[1] Хӧдан Хwәдейе хwә һ'ьз бькә, фәрманед wи, qәйдә-qанунед wи, qьраред wи у ә'мьред wи һәр р'ож бьqәдинә.
[2] Һун иро ширәтед Хӧдан Хwәдейе хwә заньн, ле нә зар'ед wә. Чьмки әw нәзаньн у нә жи дитьнә мәзьнайийа wи, дәсте wийи qәwат у зәнда дьрежкьри,
[3] нишанед wи, кьред wи, к'ижан кӧ wи нава мьсьрийада ани ль сәре Фьрәwьн п'адше Мьсьре у ль сәре т'әмамийа wәлате wи.
[4] Ӧса жи чь кӧ Хӧдан ани ль сәре әскәред Мьсьре, һәсп у ә'рәбед wан, гава wана дабунә пәй wә, чаwа Хӧдан ава Бә'ра Сор сәр wанда вәгәр'анд у әw qьр' кьрьн һ'әта-һ'әтайе.
[5] Әwи бәр'ийеда чь кьр бона wә, һ'әта һатьна wәйә ви щийи.
[6] Чь ани сәре Дат'ан у Абирам, кӧр'ед Әлйабе кӧр'е Р'убен, чаwа ә'рде дәве хwә вәкьр әw нәфәрава, чадьрава у һ'әму һәйина wанва, жь нава Исраел һ'уфи хwә кьр .
[7] Ле бәле ч'ә'вед wә һ'әму кьрьнед зорә кӧ Хӧдан кьрьн дитьн.
[8] Һ'әму ә'мьред кӧ әз иро ль wә ә'мьр дькьм хwәйи кьн, wәки һун qәwат бьн дәрбаз бьн у һәр'ьн wи ә'рди хwәр'а бькьнә мьлк'.
[9] Wәки ә'мьре wә дьреж бә ль сәр wи ә'рди, бона к'ижани Хӧдан кал-бавед wәр'а сонд хwар кӧ бьдә wан у зӧр'әта wан, ә'рде кӧ шир у һьнгьв же дьк'ьшә.
[10] Чьмки ә'рде кӧ тӧ дьчи хwәр'а бьки мьлк', әw нә мина wәлате Мьсьре йә, жь к'ижани тӧ дәрк'әти, к'идәре кӧ тә т'охьм дьр'әшанд у бь щәфа ав дьда, мина бахчә.
[11] Ле ә'рде кӧ һун дәрбаз дьбьне хwәр'а бькьнә мьлк', әw ә'рде ч'ийа у нәwала йә кӧ жь барана ә'змен те авдане.
[12] Ә'рде кӧ Хӧдан Хwәдейе тә бона wе хәм дькә, ч'ә'вед Хӧдан Хwәдейе тә һәр гав ль сәр ә, жь дәстпебуна сале һ'әта к'ӧтабуна сале.
[13] Һәгәр һун р'ьнд гӧһ бьдьнә ә'мьред мьн, к'ижан кӧ әз иро ль wә ә'мьр дькьм, ӧса жи Хӧдан Хwәдейе хwә һ'ьз бькьн у бь т'әмамийа дьле хwә, бь т'әмамийа нәфса хwә wир'а qӧльх кьн,
[14] һьнге әзе барана пайизе у баһаре wәхтда бьдьмә ә'рде wә кӧ тӧ гәньме хwә, мәйа хwә у бьзьре хwә һьлди.
[15] Әзе ль чол-бәстед тә, бона һ'әйwанед тә гиһе шин кьм. Хwарьна тә жи wе т'ьжи бә, те бьхwи у т'ер би.
[16] Һаш жь хwә һәбьн, wәки дьле wә нәйе хапандьне у һун нәшьһ'ьтьн, бәр хwәдейе башqә та нәбьн wанр'а qӧльх нәкьн,
[17] кӧ һерса Хӧдан ль wә р'анәбә, әw ә'змен дадә, баран т'ӧнәбә у ә'рд бәре хwә нәдә, һьнге һуне зутьрәке ӧнда бьн ль сәр ви ә'рде qәнщ кӧ Хӧдан дьдә wә.
