[1] Song-chú fûn-fu Mô-sî oi lâu cho chi-sṳ̂ ke, chhiu-he Â-lùn ke chṳ́-sûn kóng:
[2] “Chhù-liáu chhâm-kâ chhṳ-kâ ke yà-ôi, chṳ́-ńg, hiûng-thi,
[3] ya-he màng chhut-ka ke chhîn chí-moi ke chong-lî ngoi, chi-sṳ̂ cho-m̀-tet chhâm-kâ chûng-chhu̍k ke chong-lî lòi tá-lá-sap chhṳ-kâ.
[4] Kì ya cho-m̀-tet chhâm-kâ yîn-chhîn ke chong-lî lòi tá-lá-sap chhṳ-kâ.
[5] “Chi-sṳ̂ cho-m̀-tet thi kông-thèu, cho-m̀-tet thi-thet fù-sî ke chû-vì, ya cho-m̀-tet kot chhṳ-kâ ke sṳ̂n-thí lòi péu-sṳ ôi-sông.
[6] Kì yit-thin oi sṳn-kiet, oi kûi-su̍k Song-ti, cho-m̀-tet vú-yu̍k Song-ti ke sṳn-miàng; yîn-vi kì hiong Ngài — Song-chú hien fó-chi, chhiu-he pûn Song-ti ke sṳ̍t-vu̍t, só-yî kì yit-thin oi sṳn-kiet.
[7] Chi-sṳ̂ cho-m̀-tet lâu kî-ńg, m̀-he ngìn-kâ-ńg, ya-he lì-fûn ke fu-ngìn-kâ kiet-fûn, yîn-vi kì he fûn-phe̍t vì-sṳn kûi-pûn Song-ti ke.
[8] Ngìn-mìn yit-thin oi khon chi-sṳ̂ cho sṳn-kiet ke, yîn-vi kì hiong Song-ti hien sṳ̍t-vu̍t cho-chi. Ngài he Song-chú; Ngài he sṳn-kiet ke; Ngài sṳ́ Ngài ke chṳ́-mìn sàng-cho sṳn-kiet.
[9] Na-yû chi-sṳ̂ ke moi-é hi cho kî-ńg, tá-lá-sap chhṳ-kâ, kì he vú-yu̍k chhṳ-kâ ke â-pâ, yit-thin oi yung-fó sêu-sí kì.
[10] “Chhai hiûng-thi chûng cho thai-chi-sṳ̂, thèu-nà pûn sṳn-yù kò-ko, yu chiap-su sṳn-chṳt, chok chi-sṳ̂ sṳn-fu̍k, cho-m̀-tet chhai ôi-sông khì-kiên thèu-nà-mô nùng-nùng, ya-he chhá-lan sâm-fu.
[11] Kì cho-m̀-tet lì-khôi sṳn-só, chin-ngi̍p sông-kâ; chhiu-son he chhṳ-kâ ke yà-ôi sí-thet ya cho-m̀-tet, miên-tet vú-yu̍k chhṳ-kâ lâu Ngài ke sṳn-só, yîn-vi kì yí-kîn fung-hien pûn Ngài — Song-chú lé.
[13] Kì yit-thin oi thó ngìn-kâ-ńg cho pû-ngiòng,
[14] cho-m̀-tet lâu koá-fu, lì-fûn ke fu-ngìn-kâ, ya-he kî-ńg kiet-fûn, tân-chhiang cho-tet lâu pún-chhu̍k ke ngìn-kâ-ńg kiet-fûn;
[15] án-ngiòng, kì m̀ voi sṳ́ chhṳ-kâ ke chṳ́-ńg sàng-cho mò chhiang-li ke. Ngài he Song-chú; Ngài sṳ́ kì sàng-cho sṳn-kiet.”
[16] Song-chú fûn-fu Mô-sî hi lâu Â-lùn kóng:
[17] “Ngì ke heu-thoi chûng, só-yû sṳ̂n-thí yû khiet-tiám ke ngìn cho-m̀-tet hiong Song-ti hien sṳ̍t-vu̍t cho-chi; liá he sṳ-sṳ thoi-thoi yin-kôi chûn-sú ke thiàu-li.
[18] Na-he sṳ̂n-thí yû khiet-tiám ke, mò-lun he mô-muk ke, khiò-kiok ke, ńg-kôn mò-chang ke, khì-hìn ke,
[19] sú-kiok pho-siong ke,
[20] kû-poi ke, ái-se ke, muk-chû yû mô-phiang ke, yû phì-fû-phiang ke, ya-he yâm-thet ke ngìn, chhiòn-phu cho-m̀-tet hiong Ngài hien-chi.
[21] Chi-sṳ̂ Â-lùn ke heu-thoi, só-yû sṳ̂n-thí yû khiet-tiám ke, chhiòn-phu cho-m̀-tet hiong Ngài hien fó-chi, yîn-vi yû khiet-tiám ke ngìn cho-m̀-tet hiong Song-ti hien sṳ̍t-vu̍t cho-chi.
[22] Án-ngiòng ke ngìn cho-tet sṳ̍t hien-pûn Song-ti ke sṳ̍t-vu̍t, mò-lun sṳn ke ya-he chṳ-sṳn ke chhiòn-phu cho-tet sṳ̍t.
[23] Chúng-he, yîn-vi kì ke sṳ̂n-thí yû khiet-tiám, kì cho-m̀-tet chiap-khiun chṳ-sṳn-só thèu-chhièn ke chong-man, ya cho-m̀-tet chiap-khiun chi-thàn. Kì cho-m̀-tet tá-lá-sap Ngài sṳn-só chûng ke sṳn-vu̍t. Ngài he sṳ́ liá-têu tûng-sî fûn-phe̍t vì-sṳn ke Song-chú.”
[24] Yî-song he Mô-sî tui Â-lùn, kì ke-têu lai-é, pin Yî-set-lie̍t chhiòn ngìn-mìn kóng ke fa.