[1] Song-chú fûn-fu Mô-sî
[2] lâu Yî-set-lie̍t-ngìn kóng: “Ngài he Song-chú — ngì-têu ke Song-ti.
[3] Ngì-têu he̍t-ko Âi-khi̍p, chúng-he ngì-têu cho-m̀-tet ho̍k ke thi-fông ke fûng-siu̍k. Ngài oi thu ngì-têu ngi̍p Kâ-nàm-thi, chúng-he ngì-têu ya cho-m̀-tet ho̍k ke thi-fông ke fûng-siu̍k. Cho-m̀-tet thèn kì-têu ke fái kûi-kí.
[4] Ngì-têu oi chûn-sú Ngài ke fap-li̍t, sṳ̍t-hàng Ngài ke min-lin. Ngài he Song-chú — ngì-têu ke Song-ti.
[5] Ngì-têu oi chûn-sú Ngài ke fap-li̍t lâu min-lin; án-ngiòng, ngì-têu chhiu nèn tet-tó sâng-miang. Ngài he Song-chú.
[6] “Mò-lun má-ngìn chhiòn-phu cho-m̀-tet lâu kut-ngiuk chṳ̂-chhîn lon-lùn. Ngài he Song-chú.
[7] “Cho-m̀-tet lâu chhṳ-kâ ke â-mê lon-lùn, siû-yu̍k â-pâ; cho-m̀-tet vú-yu̍k chhṳ-kâ ke â-mê.
[8] “Cho-m̀-tet lâu â-pâ khì-thâ ke pû-ngiòng lon-lùn, siû-yu̍k â-pâ.
[9] “Cho-m̀-tet lâu chhṳ-kâ ke chhîn chí-moi, mò khiung â-mê ya-he mò khiung â-pâ ke chí-moi lon-lùn; put-kón kì he m̀-he chhiùng-se lâu ngì chhai vuk-hâ khiung-ha sên-fa̍t to-thai.
[10] “Cho-m̀-tet lâu chhṳ-kâ ke sûn-ńg ya-he ngoi sûn-ńg lon-lùn, liá he siû-yu̍k ngì chhṳ-kâ.
[11] “Cho-m̀-tet lâu mò khiung â-mê ke chí-moi lon-lùn, yîn-vi kì ya he ngì ke chí-moi.
[12] “Cho-m̀-tet lâu chhṳ-kâ ke â-kû
[13] ya-he â-yì lon-lùn.
[14] “Cho-m̀-tet lâu chhṳ-kâ ke pak-mê ya-he suk-mê lon-lùn, siû-yu̍k â-pak ya-he â-suk.
[15] “Cho-m̀-tet lâu chhṳ-kâ ke sîm-khiû lon-lùn, kì he ngiâ lai-é ke pû-ngiòng.
[16] Cho-m̀-tet lâu chhṳ-kâ ke â-só ya-he ló-thâi sîm-khiû lon-lùn, siû-yu̍k ngiâ hiûng-thi.
[17] “Sṳt lâu ngì yû sin koân-he ke fu-ngìn-kâ, ngì cho-m̀-tet lâu kiâ moi-é, sûn-ńg ya-he ngoi sûn-ńg yû sin koân-he; kì-têu he kiâ kut-ngiuk chṳ̂-chhîn, án-ngiòng cho he chhin chit-ok.
[18] “Ngiâ pû-ngiòng hàn-chhôi, cho-m̀-tet thó kiâ chí-moi lâu kì cho tui-thèu, siû-yu̍k kì.
[19] “Cho-m̀-tet lâu kîn-khì nui ke ńg-ngìn yû sin koân-he, yîn-vi kì he mò chhiang-li ke.
[20] “Cho-m̀-tet lâu phe̍t-ngìn ke pû-ngiòng sṳ̂-thûng, siû-yu̍k ngì chhṳ-kâ.
[21] “Cho-m̀-tet chiông chhṳ-kâ ke chṳ́-ńg chún-cho chi-vu̍t sêu-hien pûn sià-sṳ̀n Mô-lo̍k, yîn-vi án-ngiòng he vú-yu̍k ngì ke Song-ti. Ngài he Song-chú.
[22] “Nàm-ngìn cho-m̀-tet lâu nàm-ngìn yû sin koân-he, chhiong lâu ńg-ngìn yû sin koân-he yit-yong; liá he chit-ok ke sṳ.
[23] “Mò-lun nàm-ńg chhiòn-phu cho-m̀-tet lâu chhu-lui yû sin koân-he; yîn-vi liá he vì-poi thiên-sin ke hàng-vì, he siû-yu̍k chhṳ-kâ.
[24] “Ngì-têu cho-m̀-tet fam yî-song só-lie̍t ke só-yû hàng-vì lòi siû-yu̍k chhṳ-kâ, yîn-vi Ngài oi tui ngì-têu mien-chhièn kiuk-chéu ke ke-têu ngoi-chhu̍k ngìn, chhiu-he yîn-vi cho liá-têu sṳ lòi siû-yu̍k chhṳ-kâ.
[25] Kì-têu ke phai-fái tá-lá-sap ke thú-thi, só-yî Ngài chit-fa̍t ke thú-thi, sṳ́ thú-thi phi-chhut kì ke chhu-mìn.
[26] Kì-têu cho liá yit-chhiet chit-ok ke sṳ, tá-lá-sap thú-thi,
[27] chúng-he ngì-têu cho-m̀-tet fam khiung-yong ke chhui. Ngì-têu mò-lun he Yî-set-lie̍t-ngìn ya-he chhiam-he̍t ke lî-hak, yit-thin oi chûn-hàng Ngài ke fap-li̍t lâu min-lin,
[28] miên-tet ngì-têu tá-lá-sap ke thú-thi, ke-thi chhiu chiông ngì-têu phi chhut-hi, chhiong phi-chhut chhai ngì-têu yî-chhièn ke kok mìn-chhu̍k yit-yong.
[29] “Mò-lun má-ngìn cho liá-têu chit-ok ke sṳ, má-ngìn chhiu-oi tui chhṳ-kâ ke chṳ́-mìn chûng chhù-miàng.
[30] Ngì-têu oi sun-chhiùng Ngài só siên-pu ke min-lin; cho-m̀-tet ho̍k chhai ngì-têu yî-chhièn he̍t ke ngìn ke fái fûng-siu̍k, miên-tet ngì-têu cho chit-ok ke sṳ lòi siû-yu̍k chhṳ-kâ. Ngài he Song-chú — ngì-têu ke Song-ti.”