[1] To thi-chhit ngie̍t, Yî-set-lie̍t-ngìn chhai tak-sà ke sàng-chṳ́n chhiòn-phu ôn-thin hó-se. Ke-chak ngie̍t ke thi-yit ngit, kì-têu chhi-si̍p chhai Yâ-lu-sat-lâng, chhai Súi-mùn chhièn ke kóng-chhòng. Kì-têu chhiáng kîn-ho̍k chôn-kâ Yî-sṳ̂-lâ chiông Fap-li̍t-sû tai-lòi; liá fap-li̍t chhiu-he Song-chú thûng-ko Mô-sî pûn Yî-set-lie̍t-ngìn ke.
[2] Só-yî chi-sṳ̂ Yî-sṳ̂-lâ chiông Fap-li̍t-sû tai-to khiùn-chung chhi-si̍p ke só-chhai; ke-vi yû nàm-ngìn, ńg-ngìn, lâu thâng tet-sṳt ke se-ngìn-è.
[3] Yî-sṳ̂-lâ chhai Súi-mùn chhièn ke kóng-chhòng hiong kì-têu thai-sâng thu̍k Fap-li̍t-sû, tui thiên-kông yit-chhṳ̍t thu̍k-tó tông-chu; kì-têu chhiòn-phu tông ngin-chṳ̂n thâng.
[4] Kîn-ho̍k chôn-kâ Yî-sṳ̂-lâ khî chhai vi liá-sṳ thi̍t-phe̍t cho ke su-thòi táng. Kì yu-phién khî-tén Mâ-thâ-thì-ngâ, Sṳ-mâ, Â-nai-ngâ, Vû-li-â, Hî-le̍t-kâ lâu Mâ-sî-ngâ; kì chó-phién khî-tén Pí-thai-ngâ, Mí-sâ-li, Mâ-kî-ngâ, Ha̍p-sun, Ha̍p-pha̍t-thai-nâ, Sat-kâ-li-â lâu Mí-sû-làn.
[5] Yî-sṳ̂-lâ kô-kô khî chhai thòi-táng, kì-têu chhiòn-phu chu-yi khon kì. Kì yit tá-khôi sû, thai-kâ chhiòn-phu khî hí-lòi.
[6] Yî-sṳ̂-lâ kóng: “Siung-chan Song-chú; Kì he ví-thai ke Song-ti!” Só-yû mìn-chung chhiòn-phu khià-sú, en-kóng: “Â-mén! Â-mén!” Yèn-heu khúi-hâ, mien phu̍k chhai thi-song kin-pai Song-chú.
[7] Heu-lòi, mìn-chung hong-hí-lòi, khî chhai kì-têu ngièn-lòi ke só-chhai; yû-têu Li-vi-ngìn chhiu hiong kì-têu kié-sṳt fap-li̍t. Liá-têu ngìn he Yâ-sû-â, Pâ-nì, Sṳ-li-pí, Ngâ-mén, Â-kuk, Sâ-pí-thai, Hò-thi-ngâ, Mâ-sî-ngâ, Kî-li-thâ, Â-sat-li-ngâ, Yok-sat-pha̍t, Ha̍p-nàn, lâu Pí-lòi-ngâ.
[8] Kì-têu siên-thu̍k Song-ti ke Fap-li̍t-sû, yèn-heu fân-yi̍t, pin siòng-se kié-sṳt, sṳ́ mìn-chung mìn-pha̍k.
[9] Mìn-chung thâng-tó fap-li̍t kûi-thin ke sṳ yî-heu, chhiòn-phu kám-thung to kieu chhut-lòi. Só-yî sén-chóng Nì-hî-mí, chi-sṳ̂ lâu kîn-ho̍k chôn-kâ Yî-sṳ̂-lâ, pin kié-sṳt fap-li̍t ke Li-vi-ngìn lâu mìn-chung kóng: “Kîm-pû-ngit he Song-chú — ngì-têu Song-ti ke sṳn-ngit, ngì-têu m̀-hó pî-sông kieu-chṳ̂.
[10] Thai-kâ chón vuk-hâ hi chún-phi yèn-si̍t! Chiông ngì-têu ke sṳ̍t-vu̍t lâu chiú pûn-pûn mò nèn-li̍t yi-phi ke ngìn. Kîm-pû-ngit he ngài-têu ke Chú ke sṳn-ngit; ngì-têu m̀-hó yù-sèu, yîn-vi Song-chú ke hí-lo̍k chhiu-he ngì-têu ke li̍t-liong.”
[11] Li-vi-ngìn chhai mìn-chung tông-chûng ôn-ví kì-têu, ham kì-têu tiâm-tiâm, m̀-hó pî-sông, yîn-vi liá-ngit he sṳn-ngit.
[12] Mìn-chung chhiu chón vuk-hâ hi, khoai-lo̍k lîm-sṳ̍t, yu lâu phe̍t-ngìn fûn-hióng chhṳ-kâ yû ke, yîn-vi thu̍k pûn kì-têu thâng ke fap-li̍t, kì-têu yû thâng ngi̍p-ngí.
[13] Thi-ngi ngit, tak chûng-chhu̍k ke chhu̍k-chóng, chi-sṳ̂ lâu Li-vi-ngìn, khiung-ha hi kîn-ho̍k chôn-kâ Yî-sṳ̂-lâ ke-vi ngiên-kiu fap-li̍t ke kau-hiun.
[14] Kì-têu fat-hien, Song-chú thûng-ko Mô-sî su-hâ liá fap-li̍t, sṳt min-lin Yî-set-lie̍t-ngìn chhai thi chhit-ngie̍t Tap Liàu-è Chiet ke sṳ̀, oi he̍t chhai lìm-sṳ̀ tap ke liàu-è tú.
[15] Só-yî, kì-têu hiong chhiòn Yâ-lu-sat-lâng lâu khì-thâ ke sàng-chṳ́n fat-chhut thûng-tî: “Ngì-têu oi chhut-hi, to sân-táng to̍k kám-lám-su, chhiùng-su, sa̍k-liù-su, chûng-su lâu khì-thâ su-é ke su-khoá, cheu Fap-li̍t-sû ke chṳ́-sṳ tap liàu-è.”
[16] Mìn-chung chhiu chhut-hi, to̍k lòi chhin-tô su-khoá, tap liàu-è chhai kì-têu ke vuk táng-hong, chhai kì-têu ke thìn-yen tú, chhai Song-ti sṳn-thien ke thìn-yen tú, chhai Súi-mùn lâu Yî-fap-lièn-mùn chhièn ke kóng-chhòng.
[17] Só-yû liù-mòng chón-lòi ke ngìn chhiòn-phu tap liàu-è, he̍t chhai tî-poi. Tui Nun ke lai-é Yok-sû-â ke sṳ̀-thoi yî-lòi, liá he Yî-set-lie̍t-ngìn thi-yit pái án-ngiòng cho. Tak-sà chhiu tông fôn-hí khoai-lo̍k.
[18] Tui chiet-khì ke thi-yit ngit to chhin-mî yit-ngit, Yî-sṳ̂-lâ tak-ngit thu̍k yit-thon Song-ti ke Fap-li̍t-sû pûn kì-têu thâng. Kì-têu sú-chiet chhit-ngit, to thi-pat ngit, chhiu cheu fap-li̍t ke kûi-thin kí-hàng pit-fi tién-lî.