Q. Дӧщари 2
[1] Әм вәгәр'ийан чунә бәр'ийе бь р'ийа Бә'ра Сор, чаwа кӧ Хӧдан готьбу мьн. Әм гәләк р'ожа дора ч'ийайе Сеһире дьзьвьр'ин.
[2] Хӧдан готә мьн:
[3] ‹Бәс ә һун дора ви ч'ийайи бьзьвьр'ьн, вәгәр'ьнә алийе бакӧре.
[4] Ль мьләт ә'мьр кә у бежә: «Те синоре бьрайед хwә, зар'ед Әсаwр'а кӧ ль Сеһире дьминьн дәрбаз би. Әwе жь wә бьтьрсьн, ле һун һ'әwза хwә жь wан бькьн.
[5] Хwә ль wан нәхьн, чьмки әз жь ә'рде wан qәт wәкә ньгәки жи надьмә wә, чьмки мьн ч'ийайед Сеһире чаwа мьлк' да Әсаw.
[6] Хӧрәк у аве п'әрәти жь wан бьк'ьр'ьн бьхwьн, вәхwьн.
[7] Чьмки Хӧдан Хwәдейе тә һ'әму шьхӧлед дәстед тә бьмбарәк кьр. Әw һаш р'еwитийа тә һәйә ль ве бәр'ийа мәзьнда. Әва чьл сал ә кӧ Хӧдан Хwәдейе тә т'әви тәйә у кемасийа т'ӧ тьшти тә нәдит»›.
[8] Бь ви аwайи әм сәр бьрайед хwә зар'ед Әсаwр'а кӧ ль Сеһире дьман дәрбаз бун, әм жь р'ийа Ә'рабайе, Елат у Әсйон-Гәбәре дур дәрбаз бун. Әм вәгәр'ийан у р'ийа бәр'ийа Моwабеда чун,
[9] Хӧдан готә мьн: ‹Хwә моwабийа нәхә у т'әви wан нәкә шәр', чьмки жь ә'рде wан надьмә тә, мьн Ә'р чаwа мьлк' да зар'ед Лут ›.
[10] (Пешийе еми ль wьр дьман, мьләтәки qәwат, беһ'әсаб у бәжьн бьльнд мина әнаqийа.
[11] Чаwа әнаqи, ӧса жи еми р'ьфайи дьһатьнә һ'әсабе ле моwабийа wанр'а еми дьготьн.
[12] Пешийе ль Сеһире һ'ори дьман, ле зар'ед Әсаw бәри wан дан, әw qьр' кьрьн у щи мьлк'е wан жь wан стандьн, чаwа кӧ Исраел сәре wи ә'рди кьр, к'ижан кӧ Хӧдан чаwа мьлк' да wан.)
[13] ‹Ньһа р'абьн селафа Зәрәдер'а дәрбаз бьн!› У әм селафа Зәрәдер'а дәрбаз бун.
[14] Wә'де кӧ әм жь Qадеш-Барнеайе р'ек'әтьн һ'әта дәрбазбуна селафа Зәрәдер'а си у һ'әйшт сал к'ьшанд. Һ'әта кӧ т'әмамийа ньсьле шәр'к'аред нава зомеда мьрьн, чаwа кӧ Хӧдан wанр'а сонд хwарьбу .
[15] Хӧдан жи дәсте хwә ль сәр wан бьльнд кьрьбу, wәки жь нава зоме qьр'а wан бинә, һ'әта әw т'әмам мьрьн.
[16] Гава т'әмамийа мәрьвед шәр'к'ар жь нава мьләт мьрьн,
[17] Хӧдан готә мьн:
[18] ‹Иро тӧ Ә'рер'а синоре Моwаб дәрбаз дьби
[19] у незики зар'ед Амон дьби, хwә wан нәхә у т'әви wан нәкә шәр', чьмки жь ә'рде зар'ед Амон мьлк' надьмә тә, мьн әw чаwа мьлк' да зар'ед Лут ›.
[20] (Әв жи ә'рде р'ьфайийа те һ'әсабе, пешийе р'ьфайи ль wьр манә, ле амонийа ль wанр'а замзуми дьбежьн.
