧ нькари qӧрбана Дәрбазбуне т'ӧ бажарида кӧ Хӧдан Хwәдейе тә дьдә тә сәржеки.
[6] Ле т'әне ль wи щийи кӧ Хӧдан Хwәдейе тә wе бьбьжерә wәки наве хwә ле дайнә, еваре, чахе р'о дьчә ава, qӧрбана Дәрбазбуне сәржекә, хут wи wәхти гава тӧ жь Мьсьре дәрк'әтийи.
[7] Ль wи щийи кӧ Хӧдан Хwәдейе тә wе бьбьжерә, бьпежә у бьхwә. Сьбәһе вәгәр'ә һәр'ә коне хwә.
[8] Шәш р'ожа нане шкәва бьхwә, р'ожа һ'әфта щьвина Хӧдан Хwәдейе тә йә, т'ӧ хәбате нәкә.
[9] Һ'әфт һ'әфтийа хwәр'а бьжмьрә. Жь wи wәхте кӧ тӧ дәст пе бьки бь дә'се гәньм бьдьруйи, һ'әфт һ'әфтийа бьжмьрә.
[10] Һьнге Щәжьна Һ'әфтийа Хӧдан Хwәдейе хwәр'а бькә, дийарикә р'әзәдьлийе анәгори wе йәке бь чь Хӧдан Хwәдейе тә wе тә бьмбарәк кә бьдә.
[11] Ль бәр Хӧдан Хwәдейе хwә ль wи щийе кӧ Хӧдан Хwәдейе тә wе бьбьжерә, wәки наве хwә ле дайнә, ша бә т'әви кӧр'е хwә, qиза хwә, хӧламе хwә, щарийа хwә, леwийе бажаред хwәда, хәриб, сеwи у жьнәбийа кӧ нава тәда нә.
[12] Бир бинә кӧ тӧ Мьсьреда хӧлам буйи, ван qәйдә-qануна хwәй кә у бьqәдинә.
[13] Гава жь бедәра хwә у жь һ'әwзе хwә шәраве һьлди, һьнге Щәжьна Һ'олькчекьрьне һ'әфт р'ожа бькә.
[14] Щәжьна хwәда тӧ, кӧр'е хwә, qиза хwә, хӧламе хwә, щарийа хwәва, леwи, хәриб, сеwи у жьнәбийа кӧ бажаред тәда нә ша бә.
[15] Һ'әфт р'ожа щәжьне Хӧдан Хwәдейе хwәр'а бькә, ль wи щийе кӧ Хӧдан Хwәдейе бьбьжерә. Чьмки Хӧдан Хwәдейе тә wе дӧа ль тә, һ'әму дәрәмәтед тә, һәр кьрьнед дәстед тә бькә у те т'әне ша би.
[16] Сале се щара бьра һ'әму qьсьме тәйи нерин ль бәр Хӧдан Хwәдейе тә ль wи щийе кӧ Хӧдане бьбьжерә, бьсәкьньн: Щәжьна Нане Шкәвада, Щәжьна Һ'әфтийада у Щәжьна Һ'олькчекьрьнеда. Ле бьра дәст вала ль бәр Хӧдан нәсәкьньн.
[17] Чьqас кӧ дәсте һәр кәсива те бьра бинә, анәгори бьмбарәккьрьна кӧ Хӧдан Хwәдейе тә бона тә кьрийә.
[18] Ль нава һ'әму бажаред кӧ Хӧдан Хwәдейе тә дьдә тә анәгори qәбилед тә, һ'акьма у сәрwера к'ьфш кә, wәки бь диwана р'аст диwана мьләт бькьн.
[19] Һәqийе нәт'әр'ьбинә, фьрqийе данәйнә у р'ӧшәте һьлнәдә, чьмки р'ӧшәт ч'ә'ве билана кор дькә у готьнед р'аста дәрәw дәрдьхә.
[20] Р'астийе, т'әне пәй р'астийе һәр'ә, wәки тӧ сах-сьламәт би у әw ә'рде кӧ Хӧдан Хwәдейе тә дьдә тә хwәр'а бьки мьлк'.
[21] Ль бәр горигәһа Хӧдан Хwәдейе хwә кӧ те хwәр'а чеки, т'ӧ щур'ә даред Ашераһе хwәр'а данәч'ькини.
[22] У хwәр'а һ'әйкәл нәдә сәкьнандьн, әw ль бәр Хӧдан Хwәдейе тә р'әш ә.