[1] Si-chak ngie̍t yî-heu, Â-tha̍t-siet-sî cho fòng-ti thi ngi-sṳ̍p ngièn Nì-san ngie̍t, yû yit-ngit, ngài vi kì chṳ̂m-chiú. Kì m̀-sṳt khon-tó ngài mân-mien yù-sèu,
[2] fòng-ti mun ngài: “Ngì yu mò pot-phiang, cho-má-ke mien-set án m̀-hó khon? Yit-thin yû má-ke sṳ chang voi sṳ́ ngì án yù-sèu!” Ngài fî-sòng chho̍k-kiâng,
[3] chúng-he en-kóng: “Fòng-ti van-soi! Ngài chú-siên mài-chong ke sàng fông-thet, sàng-mùn pûn-fó sêu-thet, ngài ngióng m̀-voi yù-sèu nè?”
[4] Fòng-ti mun ngài: “Ngì oi má-ke?” Ngài chhiu hiong thiên-táng ke Song-ti khì-tó,
[5] yèn-heu ngài lâu fòng-ti kóng: “Na-he fòng-ti khôi-ên, chún phu̍k-ngìn ke khién-khiù, chhiáng pûn ngài chón-to Yù-thai-thi, to ngài chú-siên mài-chong ke sàng hi, án-ngiòng, ngài oi chhùng-kien ke-sàng.”
[6] Ke-sṳ̀, fòng-heu chhô chhai kì ke sùn-thèu. Fòng-ti mun ngài oi hi kí-kiú? Kí-sṳ̀ chón-lòi? Ngài fì-tap heu, kì fôn-hí phai ngài hi; ngài chhiu thin ngit-khì.
[7] Ngài yu khiù fòng-ti khôi-ên su-pûn ngài cheu-sû, thûng-tî Hò-sî-sén ke-têu sén-chóng chún ngài kîn-ko, chhṳ̍t-to Yù-thai.
[8] Ngài ya yêu-khiù yit-fun cheu-sû pûn kón-lî fòng-kâ su-nà ke Â-sat, min-lin kì pûn ngài su-liau, lòi siû-kien sṳn-thien sùn sàng-pó ke mùn lâu sàng-chhiòng, hàn-yû ngài oi he̍t ke vuk-è. Yîn-vi ngài ke Song-ti sṳ̂-ên pông-chhu, ngài só yêu-khiù ke, fòng-ti chhiòn-phu su-pûn ngài.
[9] Fòng-ti phai kiûn-kôn lâu khì-pîn pó-fu ngài, ngài chhiu chhut-fat to Hò-sî-sén. Chhai ke-vi, ngài chiông fòng-ti ke cheu-sû kâu-pûn ke-têu sén-chóng.
[10] Fò-lùn-sàng ke Chhâm-pâ-lâ lâu Â-mùn-sén ke kôn-chóng Tô-pí-ngâ, thâng-tó yû-ngìn lòi vi Yî-set-lie̍t-ngìn chên-chhí li-yit, chhiu tông mò fôn-hí.
[11] Ngài to Yâ-lu-sat-lâng, chhai ke-vi he̍t sâm-ngit,
[12] mò chiông Song-ti oi ngài vi Yâ-lu-sat-lâng cho ke sṳ lâu ngìn kóng. Thi-sâm ngit pan-ya, ngài hong-hí-lòi, tai-tén kí-ke ngìn khiung-ha chhut-hi. Chhù-liáu ngài khì ke lì-è, mò phe̍t ke thèu-sâng.
[13] Ngài chhai pan-ya chhut-sàng, kîn-ko sî-phién ke Kuk-mùn, hiong-nàm kîn-ko Liùng-chhièn, lòi-to Lá-sap-mùn. Ngài kín-hàng, kín-khon Yâ-lu-sat-lâng vang-thet ke sàng-chhiòng lâu pûn-fó sêu-thet ke sàng-mùn.
[14] Chhai sàng ke tûng-phién, ngài hiong-pet hàng, to Chhièn-súi-mùn lâu Vòng-chhṳ̀. Chhai ke-vi, yîn-vi ngài khì ke lì-è chhìm m̀-tó lu ko-hi,
[15] ngài chhiu hâ-to Khi̍p-lùn-hâi, sun sân-lak khì-tén sông, sùn-chhà sàng-chhiòng, yèn-heu to-chón ngièn-lòi ke lu, kîn-ko Kuk-mùn chón-to sàng-tú.
[16] Mò yit-ke kôn-chóng tî ngài hi-ko má-ke só-chhai, cho má-ke sṳ. Chhṳ̍t-to ke-sṳ̀, ngài chhiòn-mò lâu Yù-thai thùng-pâu kóng-hí; mò-lun he chi-sṳ̂, liâng-chhiu, kôn-chóng, ya-he khó-nèn chhâm-kâ liá kûng-chok ke ngìn, ngài chhiòn-phu mò kóng.
[17] Heu-lòi ngài tui kì-têu kóng: “Ngài-têu só tù-tó ke khun-nàn chhiu-he Yâ-lu-sat-lâng fông-thet, sàng-mùn pûn-fó sêu-thet, ngì-têu chhiòn-phu khon-tó lé. Ngài-têu lòi chhùng-kien Yâ-lu-sat-lâng ke sàng-chhiòng, miên-tet ngài-têu chai su vú-yu̍k!”
[18] Ngài yu kóng, ngài ke Song-ti ngióng-pân sṳ̂-ên pông-chhu ngài, yu lâu kì-têu kóng fòng-ti tui ngài kóng ke fa. Kì-têu kóng: “Ngài-têu khôi-sṳ́ lòi chhùng-kien!” Só-yî kì-têu chún-phi hó-se, khôi-sṳ́ liá hó ke kûng-chok.
[19] Chúng-he Fò-lùn-sàng ke Chhâm-pâ-lâ, Â-mùn-sén ke kôn-chóng Tô-pí-ngâ, lâu yit-ke ham-cho Kî-san ke Â-lâ-pak-ngìn, yit thâng-tó ngài-têu oi cho ke sṳ, chhiu seu ngài-têu, méu-sṳ ngài-têu. Kì-têu kóng: “Ngì-têu oi cho-má-ke â? Ngì-têu sióng-oi phoi-ngia̍k fòng-ti he-mò?”
[20] Ngài en kì-têu kóng: “Thiên-táng ke Song-ti voi sṳ́ ngài-têu sṳ̀n-kûng. Ngài-têu he Kì ke phu̍k-ngìn; ngài-têu oi khôi-sṳ́ lòi hí. Ngì-têu fán-chón chhai Yâ-lu-sat-lâng mò-fun, mò khièn-li, mò-ngìn ki-ngiam.”