[1] Ko yit-chham sṳ̀-kiên, chhin-tô ngìn, nàm ke ńg ke, khôi-sṳ́ koai-yen kì-têu ke Yù-thai thùng-pâu.
[2] Yû-têu kóng: “Ngài-têu he chṳ́-ńg án-tô ke thai kâ-thìn, sî-yeu liòng-sṳ̍t lòi ko-ngit!”
[3] Yû-têu kóng: “Ngài-têu kô-put-chiông oi tí-ap thièn-thi, phù-thò-yèn lâu vuk-è, chang yû liòng-sṳ̍t chhûng-kî.”
[4] Ya yû-ngìn kóng: “Ngài-têu yí-kîn chia-chhièn lòi-na̍p thièn-thi lâu phù-thò-yèn ke soi pûn fòng-ti.
[5] Ngài-têu lâu ngài-têu ke Yù-thai thùng-pâu he khiung chúng-chhu̍k; ngài-têu ke chṳ́-ńg lâu kì-têu ke chṳ́-ńg mò má-ke fûn-phe̍t. Chúng-he ngài-têu sa oi pet chhṳ-kâ ke chṳ́-ńg hi cho nù-chhòi, ngài-têu ke moi-é yû-têu yí-kîn cho nù-pî lé, ngài-têu mò-li̍t chṳ́n-kiu, yîn-vi ngài-têu ke thièn-thi lâu phù-thò-yèn yí-kîn pien-cho phe̍t-ngìn ke.”
[6] Ngài thâng-tó kì-têu ke koai-yen lâu só-kóng ke fa, chhiu thai fat-khién,
[7] kiet-thin oi kié-kiet liá-sṳ. Ngài chit-phi ke-têu mìn-chung ke liâng-chhiu lâu kôn-chóng kóng: “Ngì-têu ngióng-pân kám pok-siok chhṳ-kâ ke hiûng-thi?” Yèn-heu ngài chhi-si̍p khiùn-chung khôi-fi lòi chhú-lî liá mun-thì,
[8] tui kì-têu kóng: “Ngài-têu sṳt chhin chui-thai ke nú-li̍t su̍k-chón ke-têu mai-pûn ngoi-chhu̍k ke Yù-thai hiûng-thi. Liá-ha ngì-têu fán-chón khiòng-pet hiûng-thi mai chhṳ-kâ pûn ngì-têu — pûn chhṳ-kâ ke Yù-thai ke thùng-pâu!” Ke-têu liâng-chhiu chhiòn-phu tiâm-tiâm, mò fa hó-kóng.
[9] Só-yî ngài yu kóng: “Ngì-têu án-ngiòng cho sṳ̍t-chhai m̀-chho̍k! Ngì-têu kám m̀-he yin-kôi kin-vi Song-ti, hi cho chho̍k ke sṳ? M̀-hó pûn ngài-têu ke ngoi-pâng tui-thi̍t yû ngim-hò ke lî-yù chhṳ́-seu ngài-têu.
[10] Ngài sṳt chia-chhièn chia liòng-sṳ̍t pûn thùng-pâu; ngài ke phèn-yû lâu kûng-ngìn ya sṳt chia-pûn thùng-pâu. Liá-ha, ngài-têu oi miên-thet só-yû ke li-sit,
[11] mò-lun he chhièn, liòng-sṳ̍t, chiú, yù, chhiòn-phu m̀-sṳ́ kì-têu vàn; oi chit-sṳ̀ chiông kì-têu tí-ap ke thièn-thi, phù-thò-yèn, kám-lám-yèn, lâu vuk-è vàn kì-têu.”
[12] Ke-têu liâng-chhiu en-kóng: “Ngài-têu ngien-yi cheu ngì kóng ke hi cho, thui-vàn kì-têu ke chhòi-sán, m̀-voi chai hiong kì-têu thó-chai.” Ngài seu-si̍p chi-sṳ̂ lòi, ham ke-têu liâng-chhiu chhai kì-têu mien-chhièn fat-sṳ, oi chûn-sú thèu-ha ke yok-thin.
[13] Yèn-heu, ngài kié-khôi yêu-tai, chhu̍k-tén kóng: “Song-ti oi án-ngiòng chhu̍k m̀ sú yok-thin ke ngìn, chhu̍k-thet kì ke vuk-è lâu yit-chhiet só-yû ke, sṳ́ kì má-ke chhiu mò.” Só-yû chhai-chhòng ke ngìn chhiòn-phu kóng: “Â-mén!” yu chan-mî Song-chú. Ke-têu liâng-chhiu chhiu cheu kì-têu ke yok-thin hi cho.
[14] Tui ngài cho Yù-thai sén-chóng ke sṳ̍p-ngi ngièn lòi, chhiu-he tui Â-tha̍t-siet-sî cho fòng-ti ke thi ngi-sṳ̍p ngièn to sâm-sṳ̍p ngi-ngièn, ngài lâu ngài ke hiûng-thi chhiòn-phu mò sṳ̍t sén-chóng yin-kôi tet-tó ke liòng-sṳ̍t.
[15] Chhai ngài yî-chhièn ke-têu sén-chóng chhiòn-phu he ngìn-mìn ke chhûng-tâm; kì-têu yêu-khiù ngìn-mìn tak-ngit vi-tó liòng-sṳ̍t, chiú kiéu si-sṳ̍p chak ngiùn-pi. Lièn kì-têu ke phu̍k-ngìn ya khî-ap ngìn-mìn. Chúng-he ngài m̀ án-ngiòng cho, yîn-vi ngài kin-vi Song-ti.
[16] Ngài chhiòn-sîm chhai chhùng-kien sàng-chhiòng; ngài pin-mò mâi sán-ngia̍p. Ngài ke phu̍k-ngìn ya chhiòn-phu chhâm-kâ chhùng-kien ke kûng-chok.
[17] Phìn-sòng lâu ngài khiung-ha sṳ̍t-fan ke Yù-thai ngìn-mìn lâu liâng-chhiu yû yit-pak ńg-sṳ̍p ngìn, nang-ngoi hàn-yû tui lìn-koet lòi-kien ngài ke ngìn.
[18] Tak-ngit, ngài oi chún-phi yit-chak ngiù-kú, liuk-chak phì-yòng, lâu chhin-tô kiê-é. Mî sṳ̍p-ngit, ngài oi kiûng-kip yit-phî sîn-chiú. Sûi-yèn án-ngiòng, ngài pin-mò yêu-khiù sén-chóng yin-kôi tet-tó ke liòng-sṳ̍t, yîn-vi ngài tî ngìn-mìn ke fu-tâm yí-kîn tông-chhûng lé.
[19] Ngài ke Song-ti â, khiù Ngì ki-ngiam ngài vi ngìn-mìn só-cho ke sṳ, sṳ̂-ên pûn ngài.