[1] Song-chú hiong Mô-sî siên-pu yî-ha ke thiàu-li.
[2] Na-he yû-ngìn m̀-hén vàn Yî-set-lie̍t thùng-pâu só-fu ke thin-chhièn ya-he pó-chṳn-kîm, ya-he thêu-nâ phe̍t-ngìn ke tûng-sî, ya-he pok-siok phe̍t-ngìn,
[3] ya-he phien-ngìn kóng tûng-sî tiet-thet, ya-he fat ká-sṳ m̀ sṳ̀n-ngin yû ngiâm-tó phe̍t-ngìn tiet-thet ke tûng-sî, án-ngiòng lòi tet-chhui Song-chú, kì yit-thin oi hien su̍k-ko-sṳt-chi.
[4] Na-he kì fam yî-song só-lie̍t ke chhui, kì yit-thin oi-vàn kì yung m̀ sṳ̀n-sṳ̍t ke fông-fap tet-tó ke tûng-sî; mò-lun he thêu ke, he pok-siok ke, he thin-chhièn, he ngiâm-tó ke,
[5] ya-he fat ká-sṳ tet-lòi ke tûng-sî, chhai chhà-chhut kì yû-chhui ke-ngit, kì chhiòn-phu oi vàn-pûn ngièn-lòi ke chú-ngìn, hàn-oi kâ pak-fûn chṳ̂ ngi-sṳ̍p.
[6] Vi-tó vàn só-fam ke chhui, kì yit-thin oi khiên yit-chak mò khiet-tiám ke mièn-yòng-kú to chi-sṳ̂ ke-vi, cho su̍k-ko-sṳt-chi pûn Song-chú. Yòng ke ka-chhṳ̍t oi cheu sṳn-só ke phêu-chún lòi kiet-thin.
[7] Chi-sṳ̂ oi chhai Song-chú mien-chhièn vi kì hàng su̍k-chhui-lî, kì só-fam ke yit-chhiet ko-sṳt chhiu tet-tó sa-miên.
[8] Song-chú min-lin Mô-sî
[9] hiong Â-lùn lâu kì ke-têu lai-é siên-pu sêu-fa-chi ke thiàu-li. Sêu-fa-chi oi piong chhai chi-thàn táng, lièn am-pû-thèu ya oi theu-ya pûn kì chho̍k, yit-chhṳ̍t to thiên-kông.
[10] Ke-sṳ̀, chi-sṳ̂ oi chok mà-sâ ke chhòng-sâm lâu fu, chiông chi-thàn táng sêu-fa-chi ke fôi sû hí-lòi, piong chhai chi-thàn sùn.
[11] Chiap-tén, kì oi von sâm-fu, chiông fôi tai-to yàng-ngoi lî-ngì song ngin-thin chhiang-li ke thi-fông.
[12] Chi-thàn táng ke fó oi yit-chhṳ̍t pûn kì sêu-tén, cho-m̀-tet vû-thet. Tak-ngit chêu-sṳ̀n, chi-sṳ̂ oi chhai chi-thàn táng-kô piong kâ-têu chhèu, chiông sêu-fa-chi phài-lie̍t chhai táng-kô, ya oi sêu phìn-ôn-chi ke yù.
[13] Chi-thàn táng ke fó oi ngit-ya yit-chhṳ̍t pûn kì chho̍k, cho-m̀-tet vû-thet.
[14] Yî-ha he su-chi ke thiàu-li. Â-lùn ke chṳ́-sûn oi chhai chi-thàn chhièn hiong Song-chú hien su-chi.
[15] Chi-sṳ̂ oi yá yit-kha̍k yu-mien-fún, kám-lám-yù, lâu su-chi song só-yû ke nen-hiông piong chhai chi-thàn táng lòi sêu, thoi-péu hien chhiòn-phu pûn Song-chú cho chhîn-hiông ke su-chi.
[16] Â-lùn lâu kì ke chṳ́-sûn oi sṳ̍t chhûn hâ-lòi ke chi-vu̍t. Liá-têu chi-vu̍t oi cho vù-kau-piáng, chhai sṳn-só, chhiu-he chhai sṳn-chong-phùng chhièn ke thìn-yen sṳ̍t.
