[1] Hâ-poi só ki-chai he Ha̍p-kâ-li-â ke lai-é Nì-hî-mí ke sṳ. Â-tha̍t-siet-sî cho Pô-sṳ̂ fòng-ti thi ngi-sṳ̍p ngièn Kî-sṳ̂-liù ngie̍t, ngài — Nì-hî-mí he̍t chhai Pô-sṳ̂ kîn-sàng Sû-sân.
[2] Ngài ke hiûng-thi Ha̍p-nâ-nì lâu yit-khiùn ngìn tui Yù-thai lòi-to Sû-sân-sàng. Ngài hiong kì-têu tá-tham tui liù-mòng Pâ-pí-lùn chón-hi ke Yù-thai thùng-pâu lâu Yâ-lu-sat-lâng ke chhìn-hìn.
[3] Kì-têu kóng: “Ke-têu liù-mòng hàn-sâng ke nan-mìn chón-to kâ-hiông, tù-tó tông-thai ke khun-nàn, pûn ngoi-chhu̍k ngìn vú-yu̍k.” Kì-têu yu lâu ngài kóng: “Yâ-lu-sat-lâng ke sàng-chhiòng vang-thet, sàng-mùn pûn-ngìn sêu-thet.”
[4] Ngài thâng-tó liá-têu sṳ, chhiu chhô hâ-lòi, kín-liù muk-chṳp. Ngài pî-sông hó-tô ngit, mò sṳ̍t tûng-sî. Ngài hiong Song-ti khì-tó kóng:
[5] “Song-chú — thiên-táng ke Song-ti â, Ngì he chṳ-thai, chhṳ̍t-tet kin-vi ke Song-ti; Ngì tui oi Ngì yu chûn-sú Ngì kie-min ke ngìn sú chhṳ̀-oi ke yok.
[6] Song-chú â, ngài ngit-ya vi-tó Ngì ke chung phu̍k-ngìn — Yî-set-lie̍t ngìn-mìn ôi-khiù ke sṳ̀, khiù Ngì chu-muk khon ngài, thâng ngài ke khì-tó! Ngài sṳ̀n-ngin ngài-têu Yî-set-lie̍t-ngìn tet-chhui Ngì; ngài ke chú-siên lâu ngài chhiòn-phu yû fam-chhui.
[7] Ngài-têu ok-yi fán-khong Ngì, m̀ chûn-hàng Ngì thûng-ko Ngì ke phu̍k-ngìn Mô-sî pân-pu pûn ngài-têu ke fap-li̍t lâu kie-min.
[8] “Khiù Ngì ki-tet Ngì sṳt lâu Ngì ke phu̍k-ngìn Mô-sî kóng: ‘Na-he ngì-têu tui Ngài mò chûng-sîm, Ngài oi chiông ngì-têu fûn-san to phe̍t ke koet-kâ;
[9] na-he ngì-têu kûi-hiong Ngài, chûn-hàng Ngài ke min-lin, Ngài voi tai ngì-têu chón-lòi; chhiu-son ngì-têu liù-mòng san to thiên-piên, Ngài ya voi tai ngì-têu chón-to liá Ngài só sién-cho kin-pai Ngài ke só-chhai.’
[10] “Chú â, liá-têu chhiòn-phu he Ngì ke phu̍k-ngìn, Ngì chhṳ-kâ ke chṳ́-mìn, he Ngì sṳt yung thai-nèn thai-li̍t kiu-su̍k ke ngìn.
[11] Khiù Ngì chet-ngí chhùi-thâng phu̍k-ngìn ke khì-tó, ya thâng fôn-hí kin-vi Ngì sṳn-miàng chung phu̍k-ngìn ke khì-tó. Khiù Ngì pông-chhu phu̍k-ngìn kîm-pû-ngit sun-li sṳ̀n-kûng, sṳ́ fòng-ti hiong ngài khôi-ên.” Ke-sṳ̀, ngài he cho fòng-ti ke chiú-chṳn.