[1] Chhâm-pâ-lâ thâng-tó ngài-têu Yù-thai-ngìn yí-kîn khôi-sṳ́ siû-cháng sàng-chhiòng, chhiu thai fat-khién, yu chhṳ́-seu ngài-têu.
[2] Kì chhai thùng-phân lâu Sat-mâ-li-â kiûn-chhui mien-chhièn kóng: “Liá-têu ngiôn-ngio̍k ke Yù-thai-ngìn chhai cho-má-ke nè? Kì-têu sióng-oi chhùng-sîn hí liá-sàng he-mò? Kì-têu láu-tó thûng-ko hien-chi chhiu nèn chhai yit-ngit chṳ̂-nui vàn-kûng he-mò? Kì-têu sióng tui sêu-ko ke ngá-sak-tôi chhìm sa̍k-thèu lòi hí sàng-chhiòng he-mò!”
[3] Â-mùn-ngìn Tô-pí-ngâ khî chhai kì ke sùn-thèu, ya thèn-tén kóng: “Kì-têu nèn hí chhiong-yong ke sa̍k-chhiòng mò? Kiâng-pha yit-chak fù-lì sông-hi chhiu vang-thet!”
[4] Ngài khì-tó kóng: “Ngài-têu ke Song-ti â, thâng kì-têu chhai seu ngài-têu! Khiù Ngì pûn kì-têu ke chhṳ́-seu kûi chhai chhṳ-kâ ke thèu-nà táng, kì-têu ke chhòi-sán pûn-ngìn chhióng-chéu, kì-têu pûn-ngìn chok-tó ngoi-koet hi!
[5] Khiù Ngì m̀-hó sa-miên kì-têu só-cho ke fái-sṳ, mo̍k m̀ ki-tet kì-têu ke chhui-ok, yîn-vi kì-têu chhai ngài liá-têu siû-kien ke ngìn mien-chhièn ngiâ Ngì fat-khién.”
[6] Án-ngiòng ngài-têu ki-siu̍k chhùng-kien sàng-chhiòng, mò kí-kiú chhiu hí-to yit-pan án-kô, yîn-vi ngìn-mìn chhiòn-phu ngie̍t-sîm kûng-chok.
[7] Chhâm-pâ-lâ lâu Tô-pí-ngâ, pin Â-lâ-pak, Â-mùn, Â-sṳ̍t-thut ke ngìn-mìn, thâng-tó ngài-têu chhùng-kien Yâ-lu-sat-lâng ke sàng-chhiòng, kûng-chok chin-hàng tông-kiak, sàng-chhiòng ke khiet-héu chhiòn-phu voi siû-pú hó, chhiu chhin mò fôn-hí.
[8] Kì-têu khiung-ha yîm-mèu, oi lòi kûng-kit Yâ-lu-sat-lâng, chṳ-chho fun-lon.
[9] Chúng-he ngài-têu hiong ngài-têu ke Song-ti khì-tó, phai-ngìn ngit-ya khon-sú, fòng-phi kì-têu.
[10] Yù-thai-ngìn yû yit-sú kô kóng: Kûng-ngìn kín-lòi kín mò-li̍t; ngá-sak tô-to pân m̀-thet! Sàng-chhiòng ngióng-voi hí-tet-vàn?
[11] Thi̍t-ngìn sióng-oi thêu-thêu-é am-sat ngài-têu, chú-tóng ngài-têu ke kûng-chok.
[12] Chúng-he, he̍t chhai thi̍t-ngìn fu-khiun ke Yù-thai-ngìn chó chhiu yit-pái yu yit-pái lòi kín-ko ngài-têu, kóng-hí thi̍t-ngìn ke yîm-mèu.
[13] Só-yî ngài ham mìn-chung tai tô-é, chhiông, kiûng-chien, yung chûng-chhu̍k cho tân-vi, phai kì-têu chhai màng siû-hó ke sàng-chhiòng chhin-ái ke só-chhai sú-ví.
[14] Ngài sùn-chhà chón-lòi heu, chhiu tui mìn-chung lâu kì-têu ke liâng-chhiu, kôn-chóng kóng: “M̀-sṳ́ kiâng thi̍t-ngìn! Oi ki-tet Chú he chṳ-thai yu chhṳ̍t-tet kin-vi ke. Oi vi ngì-têu ke thùng-pâu, ngì-têu ke pû-ngiòng, ngì-têu ke chṳ́-ńg, lâu ngì-têu ke kâ-yèn piang-miang.”
[15] Thi̍t-ngìn thâng-tó ngài-têu yí-kîn tî kì-têu ke yîm-mèu, khon-chhut Song-ti yí-kîn pho-fái kì-têu ke kie-mèu. Só-yî ngài-têu thai-kâ yu chón-to sàng-chhiòng ke-vi, tak-sà ki-siu̍k kûng-chok.
[16] Ke-ngit khôi-sṳ́, ngài ke sú-hâ yit-pan ke ngìn kûng-chok; yit-pan ke ngìn sú-ví, nâ-tén chhiông, tún-phài, kiûng-chien, chok-tén chan-kap. Ke-têu liâng-chhiu chhiòn-li̍t chṳ̂-chhṳ̀ Yù-thai tak-ke kâ-chhu̍k.
[17] Hí sàng-chhiòng ke kûng-ngìn, tak-sà yêu-sṳ̂n kiê-tén tô-é, lièn pân-yun kien-chuk chhòi-liau ke ngìn ya yit-sú kûng-chok, yit-sú nâ-tén vú-hi. Phùn yòng-kok ke ngìn khî chhai ngài sùn-thèu.
[19] Ngài tui mìn-chung, kôn-chóng lâu liâng-chhiu kóng: “Liá kûng-chhàng tông-thai, fûn-san tông-fat, ngài-têu tak-sà chhai sàng-chhiòng táng ya lì tông-yén.
[20] Ngì-têu yit thâng-tó yòng-kok, oi ngiàm-sṳ̀ si̍p-ha̍p to ngài liá-vi lòi. Ngài-têu ke Song-ti yit-thin voi vi ngài-têu siông-chhṳ̀!”
[21] Só-yî, tak-ngit tui thiên-kông to sên-é chhut-hien, ngài-têu yû yit-pan ke ngìn chhai sàng-chhiòng táng kûng-chok, yit-pan ke ngìn nâ-tén vú-hi sú-ví.
[22] Ke-sṳ̀, ngài yu tui mìn-chung kóng: “Tak-sà lâu kì ke chhu-sú chhiòn-phu oi chhai Yâ-lu-sat-lâng ko-ya; án-ngiòng, kì-têu am-pû-thèu pó-fu ngài-têu, ngit-sṳ̀-thèu kûng-chok.”
[23] Ngài am-pû hiet-khun ke sṳ̀ mò thot-sâm; ngài ke thùng-phân, phu̍k-ngìn, lâu ví-pîn ya mò yit-sà ngìn thot-sâm. Sà-sà sùi-sṳ̀ nâ-tén vú-hi, lièn chhut-hi tá-súi ya he án-ngiòng.