[17] Yung fó sêu ke chi-vu̍t tông-chûng, Song-chú yí-kîn chiông liá phu-fun su-pûn chi-sṳ̂; liá thùng su̍k-chhui-chi lâu su̍k-ko-sṳt-chi khiung-yong he chṳ-sṳn ke.
[18] Â-lùn heu-thoi ke nàm-ngìn chhiòn-phu cho-tet sṳ̍t liá yung fó-sêu ke chi-vu̍t, he kì-têu sṳ-sṳ thoi-thoi yin-tông tet ke phu-fun. Khì-thâ ke ngìn ya-he má-ke tûng-sî pen-tó liá-têu sṳn-vu̍t, chhiu voi fûn-phe̍t vì-sṳn.
[19] Song-chú hiong Mô-sî siên-pu
[20] yû-koân sat-li̍p Â-lùn lâu kì ke chṳ́-sûn cho chi-sṳ̂ ke thiàu-li. Chi-sṳ̂ su sat-li̍p ke-ngit, kì oi hiong Song-chú hien yit kûng-kîn yu-mien-fún (lâu tak-ngit hien ke su-chi phiàng-tô), chêu-sṳ̀n-thèu lâu am-pû-thèu kok hien yit-pan.
[21] Mien-fún oi kiâu-yù, piong chhai chhién vo̍k-thèu lòi pet, yèn-heu chiông kì pak-sui, hien-pûn Song-chú cho chhîn-hiông ke su-chi.
[22] Â-lùn-chhu̍k ke chi-sṳ̂ sṳ̀n-chiap cho thai-chi-sṳ̂ ke, mî-yit thoi chhiòn-phu oi hien liá-chúng chi. Liá-chúng chi-vu̍t oi chhiòn-phu sêu hien-pûn Song-chú.
[23] Chi-sṳ̂ cho ke su-chi yit-thin oi chhiòn-phu sêu-thet, cho-m̀-tet sṳ̍t.
[24] Song-chú fûn-fu Mô-sî
[25] chiông su̍k-chhui-chi ke thiàu-li siên-pu pûn Â-lùn lâu kì ke chṳ́-sûn. Oi chhai Song-chú mien-chhièn, chi-thàn pet-phién chhṳ̀ sêu-fa-chi thèu-sâng ke thi-fông, chhṳ̀ su̍k-chhui-chi ke thèu-sâng. Liá sên-ngì he chṳ-sṳn ke.
[26] Hien su̍k-chhui-chi ke chi-sṳ̂ oi chhai sṳn ke só-chhai, chhiu-he sṳn-chong-phùng ke thìn-yen tî-poi, sṳ̍t liá hien-chi ke sên-ngì.
[27] Khì-thâ ke ngìn ya-he má-ke tûng-sî pen-tó liá chi-ngiuk, chhiòn-phu voi fûn-phe̍t vì-sṳn. Yung pu-liau cho ke só-yû ke tûng-sî, na-he kò-tó liá sên-ngì ke hiet, yit-thin oi chhai sṳn ke só-chhai sé-chhiang.
[28] Chú liá-chúng chi-ngiuk fì ke vo̍k-thèu yit-thin oi tá-sui; na-he chú chhai thùng vo̍k-thèu tú, oi siên chhu̍t-chhiang, chang yung súi sé.
[29] Chi-sṳ̂ kâ-su̍k chûng ke só-yû nàm-ngìn chhiòn-phu cho-tet sṳ̍t liá-chúng chi-ngiuk; liá he chṳ-sṳn ke.
[30] Chúng-he, sên-ngì ke hiet na pûn-ngìn tai-ngi̍p sṳn-chong-phùng, vi-tó oi chhai sṳn-só hàng su̍k-chhui ke lî-ngì, liá sên-ngì ke ngiuk chhiu cho-m̀-tet sṳ̍t, yit-thin oi sêu-thet.