[1] Song-chú fûn-fu Mô-sî
[2] hiong Yî-set-lie̍t-ngìn siên-pu yî-ha ke thiàu-li. Fu-ngìn-kâ na kiung lai-é, sán-heu ke chhit-ngit, kì chhai lî-ngì song he mò chhiang-li ke, lâu ngie̍t-kîn khì-kiên khiung-yong mò chhiang-li.
[3] Thi-pat ngit se-lai-é yit-thin oi su kot-lî.
[4] Ke fu-ngìn-kâ oi chai tén sâm-sṳ̍p sâm-ngit, to sán-hiet thìn chang chhiang-li. Chhai liá-chham khì-kiên, chhai vàn-sṳ̀n kiet-chhiang-lî yî-chhièn, kì cho-m̀-tet miâ só-yû ke sṳn-vu̍t, ya cho-m̀-tet chin-ngi̍p sṳn-só.
[5] Fu-ngìn-kâ na kiung moi-é, sán-heu ke sṳ̍p-si ngit, kì chhai lî-ngì song he mò chhiang-li ke, lâu ngie̍t-kîn khì-kiên khiung-yong mò chhiang-li. Kì oi chai tén liuk-sṳ̍p liuk-ngit, to sán-hiet thìn chang chhiang-li.
[6] Fu-ngìn-kâ kiet-chhiang ke ngit khì-mân yî-heu, mò-lun kiung lai-é kiung moi-é, kì oi khiên yit-chak yit-se thai ke se yòng-è cho sêu-fa-chi, yu oi tai yit-chak pân-kiêu ya-he ngie̍t-kap-è cho su̍k-chhui-chi, to Song-chú ke sṳn-chong-phùng mùn-héu kâu-pûn chi-sṳ̂.
[7] Chi-sṳ̂ oi vi kì hiong Song-chú hien-chi, vi kì kí-hàng kiet-chhiang-lî. Án-ngiòng, kì chhai lî-ngì song chhiu chhiang-li lé. Liá he fu-ngìn-kâ kiung lai-é ya-he moi-é ke thiàu-li.
[8] Fu-ngìn-kâ na mâi m̀-hí yit-chak se yòng-è, kì cho-tet von-cho lióng-chak ngie̍t-kap-è ya-he lióng-chak pân-kiêu, yit-chak cho sêu-fa-chi, nang-ngoi yit-chak cho su̍k-chhui-chi. Chi-sṳ̂ oi vi kì hàng kiet-chhiang-lî. Án-ngiòng, kì chhai lî-ngì song chhiu chhiang-li lé.