[1] Ke-ngit, yû-ngìn thai-sâng thu̍k Mô-sî ke Fap-li̍t-sû pûn chung-ngìn thâng; kì-têu thu̍k-tó yit-thon kóng: Chhie̍t-tui put-chún Â-mùn-ngìn lâu Mô-ap-ngìn kâ-ngi̍p su̍k Song-ti ke fi-chung.
[2] Liá he yîn-vi Yî-set-lie̍t-ngìn chhai chhut Âi-khi̍p ke lu-hong, Â-mùn-ngìn lâu Mô-ap-ngìn m̀ tân-chhiang mò yung sṳ̍t-vu̍t lâu súi lòi ngiàng-chiap Yî-set-lie̍t-ngìn, fán-chón chhiáng Pâ-làn lòi chu-chú kì-têu; chúng-he ngài-têu ke Song-ti sṳ́ ke chu-chú pien-cho chuk-fuk.
[3] Yî-set-lie̍t ngìn-mìn thâng-tó liá-thon fap-li̍t, chhiu chiông só-yû ke ngoi-chhu̍k ngìn tui kì-têu tông-chûng fûn-khôi.
[4] Kón-lî sṳn-thien chhông-khu ke chi-sṳ̂ Yî-li-â-sṳ̍t chhin-kiú yî-lòi lâu Tô-pí-ngâ yû tông-hó ke kâu-chhìn.
[5] Kì chún Tô-pí-ngâ yung yit-kiên thai fòng-kiên; ke fòng-kiên pún-lòi he piong hien su-chi yung ke ńg-kuk lâu hiông-liau, sṳn-thien chûng ke tûng-sî, pûn chi-sṳ̂ ke chi-vu̍t, pin pûn Li-vi-ngìn, sṳn-thien sṳ̂-pân, sṳn-thien sú-ví ke sṳ̍p-fûn chṳ̂-yit kiên (chhiu-he tui ńg-kuk, chiú, kám-lám-yù sû-sṳ̀n ke sṳ̍p-fûn chṳ̂-yit).
[6] Fat-sên liá-sṳ ke sṳ̀, ngài mò chhai Yâ-lu-sat-lâng; yîn-vi Â-tha̍t-siet-sî cho Pâ-pí-lùn-vòng ke thi sâm-sṳ̍p ngi-ngièn, ngài chón-hi hiong kì po-ko. Ko mò kí-kiú, ngài tet-tó vòng ke hí-khó,
[7] to-chón hi Yâ-lu-sat-lâng. Ngài chang fat-hien liá-khien fái-sṳ, chhiu-he Yî-li-â-sṳ̍t chún Tô-pí-ngâ yung Song-ti sṳn-thien tú ke yit-kiên thai fòng-kiên.
[8] Ngài tông-khién, chiông Tô-pí-ngâ ke tûng-sî chhiòn-phu te̍p chhut-hi.
[9] Ngài ha-lin piang-chhiang liá fòng-kiên, chiông Song-ti sṳn-thien ke hi-mén, su-chi lâu hiông-liau piong chón-hi.
[10] Ngài yu thâng-kóng sṳn-thien sṳ̂-pân lâu khì-thâ ke Li-vi-ngìn yí-kîn lì-khôi Yâ-lu-sat-lâng, chón-hi kì-têu ke thièn-chông, yîn-vi ngìn-mìn mò kiûng-kip kì-têu la-ngiak ke sṳ̍t-vu̍t vì-chhṳ̀ sên-fa̍t.
[11] Ngài chit-phi ke-têu kôn-chóng, ngióng cho-tet yù-chhai sṳn-thien fông-thet. Ngài chiông Li-vi-ngìn lâu sṳ̂-pân ham chón-lòi sṳn-thien fu̍k-chṳt.
[12] Án-ngiòng só-yû Yù-thai ngìn-mìn chhiu chai chiông ńg-kuk, chiú, kám-lám-yù ke sṳ̍p-fûn chṳ̂-yit tai-to sṳn-thien ke chhông-khu.
[13] Ngài phai-têu ngìn chóng chhông-khu; kì-têu he: Chi-sṳ̂ Sṳ-li-mí-ngâ, kîn-ho̍k chôn-kâ Sat-tuk, Li-vi-ngìn Pí-thai-ngâ. Kì-têu ke chhu-sú he Mâ-thâ-nì ke sûn-é, Sat-khat ke lai-é Ha̍p-nàn. Ngài sin-ngim liá-têu ngìn; kì-têu he fu-chit pûn tûng-sî pûn kì-têu ke thùng-kûng.
[14] Ngài ke Song-ti â, khiù Ngì yîn-vi liá-khien sṳ lòi ki-ngiam ngài, ki-tet ngài vi Ngì ke sṳn-thien lâu kin-pai ke lî-ngì só-cho ke hó-sṳ.
[15] Ke-chham sṳ̀-kiên, ngài chhai Yù-thai khon-tó yû-ngìn chhai ôn-sit-ngit cho chiú, ya yû-ngìn chiông ńg-kuk, chiú, phù-thò, vù-fâ-kó, lâu khì-thâ tûng-sî khún chhai lì-è poi-táng, yun-to Yâ-lu-sat-lâng hi. Ngài kín-ko kì-têu cho-m̀-tet chhai ôn-sit-ngit cho sên-lî.
