[1] К'ӧтасийа һәр һ'әфт сала дәйндаред хwә бьбахшинә.
[2] Бахшандьн әв ә: Кӧ кәсәки хwәйе дәйн кӧ дәйн дьдә һәваләки, гәрәке бьбахшинә wи у жь һәвале хwә, жь бьре хwә пашда нәхwазә, чьмки бахшандьн бона хатьре Хӧдан ә.
[3] Жь хәриба дькари бьхwази, ле чь кӧ сәр бьре тә йә, дәсте хwә же бьк'ьшинә,
[4] ль нава тәда к'әсиб гәрә т'ӧнәбә, чьмки Хӧдан wе ә'сә дӧа ль тә бькә ль сәр wи ә'рди, кӧ Хӧдан Хwәдейе тә чаwа мьлк' дьдә тә кӧ qазьнщ ки.
[5] Т'әне тӧ р'ьнд гӧһдарийа дәнге Хӧдан Хwәдейе хwә бькә у т'ам ви ә'мьре кӧ әз иро ль тә ә'мьр дькьм, бькә кӧ бьqәдини.
[6] Чьмки Хӧдан Хwәдейе тә wе дӧа ль тә бькә, чаwа кӧ wи готә тә. Те дәйн бьди гәләк мьләта ле те хwәха дәйндар ниби. Те сәрwертийе ль гәләк мьләта бьки, ле әwе сәрwертийе ль тә нәкьн.
[7] Ле һәгәр ль нава тәда, ль нава бажаред wәлате тәда кӧ Хӧдан Хwәдейе тә дьдә тә, йәк жь Исраел дәсттәнг бә, дьле хwә нәкә кәвьр у һьндава бьрайе хwәйи дәсттәнгда дәстгьрти нибә.
[8] Һьндава wида дәствәкьри бә, әw һ'әwще чь бә wәкә һ'әwщәдарийа wи бь мәр'дани дәйн бьдә wи.
[9] Һаш жь хwә һәбә, кӧ дьле тәр'а фькьрәкә хьраб дәрбаз нәбә у бежи: ‹Сала һ'әфтайә бахшандьне незик ә› у ч'ә'ве хьраб ль бьре хwәйи дәсттәнг бьньһер'и у дәйн нәди wи. Әwе һьндава тәда һәwара хwә Хӧдан бинә у те гӧнәк'ар дәрейи.
[10] Тӧ бь мәр'дани бьдә wи, пәй дайинер'а жи бьра ль тә чәтьн нәйе. Чьмки бона wе йәке Хӧдан Хwәдейе тә wе һәр шьхӧлида, тӧ дәст бьди чь wе дӧа ль тә бькә.
[11] Чьмки дәсттәнге wәлате тәда кем нибьн, ләма әз ль тә ә'мьр дькьм у дьбежьм: ‹Тӧ ә'рде хwәда һьндава бьре хwәйи к'әсиб у дәсттәнгда дәствәкьри бә›.
[12] Һәгәр бьре тә йан хушка тәйә ибрани тәр'а бе фьротане чаwа хӧлам, бьра әw шәш сала тәр'а хӧламтийе бькә, ле сала һ'әфта wи аза бәр'дә.
[13] Гава тӧ wи аза бәр'ди, дәствала бәр'нәди.
[14] Бь мәр'дани жь пәзед хwә, жь бедәра хwә у жь һ'әwзе хwәйи шәраве бьдә wи. Чаwа кӧ Хӧдан Хwәдейе тә тӧ бьмбарәк кьри ӧса бьдә wи.
[15] У бир бинә wәки тӧ жи хӧлам буйи wәлате Мьсьреда, ле Хӧдан Хwәдейе тә тӧ азакьри, ләма әз иро ви ә'мьри дьдьмә тә.
[16] Ле һәгәр хӧламе тә бежә тә: ‹Әз жь щәм тә начьм›, чьмки әw тә у мала тә һ'ьз дькә, wи хwәш те ль щәм тә бьминә.
[17] Һьнге wи бьсперә дери у бь дьреше гӧһе wи qӧл кә, һьнге әwе бьбә хӧламе тәйи һ'әта-һ'әтайе. Бь ви щур'әйи жи т'әви щарийа хwә бькә.
[18] Бьра тәр'а к'әдәр нәйе wәки тӧ wи аза бәр'дьди, чьмки әwи шәш сала тәр'а хӧламти кьрийә, һәгәр дәwса wи п'алә буйа тәйе дӧбарә хәрщ кьра. Хӧдан Хwәдейе тә wе тә ль нава һ'әму тьштида чь кӧ тӧ бьки бьмбарәк кә.
[19] Һ'әму ньхӧрийе нерин жь пәз у дәwаре хwә Хӧдан Хwәдейе хwәр'а нәдьр кә. Бь гайе хwәйи ньхӧри нәхәбьтә у ньхӧрийе пәзе хwә нәбьр'ә.
[20] Ль бәр Хӧдан Хwәдейе хwә ль wи щийе кӧ Хӧдан wе бьбьжерә, һәр сал тӧ у нәфәред хwәва wан ль wьр бьхwьн.
[21] Ле һәгәр әw бь qӧсур ә, сәqәт ә йан кор ә, йан бь qӧсурәкә гьран ә, wе Хӧдан Хwәдейе хwәр'а нәкә qӧрбан.
[22] Бажаред хwәда дькари wе бьхwи. Паqьж у нә паqьж дькарьн wе бьхьн, мина кара хәзале у бьзьна к'уви.
[23] Т'әне хуне нәхwә, wе мина аве бьр'ежә ль сәр ә'рде.