[1] Â-ha̍p-sùi-lû cho vòng ke sṳ̀-thoi, thúng-chhṳ Yin-thu to Kú-sṳ̍t yit-pak ngi-sṳ̍p-chhit sén.
[2] Ke-sṳ̀, kì chhai sú-tû Sû-sân-sàng ke vòng-kiûng tên-kî.
[3] Â-ha̍p-sùi-lû cho vòng ke thi-sâm ngièn, kì vi só-yû ke kui-chhu̍k lâu hàng-chṳn kôn-yèn phan thai yèn-si̍t. Pô-sṳ̂ lâu Mí-tí-â ke vùn-vú pak-kôn, pin kok-sén ke sén-chóng lâu kui-chhu̍k chhiòn-phu chhâm-kâ.
[4] Chiuk-chiuk yû liuk-chak ngie̍t, kì sòng-sòng hiong kì-têu tién kì vòng-koet ke hó-ngiak, chhông-sṳn lâu vî-ngiàm.
[5] Chiap-tén vòng yu vi-tó sú-tû Sû-sân chhiòn-sàng ke nàm-ngìn, mò-lun phìn-chhien fu-kui, chhai vòng-kiûng ke fâ-yèn phan yèn-si̍t, lièn-siu̍k chhit-ngit.
[6] Liá fâ-yèn yung làm-set lâu pha̍k-set ke pu-liàm pu-chṳ, yung chṳ́-set ke mà-sâ tai-é chiông pu-liàm ku-thin chhai thai-lî-sa̍k tún-è hong ke ngiùn-khiên. Kîm-ngiùn cho ke mìn-yí piong chhai phû-tén pha̍k-set, fùng-set, liu̍k-set thai-lî-sa̍k lâu chṳ̂n-chû-hok ke thi-song.
[7] Lîm-chiú yung ke pî-é he kok-chúng mò khiung fâ-set ke kîm-pî. Só lîm ke chiú he vòng-kâ yung ke, chún-phi fî-sòng tô, péu-hien vòng ke sṳ̀n-yi.
[8] Vòng fûn-fu kiûng-chûng ke phu̍k-ngìn, pûn thai-kâ sùi-yi lîm, cho-m̀-tet miên-kióng ngìn.
[9] Thùng-sṳ̀, chhai vòng-kiûng nui, vòng-heu Fà-sṳ̍t-ti ya vi fu-ńg phan yèn-si̍t.
[10] Chhai yèn-si̍t ke thi-chhit ngit, Â-ha̍p-sùi-lû-vòng lîm-chiú to tông fôn-hí, chhiu fûn-fu fu̍k-sṳ kì ke chhit-ke thai-kam Mí-fu-man, Pí-sṳ̂-thâ, Ha̍p-pô-nâ, Pí-kiet-thâ, Â-pha̍t-thâ, Sî-tha̍t lâu Kap-kâ,
[11] hi chhiáng vòng-heu Fà-sṳ̍t-ti tai-tén miên-liù ngi̍p-lòi. Vòng-heu he yit-ke chhin-chiâng ke fu-ngìn-kâ; vòng sióng-oi hiong kôn-yèn, kui-pîn tién vòng-heu ke mî-mau.
[12] Chúng-he, thai-kam chiông vòng ke min-lin chhòn-pûn vòng-heu Fà-sṳ̍t-ti ke sṳ̀, kì m̀-hén lòi. Vòng thai fat-khién, at-to fó tông-chho̍k.
[13] Vòng tak-pái tù-tó fap-li̍t ya-he chṳn-ngi ke mun-thì, chhiu voi mun chôn-kâ ke yi-kien, só-yî kì seu-si̍p ku-mun-thòn lòi.
[14] Kì chui chhîn-sin ke ku-mun he: Kap-sṳ-nâ, Sṳ-tha̍t, Ap-mâ-thâ, Thâ-sṳ̂-sṳ̂, Mí-li̍t, Mâ-sî-nâ lâu Mí-mu-kôn. Liá-têu ngìn he Pô-sṳ̂ lâu Mí-tí-â ke chhit-ke thai-sṳ̀n, chhòng-theu chiap-khiun vòng, chhai koet-nui chhô chui-kô ke thi-vi.
[15] Â-ha̍p-sùi-lû-vòng mun kì-têu: “Ngài phai thai-kam chhòn min-lin pûn vòng-heu Fà-sṳ̍t-ti, chúng-he kì m̀-hén thâng-chhiùng. Cheu fap-li̍t, ngài-têu oi ngióng-pân phan kì?”
[16] Mí-mu-kôn chhai vòng lâu khì-thâ kôn-yèn mien-chhièn en-kóng: “Vòng-heu Fà-sṳ̍t-ti m̀ tân-chhiang vú-yu̍k vòng, ya vú-yu̍k tó vòng tak-sén ke kôn-yèn lâu ngìn-mìn!
[17] Koet-nui ke fu-ngìn-kâ na-he thâng-tó vòng-heu só-cho ke sṳ, chhiu voi khon m̀-hí chhṳ-kâ ke ló-kûng. Kì-têu voi kóng: ‘Â-ha̍p-sùi-lû-vòng min-lin vòng-heu Fà-sṳ̍t-ti hi kien kì, chúng-he kì m̀-hi.’
[18] Pô-sṳ̂ lâu Mí-tí-â ke-têu kôn-yèn ke pû-ngiòng yit thâng-tó vòng-heu liá-chúng hàng-vì, tông-kiak chhiu voi cheu-yong tui-thai kì-têu ke ló-kûng; án-ngiòng yit-thin voi fat-sên chhin-tô ke méu-sṳ lâu put-mân.
[19] Na-he koet-vòng ngin-vì án-ngiòng hó, chhiáng pân-pu min-lin: Tui liá-ha khôi-sṳ́, put-chún Fà-sṳ̍t-ti chai-lòi kien vòng. Hàn-oi chiông liá min-lin siá hâ-lòi, thin-cho Pô-sṳ̂ lâu Mí-tí-â ke fap-li̍t, yún-yén cho-m̀-tet kói. Yu chhiáng koet-vòng chiông vòng-heu ke thi-vi su-pûn pí kì kha-hó ke ngìn.
[20] Koet-vòng ke min-lin kûng-pu to chhiòn-koet yî-heu, sûi-yèn koet-kin án-fat, tak-ke fu-ngìn-kâ, mò-lun ló-kûng he phìn-chhien, he fu-kui, yit-thin voi hó-hó chûn-kin chhṳ-kâ ke ló-kûng.”
[21] Vòng lâu kì ke thai-sṳ̀n chhiòn-phu ngin-vì liá-ke yi-kien tông hó, chhiu cheu Mí-mu-kôn ke kien-ngi hi cho.
[22] Vòng min-lin yung tak-sén tak-chhu̍k ke ngî-ngièn lâu vùn-sṳ thûng-tî tak-sén tak-chhu̍k: Cho ló-kûng yin-kôi he kiâ vuk-hâ ke chú-ngìn; kì ke fa yû chhie̍t-tui ke khièn-piang.