[1] Liá-chak ngie̍t ke ngi-sṳ̍p si, Yî-set-lie̍t-ngìn chhi-si̍p khiung-ha kim-sṳ̍t, vi kì-têu ke chhui yù-sông. Kì-têu yí-kîn lâu só-yû ke ngoi-chhu̍k ngìn fûn-khôi. Kì-têu chok mà-sâm, ve nài-fún chhai thèu-nà táng, péu-sṳ pî-sông, yèn-heu khî-tén sṳ̀n-ngin kì-têu lâu chú-siên só-fam ke chhui.
[3] Yû sâm tiám-chûng kiú, kì-têu khî-tén thâng Song-chú — kì-têu Song-ti ke fap-li̍t; chiap-tén ke sâm tiám-chûng kiú, kì-têu ngin-chhui, kin-pai Song-chú — kì-têu ke Song-ti.
[4] Yû yit-chak kóng-thòi he vi Li-vi-ngìn sat ke, táng-kô khî-tén Yâ-sû-â, Pâ-nì, Kap-me̍t, Sṳ-pâ-nì, Pu-nì, Sṳ-li-pí, Pâ-nì lâu Kî-nâ-nì. Kì-têu thai-sâng hiong Song-chú — kì-têu ke Song-ti khì-tó.
[5] Yèn-heu Li-vi-ngìn Yâ-sû-â, Kap-me̍t, Pâ-nì, Ha̍p-sâ-nì, Sṳ-li-pí, Hò-thi-ngâ, Sṳ-pâ-nì lâu Pí-thâ-hî-ngâ vi khôi-sṳ́ kin-pai siên-ko kóng: Oi khî hí-lòi, chan-mî Song-chú — ngì-têu ke Song-ti; oi yún-yún yén-yén siung-chan Kì! Kì ke miàng yin-tông su chûn-chhung, chhêu-ko só-yû ke siung-chan lâu chan-mî; ngì-têu oi chan-mî Kì yùng-kông ke miàng.
[6] Chiap-tén, Yî-set-lie̍t-ngìn án-ngiòng khì-tó: Song-chú â, chṳ́-yû Ngì he Song-chú! Ngì chhóng-chho thiên lâu thiên-táng ke sên-é; Ngì chho thi lâu tông-chûng só-yû ke, hói lâu tông-chûng ke sâng-vu̍t; Ngì su sâng-miang pûn van-vu̍t. Thiên-kiûn chhiòn-phu kin-pai Ngì.
[7] Ngì he Song-chú, he kién-sién Â-pak-làn ke Song-ti; Ngì tai kì chhut Pâ-pí-lùn ke Ǹg-ngí, chiông kì ke miàng kói-cho Â-pak-lâ-hón.
[8] Ngì tî kì tui Ngì chûng-sîm, chhiu lâu kì li̍p-yok: Oi chiông Kâ-nàm-ngìn, Het-ngìn, Â-mô-li-ngìn ke thú-thi, Pí-li-sé-ngìn, Yâ-pu-sṳ̂-ngìn, Kiet-kâ-sat-ngìn ke thú-thi, su-pûn kì ke heu-thoi. Ngì chûn-sú Ngì ke yok-thin, yîn-vi Ngì he kûng-ngi ke.
[9] Ngì khon-tó ngài-têu chú-siên chhai Âi-khi̍p su-khú; Ngì thâng-tó kì-têu chhai Fùng-hói sùn hêm kiu-miang.
[10] Ngì chhiu hàng sṳ̀n-chiak khì-sṳ chit-fa̍t Âi-khi̍p-vòng, pin kì só-yû ke kôn-yèn lâu chhiòn-koet ngìn-mìn; yîn-vi Ngì tî kì-têu khî-fu Ngì ke chṳ́-mìn. Só-yî Ngì ke miàng-sâng chhòn-phien chhṳ̍t-to kîm-pû-ngit.
[11] Ngì vi Ngì ke chṳ́-mìn chiông hói fûn-khôi, tai-liâng kì-têu hàng châu-thi ko-hi. Ngì chiông tûi kì-têu ke ngìn te̍p-ngi̍p chhṳ̂m-súi, chhiu-chhiong sa̍k-thèu chhṳ̀m-lo̍k thai-hói ke tî-tú.
[12] Ngit-sṳ̀-thèu, Ngì yung yùn-chhû tai-liâng kì-têu; am-pû-thèu, Ngì yung fó-chhû cheu-kông kì-têu ke lu.
[13] Ngì tui thiên-táng lìm-chhai Sî-nai-sân, lâu Ngì ke chṳ́-mìn kóng-fa. Ngì pûn kì-têu chṳn-chhṳ̍t ke tién-chông, chṳ̂n-sṳ̍t ke fap-li̍t, mî-hó ke kau-hiun lâu kie-min.
