[1] Гава тӧ га йан пәза бьрайе хwәйи исраели кӧ ӧнда бунә бьбини, тӧ гәрә пьшта хwә нәди wан, ле тӧ ә'сә wан ль бьрайе хwә вәгәр'ини.
[2] Ле һәгәр бьре тә дури тә дьминә, йан тӧ wи нас наки, wан бьбә мала хwә у бьра әw ль щәм тә бьн, һ'әта кӧ бьре тә пьрса wан нәкә, һьнге тӧ ль wи вәгәр'инә.
[3] Ӧса жи һьндава к'әра wи, к'ьнща wи, һәр тьштида кӧ бьре тә ӧнда дькә у тӧ дьбини бькә, нәбә кӧ тӧ ӧса бьди к'ьфше кӧ тә әw нәдитьнә.
[4] Тӧ гәрә пьшта хwә нәди к'әр йан гайе бьрайе хwә, гава кӧ тӧ бьбини әw ль сәр р'е к'әтьнә, ле али wи бькә wан р'акә сәр п'ийа.
[5] Бьра к'ьнще мера ль к'ӧлфәте т'ӧнәбә у мер жи к'ьнще к'ӧлфәт хwә нәкә, һәр кәсе кӧ ве йәке дькә ә ль бәр Хӧдан Хwәдейе тә к'ьрет ә.
[6] Гава р'еда һелуна тәйрәдәки ль сәр дарәке, йан ль сәр ә'рде т'әви щущука, йан һека у мак ль сәр щущука, йан һека р'асти тә бе, маке т'әви щущука һьлнәди.
[7] Тӧ гәрә маке бәр'ди ле щущука дькари һьлди хwәр'а, wәки тәр'а qәнщ бә у р'ожед тә дьреж бьн.
[8] Гава тӧ мала ну чеки, сәр бани дора wе сурәкә ньмьз чекә, wәки тӧ хуне нәйни ль сәр мала хwә, гава йәк жь сәр бан бьк'әвә.
[9] Бахе хwәйи тьрийада т'охьмед майин нәр'әшини, йан на әw бәре т'охьме тә чанди у тьри wе пироз бьн у изьна тә wе т'ӧнәбә wан бьди хәбате.
[10] Пе га у к'әре бь һәвр'а щотк'арийе нәки.
[11] К'ьнща бь щур'ә-щур'ә т'еле р'ис у к'ьтани бь һәвр'а һунанди хwә нәки.
[12] Ль сәр һәр чар кәвийед п'оте хwә бь к'ижани тӧ хwә дьньхеми р'ишийа чеки.
[13] Һәгәр йәк жьнәке бьстинә, сәре хwә пер'а дайнә у паше әw ль бәр ч'ә'ве wи р'әш бә,
[14] шәр' бавеже, наве хьраб ль пәй wе хә у бежә: ‹Мьн әв жьн хwәр'а хwәст, сәре хwә жер'а дани ле мьн намуса wе нәдит›.
[15] Һьнге бьра де у баве кәч'ьке нишана намуса кәч'ьке һьлдьн бьбьнә ль бәр р'успийед бажерә ль бәр дәргәһа
[16] у баве кәч'ьке бежә р'успийа: ‹Мьн qиза хwә да ви мәрьви ле әwи жәнандә wе,
[17] ва йә әw шәр'а дькә у дьбежә: «Мьн намус ль щәм qиза тә нәдит», ле ва йә нишана намуса qиза мьн›. У ньвина wе нишани р'успийед бажер кьн.
[18] Һьнге бьра р'успийед wи бажари әwи мәрьви бьгьрьн у щәза кьн.
[19] Сәд зиви жь wи бьстиньн у бьдьнә баве кәч'ьке, бона wәки wи наве хьраб ль пәй qиза исраели хьст. Әw кәч'ьк жи бьра бьбә жьна wи, әw нькарә wе бәр'дә ль нава һ'әму р'ожед хwәда.
[20] Ле һәгәр чь кӧ һатийә готьне р'аст ә, намуса кәч'ьке т'ӧнәбуйә,
[21] һьнге бьра кәч'ьке бьбьнә ль бәр дәре мала баве wе у мәрьвед бажер wе бьдьнә ль бәр кәвьра бькӧжьн. Чьмки әwе р'обәти кьр ль нава Исраелда, qави кьрийә мала баве хwәда. Бь ви аwайи те хьрабийе ль нава хwәда р'аwва дәрхи.
[22] Һәгәр мерәк т'әви жьна меркьри сәре хwә дайнә у әв йәк ә'йан бә, бьра һәр дӧ жи бенә кӧштьне: Һьн мере кӧ сәре хwә пер'а дани у һьн жи әw жьн. Бь ви аwайи те хьрабийе ль нава Исраел р'аwва дәрхи.
[23] Гава qизәк мерәкир'а бе нишанкьрьне у йәк бажерда р'асти wе бе у сәре хwә пер'а дайнә,
[24] һьнге һәр дӧйа жи дәрхьнә ль бәр дәргәһе wи бажари у wан бьдьнә ль бәр кәвьра бькӧжьн. Qиз чьмки бажерда буйә ле нәкьрийә һәwар-гази, мер жи чьмки дәргистийа йәки дьн р'ур'әш кьрийә. Бь ви аwайи те хьрабийе ль нава хwәда р'аwва дәрхи.
[25] Ле һәгәр чоле мәрьвәк р'асти qиза нишанкьри бе, wе бьгьрә у сәре хwә wер'а дайнә, бьра т'әне әw мәрьве кӧ т'әви wе сәре хwә данийә бьмьрә.
[26] Ле дәст нәдә qизе, гӧне һежайи мьрьне ль сәр qизе т'ӧнәйә. Әв мина wе йәке йә гава йәк бьгьһижә ль сәр йәки дьн у бькӧжә.
[27] Чьмки әw чоле р'асти wе һатийә, qиза нишанкьри кьрийә һәwар-гази ле т'ӧ кәс ль wьр т'ӧнәбуйә кӧ wе хьлаз кә.
[28] Гава йәк р'асти qизәкә нә меркьри бе, wе бьгьрә сәре хwә wер'а дайнә у әв йәк ә'йан бә,
[29] һьнге бьра мере кӧ сәре хwә wер'а данийә, пенщи зиви бьдә баве qизе у бьра әw бьбә жьна wи, чьмки әwи әw р'ур'әш кьр. Әw иди нькарә wе бәр'дә ль нава һ'әму р'ожед хwәда.
[30] Бьра т'ӧ кәс жьнбава хwә нәстинә, аwа готи щи ньвина баве хwә беһӧрмәт нәкә.