[1] Һәгәр ль нава wи ә'рде кӧ Хӧдан Хwәдейе тә дьдә тә хwәр'а бьки мьлк', ль чоле щьнйазе мәрики бе дитьне у нәә'йан бә к'е әw кӧштийә,
[2] бьра р'успийед тә у һ'акьмед тә дәрен у жь щьнйаз һ'әта бажаред дора wи чап кьн.
[3] Бьра р'успийед бажаре лапи незики щьнйаз, ногьнәкә бь к'ижане һе хәбат нәкьрьнә у к'ижан кӧ һе нәк'әтийә бьне нир.
[4] Р'успийед wи бажари гәрә wе ногьне бәржер бьбьнә нәwаләка кӧ ч'әм дьк'ьшә у ә'рд wе жи нә һатийә р'акьрьне нә жи чандьне, wе нәwаледа бьра стӧкӧра ногьне бьшкеньн.
[5] К'аһине зар'ед Леwи wе бенә незик, чьмки Хӧдан Хwәдейе тә әw бьжартьн кӧ wир'а qӧльх кьн у бь наве Хӧдан бьмбарәк бькьн, бь хәбәра wан гәрә һәр шәр'-дә'w у һәвр'ьк'и бенә сафикьрьне.
[6] Һ'әму р'успийед бажаре лапи незики щьнйаз бьра дәстед хwә ль сәр ногьна нәwаледа стӧкӧр шкенандида бьшон
[7] у ә'лам кьн, бежьн: ‹Дәстед мә әв хун нәр'етийә у ч'ә'вед мә нәдитьнә.
[8] Хӧдан, бьбахшинә мьләте хwә Исраел, к'ижан кӧ тә хьлаз кьр, һәqе хуна бе сущ нәйнә ль сәр мьләте хwә Исраел›. Бьра әв хун ль wан бе бахшандьне.
[9] Бь ви аwайи те ль бәр ч'ә'ве Хӧдан р'астийе бьки гава хуна бе сущ жь нава хwәда бьшойи.
[10] Гава мьqабьли дьжмьнед хwә дәрейи шер' у Хӧдан Хwәдейе тә wан бьдә дәсте тә, тӧ wан һесир һьлди,
[11] һәгәр ль нава һесира жьнәкә бәдәw бьбини, wе бәгәм ки у хwәр'а бьхwази,
[12] wе бинә мала хwә. Бьра әw п'ор'е хwә кӧр' кә, нәйнькед хwә бьбьр'ә
[13] у к'ьнщед хwәйә һесирийе бехә, мала тәда р'уне у т'ам мәһәке бона де у баве хwә бьгьри, пәйр'а тӧ сәре хwә пер'а дайнә, һуне бьбьнә жьн у мер.
[14] Ле һәгәр пәйр'а тӧ wе нәхwази, wе бәр'дә, к'ӧда дьхwазә бьра һәр'ә. Wе нәфьрошә, нә жи чаwа щари һ'әсаб кә, чьмки тә әw беһӧрмәт кьр.
[15] Һәгәр дӧ жьнед йәки һәбьн әw йәке һ'ьз бькә ле йа дьн һ'ьз нәкә, әw wир'а кӧр'а биньн, йа һ'ьзкьри жи йа нәһ'ьзкьри жи, ле кӧр'е ньхӧри йа нәһ'ьзкьри бинә,
[16] wәхте һәбука хwә кӧр'ед хwәр'а п'арәвәкә, әw нькарә щийе пешьн бьдә кӧр'е йа һ'ьзкьри ль дәwса ньхӧрийе хwә кӧ жь йа нәһ'ьзкьри йә.
[17] Ле әw гәрәке кӧр'е йа нәһ'ьзкьри ньхӧри һ'әсаб кә у дӧбарә жь һ'әму һәбука хwә бьдә wи, чьмки әw ә дәстпебуна qәwата wи, ньхӧрти wир'а дьк'әвә.
[18] Һәгәр кӧр'е йәки сәрһ'ьшк йан нәельм бә, гӧр'а де у баве хwә нәкә, әwана ль wи һьлатьбьн ле әwи гӧһ нәдабә wан,
[19] бьра де у баве wи һьлдьн wи бьбьнә ль щәм р'успийед, һьнда дәргәһед бажаре wи.
[20] Бежьнә р'успийед бажаре wи: ‹Әв кӧр'е мә сәрһ'ьшк у нәельм ә, әw гӧр'а мә накә, п'ьр'хӧр у сәрхwәш ә›.
[21] Һьнге бьра һ'әму бьнәлийед бажаре wи, wи бьдьнә бәр кәвьра, бькӧжьн. Бь ви аwайи хьрабийе жь нава хwәда р'аwва дәрхә, һ'әму Исраел wе бьбьһе у бьтьрсә.
[22] Һәгәр йәк нәһәqикә һежайи мьрьне бькә у әw бе кӧштьне, дарва тӧ wи дарда ки,
[23] нәһелә wәки щьнйазе wи шәве ль сәр даре бьминә, ле wи һәма wе р'оже жи дәфьн кә. Чьмки ньфьр'а Хӧдан сәр йе дарва дардакьри йә. Ә'рде хwә кӧ Хӧдан Хwәдейе тә дьдә тә чаwа wар нәһ'әр'ьминә.