[14] Ngì oi kì-têu sú Ngì ke ôn-sit-ngit cho sṳn-ngit; Ngì thûng-ko Ngì ke phu̍k-ngìn Mô-sî pân-pu fap-li̍t kie-min.
[15] Kì-têu tú-kî ke sṳ̀, Ngì tui thiên-táng kong-hâ sṳ̍t-vu̍t; kì-têu choi-châu ke sṳ̀, Ngì tui phàn-sa̍k pau-súi chhut-lòi. Ngì fûn-fu kì-têu ngi̍p-hi cham-liâng, Ngì yin-hí su-pûn kì-têu ke thú-thi.
[16] Chúng-he ngài-têu ke chú-siên ye̍t lòi ye̍t kiêu-ngau, ye̍t lòi ye̍t ngang-kiáng, m̀-hén chûn-sú Ngì ke kie-min.
[17] Kì-têu m̀-hén sun-chhiùng, m̀ ki-tet Ngì só-cho ke yit-chhiet; kì-têu m̀ ki-tet Ngì só-hàng ke sṳ̀n-chiak. Kì-têu chhùn-sîm phoi-ngia̍k, sién yit-ke liâng-chhiu, oi tai kì-têu to-chón hi Âi-khi̍p cho nù-chhòi. Chúng-he Ngì he sa-miên ke Song-ti; Ngì yû ên-tién lâu lìn-mén; Ngì mò sùi-phien fat-khién, yû fûng-sṳn ke chhṳ̀-oi. Ngì mò fit-thet kì-têu.
[18] Kì-têu chu-chho yit-chak ngiù-hìn ke ngiéu-siong, kóng liá chhiu-he tai kì-têu chhut Âi-khi̍p ke sṳ̀n! Kì-têu thai-thai ngiâ-hí Ngì ke nu-hi!
[19] Chúng-he Ngì mò chiông kì-têu fit chhai khóng-yâ, yîn-vi Ngì thai-yû lìn-mén. Ngit-sṳ̀-thèu tai-liâng kì-têu ke yùn-chhû mò lì-khôi kì-têu; am-pû-thèu cheu-liong kì-têu ke fó-chhû, Ngì ya mò sái-chéu.
[20] Ngì sóng-su liòng-san ke Lìn chṳ́-thô kì-têu; yu su mâ-nâ pûn kì-têu sṳ̍t, ya pûn kì-têu súi lîm.
[21] Chhai khóng-yâ si-sṳ̍p ngièn, Ngì kiûng-kip kì-têu só sî-yeu ke yit-chhiet. Kì-têu ke sâm-fu mò chok lan-thet; kì-têu ke kiok ya mò hàng hí-pheu.
[22] Ngì chiông lie̍t-koet su-pûn kì-têu, cham kì-têu fu-khiun ke thú-thi. Kì-têu cham-liâng Sî-fèn-vòng thúng-chhṳ ke Hî-sṳ̍t-pún, Ngo̍k-vòng thúng-chhṳ ke Pâ-sân.
[23] Ngì su kì-têu chṳ́-sûn, tô-to chhiong thiên-táng ke sên-é. Yu sṳ́ kì-têu tet-tó liá-thi, he̍t chhai liá-vi, chhiu-he Ngì yin-hí su-pûn kì-têu chú-siên ke thú-thi.
[24] Kì-têu cham-liâng Kâ-nàm ke thú-thi; Ngì yû ap-chṳ ke-thi ke ngìn-mìn. Ngì su nèn-li̍t pûn Ngì ke chṳ́-mìn, pûn kì-têu cheu chhṳ-kâ ke yi-sṳ tui-thai Kâ-nàm-thi ke vòng lâu ngìn-mìn.
[25] Kiên-ku ke sàng-sṳ, chhin-phì ke thú-thi, chông-mân chhòi-pó ke vuk-è, yet-hó ke súi-chiáng, kám-lám su, kó-su, lâu phù-thò-yèn, chhiòn-phu lo̍k chhai kì-têu ke sú-chûng. Kì-têu sṳ̍t-to páu pi̍t-pi̍t, kín thai-khiêu hí-lòi; Ngì su ke fûng-sṳn, sṳ́ kì-têu mân-chiuk khoai-lo̍k.