[21] Әw мьләтәки мәзьн, беһ'әсаб у бьльнд бу мина әнаqийа. Хӧдан әw бәр ч'ә'ве амонийа qьр' кьрьн, амонийа бәри wан дан у әw дәwса wан щи wар бун,
[22] чаwа кӧ Хӧдан бона зар'ед Әсаw кьр, йед кӧ ль Сеһире дьжин. Хӧдан һ'ори бәр ч'ә'вед wан qьр' кьрьн, зар'ед Әсаw бәри wан дан у мьлк'е wан зәфти хwә кьрьн һ'әта иро.
[23] Ӧса жи т'әви ә'wwийе кӧ гӧндед незики Газзайе дьман qәwьми бу. К'апт'орийе кӧ жь К'апт'оре дәрк'әтьбун әw qьр' кьрьбун у щи wаре wан жь wан стандьбун.)
[24] ‹Р'абьн р'е к'әвьн у селафа Арнонер'а дәрбаз бьн. Бьньһер'ьн! Әз Сихоне әмори п'адше Һ'әшбоне у ә'рде wи дьдьмә дәсте тә, т'әви wан бькә шәр' у дәстпекә ә'рде wан хwәр'а бькьнә мьлк'.
[25] Ирода әзе дәстпекьм тьрс у хофа тә бькьмә ль сәр мьләтед бьн п'әр'е ә'змен. Йед кӧ wе бона тә бьбьһен ль бәр тә wе бьләрьзьн у бьбьздьн›.
[26] Мьн жь бәр'ийа Qьдемоте бь хәбәред ә'дьлайе qасьд шандьнә щәм Сихоне п'адше Һ'әшбоне кӧ бежьн:
[27] ‹Бьһелә кӧ әз wәлате тәва дәрбаз бьм, әзе т'әне р'ийа сәрәкәда һәр'ьм, ч'әп у р'аст данәгәр'ьм.
[28] Хӧрәк у аве п'әрәти бьфьрошә мьн әзе бьхwьм, вәхwьм. Т'әне бьһелә әз дәрбаз бьм,
[29] чаwа зар'ед Әсаw кӧ сәр Сеһире дьжин у моwабийе кӧ Ә'ре дьжин бона мьн кьрьн. Һ'әта кӧ әз Урдӧнер'а дәрбаз нәбьмә wи ә'рде кӧ Хӧдан Хwәдейе мә дьдә мә›.
[30] Ле Сихоне п'адше Һ'әшбоне qайл нәбу кӧ әм wәлате wир'а дәрбаз бьн, чьмки Хӧдан Хwәдейе тә әw сәрһ'ьшк кьр у дьле wи кьрә кәвьр, wәки wи бьдә дәсте тә, мина р'ожа иройин.
[31] Һьнге Хӧдан готә мьн: ‹Бьньһер'ә! Әз дәстпедькьм Сихон у wәлате wи дьдьмә дәсте тә, дәстпекә зәфт кә у ә'рде wи хwәр'а бькә мьлк'›.
[32] Сихон у һ'әму щьмә'та wи ль Йаһасе мьqабьли мә дәрк'әтә шер',
[33] ле Хӧдан Хwәдейе мә әw да дәсте мә, мә әw, кӧр'ед wи у һ'әму щьмә'та wи qьр' кьрьн.
[34] Һьнге мә һ'әму бажаред wи зәфт кьр, әw у бажаред wи wеран кьрьн, әw т'ам дийари Хӧдан кьрьн, мер, жьн у зар' qәт йәк сах нә һьшт.
[35] Т'әне мә һ'әйwан хwәр'а һьлда у т'алане жь бажаред кӧ мә зәфт кьрьбун.
[36] Жь Ә'роһера дәве селафа Арноне у жь бажаре дәште, һ'әта Гилә'де бажар т'ӧнәбу кӧ мә qәwаттьр буйа. Хӧдан Хwәдейе мә һ'әму данә дәсте мә.
[37] Т'әне тӧ незики wәлате зар'ед Амон нә буйи, ӧса жи т'әмамийа алийе селафа Йабоqе т'әви бажаред сәре ч'ийа у т'әмамийа wан щийед кӧ Хӧдан Хwәдейе мә изьн нә да мә.