[16] Yû-têu Thai-ngì-sàng lòi ke ngìn he̍t chhai Yâ-lu-sat-lâng; kì-têu chiông ǹg-è lâu tak-chúng fo-vu̍t tai-ngi̍p sàng-tú, chhai ôn-sit-ngit mai-pûn ngài-têu ke ngìn-mìn.
[17] Ngài chit-phi Yù-thai-ngìn ke kui-chhu̍k kóng: “Ngì-têu ngióng kám-cho liá fái-sṳ, fam-tó ôn-sit-ngit nè?
[18] Liá kám m̀-he Song-ti hìn-fa̍t ngì-têu chú-siên, fí-me̍t liá-sàng ke ngièn-yîn? Ngì-têu liá-ha yu fam-tó ôn-sit-ngit, voi hoi Yî-set-lie̍t-ngìn kien-kâ ngiâ Song-ti thai fat-khién.”
[19] Só-yî, ngài ha-lin, chhai tak-ke ôn-sit-ngit chhièn, lìm-am-é yit-to, Yâ-lu-sat-lâng ke sàng-mùn chhiu oi koân hí-lòi, chhṳ̍t-to ôn-sit-ngit ko-thet chang cho-tet tá-khôi. Ngài phai kí-ke phu̍k-ngìn sú chhai sàng mùn-héu, m̀-chún ngìn chhai ôn-sit-ngit tai fo-vu̍t ngi̍p-lòi.
[20] Yû yit-lióng pái, ke-têu mai fo-vu̍t ke sên-lî ngìn chhai Yâ-lu-sat-lâng sàng-ngoi ko-ya.
[21] Ngài chhiu kín-ko kì-têu kóng: “Ngì-têu cho-má-ke chhai sàng-ngoi ko-ya nè? Na-he ngì-têu chai án-ngiòng, ngài oi tui-fu ngì-têu.” Tui ke-sṳ̀ hí, kì-têu chhai ôn-sit-ngit chhiu mò chai ko-lòi lé.
[22] Ngài fûn-fu Li-vi-ngìn oi kiet-chhiang chhṳ-kâ, yèn-heu hi khon-sú sàng-mùn, sṳ́ ngìn-mìn khok-sṳ̍t sú ôn-sit-ngit cho sṳn-ngit. Ngài ke Song-ti â, khiù Ngì vi-tó liá-khien sṳ ki-tet ngài, yu yîn-vi Ngì ke thai chhṳ̀-oi lìn-mén ngài.
[23] Chhai ke-chham sṳ̀-kiên, ngài ya fat-hien chhin-tô Yù-thai-ngìn thó Â-sṳ̍t-thut, Â-mùn, Mô-ap ke fu-ńg cho pû-ngiòng.
[24] Kì-têu ke chṳ́-ńg yit-pan kóng Â-sṳ̍t-thut-fa ya-he phe̍t-chúng ngî-ngièn, m̀-voi kóng ngài-têu chhṳ-kâ Yù-thai ke fa.
[25] Ngài chhiu chit-phi kì-têu, chu-chú kì-têu, tá kì-têu kí-ke ngìn, pâng kì-têu ke thèu-nà-mô. Ngài ham kì-têu fung Song-ti ke miàng fat-sṳ, put-chún kì-têu chiông chhṳ-kâ ke chṳ́-ńg lâu ngoi-chhu̍k ngìn thûng-fûn.
[26] Ngài tui kì-têu kóng: “Kám m̀-he ngoi-chhu̍k fu-ńg sṳ́ Yî-set-lie̍t-vòng Só-lò-mùn fam-chhui mâ? Sûi-yèn Só-lò-mùn-vòng pí khì-thâ koet-kâ ke kiûn-vòng ví-thai, Song-ti siak kì, sṳ́ kì thúng-chhṳ chhiòn Yî-set-lie̍t, kì hàn-he pûn ngoi-chhu̍k fu-ńg yín-yu fam liá-chúng chhui.
[27] Kám-kóng ngài-têu oi ho̍k ngì-têu ke fái-yong, hi lâu ngoi-chhu̍k fu-ńg kiet-fûn lòi vì-poi Song-ti he-mò?”
[28] Yâ-hò-yâ-thai he thai-chi-sṳ̂ Yî-li-â-sṳ̍t ke lai-é. Chúng-he kì yû yit-ke lai-é thó Fò-lùn-ngìn Chhâm-pâ-lâ ke moi-é, só-yî ngài ham kì lì-khôi Yâ-lu-sat-lâng.
[29] Ngài ke Song-ti â, khiù Ngì ki-tet liá-têu ngìn ngióng-pân tá-lá-sap chi-sṳ̂ ke chṳt-vu, vì-poi Ngì lâu chi-sṳ̂, Li-vi-ngìn só-li̍p ke yok.
[30] Án-ngiòng ngài chhiu kiet-chhiang ngìn-mìn, sṳ́ kì-têu lì-khôi só-yû ngoi-chhu̍k ke tûng-sî. Ngài vi chi-sṳ̂ lâu Li-vi-ngìn chṳ-thin chṳt-vu, sṳ́ tak-sà ngìn chhiòn-phu tî chhṳ-kâ ke kûng-chok.
[31] Ngài ya ôn-phài hó, oi ngìn-mìn cheu-sṳ̀ chiông hien-chi yung ke chhèu, sîn-chhut ke ńg-kuk, súi-kó tai-lòi. Ngài ke Song-ti â, khiù Ngì ki-ngiam ngài, sṳ̂-ên pûn ngài.