[26] Chúng-he, Ngì ke chṳ́-mìn sa phoi-ngia̍k Ngì, m̀ sun-chhiùng Ngì; m̀-tap Ngì ke fap-li̍t. Siên-tî khien kì-têu chón-hiong Ngì, fán-chón pûn kì-têu chhṳ̀-sí. Kì-têu yit-pái yu yit-pái vú-yu̍k Ngì;
[27] Ngì chhiu chiông kì-têu kâu chhai thi̍t-ngìn sú-chûng, thi̍t-ngìn chhiu khî-fu kì-têu. Kì-têu tù-tó châi-nan ke sṳ̀ hiong Ngì khiù-ham, Ngì chhiu tui thiên-táng tap-yin kì-têu. Ngì thai-yû lìn-mén, pûn kì-têu chṳ́n-kiu-chá, kiu kì-têu thot-lì thi̍t-ngìn ke sú.
[28] Kì-têu tet phìn-ôn yî-heu, yu chhai Ngì mien-chhièn fam-chhui, Ngì chhiu chiông kì-têu chai yit-pái kâu-pûn sù-thi̍t kón. Chúng-he kì-têu fí-kói, hiong Ngì khiù-ham ke sṳ̀, Ngì chhai thiên-táng thâng-tó, Ngì thai-yû lìn-mén, hàn-he yit-pái yu yit-pái chṳ́n-kiu kì-têu.
[29] Ngì kín-ko kì-têu oi chûn-sú Ngì ke fap-li̍t, chúng-he kì-têu kiêu-ngau, m̀-thâng Ngì ke min-lin. Chûn-sú Ngì ke fap-li̍t chang he sâng-miang ke lu, kì-têu hàn-he ngang-kiáng vat-thèu m̀-hén thâng.
[30] Ngì ngiûn-nai kín-ko kì-têu chhin-tô ngièn, Ngì ke Lìn kám-thung siên-tî hiong kì-têu kóng-fa, chúng-he Ngì ke chṳ́-mìn hàn-he ngí-kûng poi-poi, só-yî Ngì yù-chhai phe̍t-koet lòi cham-liâng kì-têu.
[31] Sûi-yèn án-ngiòng, yîn-vi Ngì thai-yû lìn-mén, Ngì mò fit-thet kì-têu, ya mò fí-me̍t kì-têu; yîn-vi Ngì he yû ên-tién lìn-mén ke Song-ti!
[32] Ngài-têu ke Song-ti â, Ngì he ví-thai ke Song-ti, Ngì chhṳ̍t-tet kin-vi, yû thai khièn-piang! Ngì sin-sú yok-thin, yún-yén chhṳ̀-pî. Tui Â-sut lie̍t-vòng ap-pet ngài-têu to liá-ha, ngài-têu ke vòng, ngài-têu ke liâng-chhiu, ngài-têu ke chi-sṳ̂, ngài-têu ke siên-tî, ngài-têu ke chú-siên lâu só-yû ngìn-mìn, ngài-têu chhiòn-phu su-chhin thung-khú! Khiù Ngì m̀-hó m̀ ki-tet ngài-têu su-ko án-tô ke khú-nan!
[33] Ngì tui ngài-têu só cho ke he kûng-ngi ke, Ngì só hàng ke he sin-sṳ̍t ke, chúng-he ngài-têu só cho ke he sià-ok ke.
[34] Ngài-têu ke chú-siên, kiûn-vòng, liâng-chhiu lâu chi-sṳ̂, chhiòn-phu mò chûn-sú Ngì ke fap-li̍t, m̀ thâng Ngì ke min-lin lâu kín-ko.
[35] Ngì ke chṳ́-mìn ke-sṳ̀ he̍t chhai chhṳ-kâ ke koet-kâ, chhai Ngì só-su chhin-thai chhin-phì ke thú-thi hióng-fuk, chúng-he kì-têu mò lì-khôi chhui-ok lòi sṳ-fung Ngì.
[36] Khon nâ, ngài-têu liá-ha chhai Ngì su-pûn ngài-têu chú-siên ke thú-thi cho nù-chhòi, chhai liá kiûng-kip ngài-têu sṳ̍t-vu̍t ke hó thú-thi cho phe̍t-ngìn ke nù-chhòi.
[37] Liá-thi ke chhut-sán chhiòn-phu kûi Ngì phai-lòi kón ngài-têu ke kiûn-vòng, yîn-vi ngài-têu yû fam-chhui. Kì-têu sùi-yi tui-thai ngài-têu ke sṳ̂n-thí lâu thèu-sâng, ngài-têu fî-sòng thung-khú!
[38] Yîn-vi só fat-sên ke liá-têu sṳ, ngài-têu Yî-set-lie̍t ngìn-mìn chhiu chhai liá-vi chhiâm yit-ke khok-sṳ̍t ke yok. Ngài-têu ke liâng-chhiu, Li-vi-ngìn lâu chi-sṳ̂ chhiòn-phu chhiâm-miàng.