[1] Chhâm-pâ-lâ, Tô-pí-ngâ, Â-lâ-pak-ngìn Kî-san, lâu ngài-têu khì-thâ sù-thi̍t thâng-tó ngài yí-kîn cháng-hó sàng-chhiòng, chhiòn mò khiet-héu (khì-sṳ̍t ngài hàn-màng chhai ngi̍p-héu ôn sàng-mùn).
[2] Só-yî Chhâm-pâ-lâ lâu Kî-san phai-ngìn sung sin-é pûn ngài, kien-ngi ngài chhai Â-nò phìn-ngièn ke yit-ke chhûn-chông lâu kì-têu kien-mien. Liá he kì-têu ke kie-mèu, sióng-oi hoi ngài.
[3] Ngài phai-ngìn hi lâu kì-têu kóng: “Ngài liá-ha chin-hàng chhung-yeu ke kûng-chok, mò phan-fap hi. Ngài ngióng-voi hi khon ngì-têu lòi sṳ́ kûng-chok thìn-thò nò?”
[4] Kì-têu si-pái pûn ngài khiung-yong ke kûng-vùn, tak-pái ngài chhiòn-phu yung khiung-yong ke fa en kì-têu.
[5] Heu-lòi, Chhâm-pâ-lâ phai kì ke phu̍k-ngìn tai-pûn ngài thi-ńg fûng kûng-vùn; liá he yit-fûng mò fûng-héu ke sin-é.
[6] Sin-é kóng: “Kî-san lâu ngài kóng, fu-khiun ngìn-mìn chhòn án-ngiòng ke fûng-sâng, kóng ngì lâu Yù-thai-ngìn sióng-oi chho-fán, só-yî ngì chang voi chhùng-kien sàng-chhiòng. Kì hàn kóng, ngì chhṳ-kâ sióng-oi cho vòng,
[7] yí-kîn ôn-phài siên-tî chhai Yâ-lu-sat-lâng oi siên-ko ngì he Yù-thai ke vòng. Fòng-ti yit-thin voi thâng-tó liá-sṳ. Só-yî, ngài kien-ngi ngì lòi lâu ngài kien-mien, thai-kâ lòi fu-siông chhâm-siòng.”
[8] Ngài chhiu fì-fu̍k kì kóng: “Ngì só-kóng ke chhiòn-phu mò-yáng, he ngì chhṳ-kâ chho-fa chhut-lòi ke.”
[9] Kì-têu sióng-oi hak ngài-têu, sṳ́ ngài-têu sú-ngiôn lòi thìn-kûng. Ngài khì-tó kóng: “Song-ti â, khiù Ngì sṳ́ ngài ke sú kiên-khiòng!”
[10] Liá-sṳ̀, ngài hi kien Sṳ-mâ-ngâ. Kì he Mí-hî-thai-phe̍t ke sûn-é, Thi-lòi-ngâ ke lai-é; kì cho-m̀-tet lì-khôi vuk-hâ. Kì tui ngài kóng: “Ên-têu yit-thin oi hi khong chhai Song-ti sṳn-thien ke sṳn-só, mùn chhôn-hó, yîn-vi yû-ngìn oi lòi chhṳ̀ ngì, kì-têu voi chhai am-pû-thèu lòi chhṳ̀ ngì.”
[11] Ngài en-kóng: “Ngài m̀-he ke-chúng chéu-hi khong ke ngìn! Ngì láu-tó ngài liá-chúng ngìn voi hi khong chhai sṳn-thien, pó-liù chhṳ-kâ ke miang he-mò? Ngài m̀-hi!”
[12] Ngài chiông liá-sṳ ngin-chṳ̂n lòi sióng, khon-chhut Song-ti pin mò phai Sṳ-mâ-ngâ lòi kín-ko ngài, kì he pûn Tô-pí-ngâ lâu Chhâm-pâ-lâ sû-mâi ke.
[13] Kì-têu sû-mâi kì lòi hak ngài, oi hoi ngài fam-chhui; án-ngiòng, kì-têu chhiu nèn fí-pong ngài, vú-yu̍k ngài.
[14] Ngài khì-tó kóng: “Ngài ke Song-ti â, khiù Ngì ki-tet Tô-pí-ngâ lâu Chhâm-pâ-lâ só-cho ke sṳ lòi hìn-fa̍t kì-têu. Khiù ngì ya ki-tet ńg siên-tî Nò-â-tí lâu khì-thâ sióng-oi hak ngài ke siên-tî.”
[15] Kîn-ko ńg-sṳ̍p ngi-ngit ke kûng-chok, sàng-chhiòng chhai Yî-luk-ngie̍t ngi-sṳ̍p ńg-ngit chhiòn-phu vàn-kûng.
[16] Ngài-têu lìn-koet ke-têu thi̍t-ngìn thâng-tó chhiòn-phu ngong chhiang-chhiang, yîn-vi kì-têu khon-chhut liá kûng-chhàng ke vàn-sṳ̀n he yîn-vi ngài-têu Song-ti ke pông-chhu.
[17] Chhai ke-chham sṳ̀-kiên, Yù-thai-ngìn ke-têu liâng-chhiu sòng-sòng lâu Tô-pí-ngâ thûng-sin.
[18] Chhin-tô Yù-thai ke ngìn-mìn ya khî chhai Tô-pí-ngâ ke-phién, yîn-vi kì he Â-lâ ke lai-é Sṳ-kâ-nì ke se-lòng, kì ke lai-é Yok-ha̍p-nàn thó Pí-li-kâ ke lai-é Mí-sû-làn ke moi-é.
[19] Ngìn-mìn sòng-sòng chhai ngài mien-chhièn kóng-hí Tô-pí-ngâ ke hó hàng-vì, ya chiông ngài só-kóng ke fa chhòn-pûn kì. Thùng-sṳ̀, Tô-pí-ngâ ya sòng-sòng siá sin-é hak ngài.