[18] Ле ван хәбәред мьн нава хwә у дьле хwәда хwәйи кьн, wан чаwа нишан ль сәр дәсте хwә гьредьн у ӧса жи бьра әw ль сәр ә'нийа wә ль навбәра ч'ә'вед wәда бьн.
[19] Зар'ед хwә һини wан кьн. Ван хәбәра wанр'а гьли ки гава мала хwәда р'уньшти йи йан р'еда йи, гава п'алдьди у гава р'адьби,
[20] wан ль сәр рәхдәрийед мала хwә у дәргәһед бажаре хwә бьньвисә,
[21] wәки ль сәр wи ә'рди к'ижан кӧ Хӧдан кал-бавед wәр'а сонд хwар кӧ бьдә wан, р'ожед ә'мьре wә у р'ожед ә'мьре зар'ед wә ӧса дьреж бьн чаwа р'ожед ә'змен ль сәр дьне.
[22] Һәгәр һун ван һ'әму ә'мьра qәнщ хwәйи кьн, к'ижан кӧ әз ль wә ә'мьр дькьм кӧ бьqәдиньн, Хӧдан Хwәдейе хwә һ'ьз бькьн, һ'әму р'ийед wида һәр'ьн у хwә ль wи бьгьрьн,
[23] һьнге Хӧдане жь бәр wә бәри ль ван һ'әму мьләта дә у һуне мьләтед жь хwә мәстьр у qәwаттьр бькьн бьндәст.
[24] Һәр щийе кӧ пә'нийа ньге wә лек'әвә, wе бьбә йа wә. Жь бәр'ийе һ'әта Лӧбнане, жь ч'әме Фьрате һ'әта Бә'ра Навбәре wе бьбә синоре wә.
[25] Т'ӧ кәсе ль бәр wә тәйах нәкә, Хӧдан Хwәдейе wә wе тьрс у хофа wә бькә ль сәр һ'әму wәлате кӧ һуне ньгед хwә бавежьне, чаwа кӧ wи готьбу wә.
[26] Әз иро дӧа у ньфьр'е датиньмә ль бәр wә, бьбьжерьн:
[27] Дӧа әв ә, һәгәр һун гӧһ бьдьнә ә'мьред Хӧдан Хwәдейе хwә, к'ижан кӧ әз иро ль wә ә'мьр дькьм,
[28] ле ньфьр' әв ә, һәгәр һун гӧһ нәдьнә ә'мьред Хӧдан Хwәдейе хwә, жь ве р'ийе бьшьһ'ьтьн, к'ижан кӧ әз иро ль wә ә'мьр дькьм у ль пәй хwәдейед башqә кӧ һун нас накьн һәр'ьн.
[29] У гава Хӧдан Хwәдейе тә, тә бьбә wи ә'рди, к'ижани кӧ тӧ дьчи хwәр'а бьки мьлк', ль сәр ч'ийайе Гьризиме те дӧа ә'лам ки у ль сәр ч'ийайе Әйбал те ньфьр' ә'лам ки.
[30] Әв ч'ийа алийе р'оавайа Урдӧне, пәй р'ийа р'оавайе, ль ә'рде кәнанийада нә йед кӧ Ә'рабада пешбәри Гилгале незики мә'за Морәһ дьминьн.
[31] Һун Урдӧнер'а дәрбаз дьбьн, wәки һәр'ьн у wи ә'рди хwәр'а бькьнә мьлк', к'ижан кӧ Хӧдан Хwәдейе wә дьдә wә. Һьнге һуне хwәр'а бькьнә мьлк', ль wьр бьжин,
[32] бькьн кӧ wан һ'әму qәйдә-qанун у qьраред кӧ әз иро датиньмә ль бәр wә бьqәдиньн.