[1] Â-lùn ke lióng-ke lai-é chhîn-khiun Song-chú, sí-thet yî-heu, Song-chú chhiu tui Mô-sî kóng:
[2] “Oi lâu ngiâ-kô Â-lùn kóng, cho-m̀-tet sùi-sṳ̀ sùi-yi chin-ngi̍p chong-man heu-poi ke chṳ-sṳn-só, to yok-khui táng su̍k-chhui ke koi-é mien-chhièn, miên-tet kì sí-thet; yîn-vi Ngài chhai su̍k-chhui ke koi-é táng tui yùn-chûng hién-hien.”
[3] Chiap-tén, Song-chú siên-pu yî-ha ke chṳ́-sṳ. Â-lùn chin-ngi̍p sṳn-só, oi khiên yit-chak se ngiù-kú cho su̍k-chhui-chi, lâu yit-chak mièn-yòng-kú cho sêu-fa-chi.
[4] Kì oi sé-sṳ̂n, yèn-heu chok-hó chi-sṳ̂ lî-fu̍k: chok mà-sâ cho ke sṳn nui-sâm lâu tón-fu, kiê-tén mà-sâ cho ke yêu-tai, yu tai mà-sâ cho ke mo-é.
[5] Yî-set-lie̍t fi-chung oi chiông hien-chi ke thèu-sâng kâu-pûn kì: lióng-chak sân yòng-kú cho su̍k-chhui-chi, yit-chak mièn-yòng-kú cho sêu-fa-chi.
[6] Â-lùn yit-thin oi vi chhṳ-kâ lâu kì ke kâ-su̍k hien ke-chak ngiù-kú cho su̍k-chhui-chi.
[7] Yèn-heu, kì oi khiên ke lióng-chak sân yòng-kú to sṳn-chong-phùng mùn-héu, piong chhai Song-chú mien-chhièn,
[8] vi lióng-chak sân-yòng-kú chhû-chhiâm, yit-chhiâm siá “kûi-pûn Song-chú”, nang-ngoi yit-chhiâm siá “kûi-pûn Â-sat-siet-le̍t”.
[9] Â-lùn oi chiông chhû-tó “kûi-pûn Song-chú” ke sân yòng-kú hien-cho su̍k-chhui-chi,
[10] chiông chhû-tó “kûi-pûn Â-sat-siet-le̍t” ke nang-ngoi yit-chak sân yòng-kú sâng-sâng hien-pûn Song-chú, yèn-heu piong-to khóng-yâ hi kûi-pûn Â-sat-siet-le̍t, vi ngìn-mìn su̍k-chhui.
[11] Â-lùn oi vi chhṳ-kâ lâu kì ke kâ-su̍k hien ke-chak ngiù-kú cho su̍k-chhui-chi; kì chiông liá ngiù-kú chhṳ̀-thet yî-heu,
[12] oi nâ-tén hiông-lù, tui Song-chú mien-chhièn ke chi-thàn táng chông-mân fó-than, pin tai-tén lióng-kha̍k hiông-fún, chin-ngi̍p chong-man heu-poi ke chṳ-sṳn-só.
[13] Kì oi chhai Song-chú mien-chhièn sêu-hiông, sṳ́ yên châ-tén yok-khui táng su̍k-chhui ke koi-é, miên-tet kì sí-thet.
[14] Kì oi nâ-têu ngiù-kú ke hiet, yung sú-chṳ́ vun-hiet, fin chhai su̍k-chhui ke koi-é tûng-phién, yu chhai su̍k-chhui ke koi-é thèu-chhièn fin chhit-pái.
[15] Chiap-tén, kì oi chhṳ̀ sân-yòng-kú, vi ngìn-mìn hien su̍k-chhui-chi. Kì oi chiông yòng-hiet tai-ngi̍p chong-man heu-poi ke chṳ-sṳn-só, fin chhai su̍k-chhui ke koi-é táng lâu koi-é thèu-chhièn, chhiu-chhiong kì fin ngiù-hiet án-ngiòng.
[16] Yîn-vi Yî-set-lie̍t-ngìn ke mò chhiang-li lâu só fam yit-chhiet ke chhui, kì oi yung liá-chúng fông-fap vi chṳ-sṳn-só hàng kiet-chhiang-lî; kì ya oi vi sṳn-chong-phùng hàng kiet-chhiang-lî, yîn-vi sṳn-chong-phùng chhai yàng ke chûng-kiên, yàng chhai lî-ngì song he mò chhiang-li ke.
[17] Tui Â-lùn chin-ngi̍p chṳ-sṳn-só hàng kiet-chhiang-lî to kì chhut-lòi ke liá-chham sṳ̀-kiên, sṳn-chong-phùng tî-poi cho-m̀-tet yû-ngìn. Kì oi vi chhṳ-kâ, kiâ kâ-su̍k, lâu Yî-set-lie̍t chhiòn fi-chung hàng su̍k-chhui-lî.
[18] Yèn-heu kì oi chhut-lòi, oi to Song-chú mien-chhièn ke chi-thàn hien sêu-fa-chi, kiet-chhiang chi-thàn. Kì oi nâ-têu ngiù-kú ke hiet lâu sân-yòng-kú ke hiet, kò chhai chi-thàn ke si-chak kok.
[19] Kì yit-thin oi yung sú-chṳ́ vun-hiet, chhai chi-thàn táng fin chhit-pái. Kì oi yung liá-chúng fông-fap, chhù-thet Yî-set-lie̍t-ngìn ke vû-ve, kiet-chhiang chi-thàn, sṳ́ kì sàng-cho sṳn-kiet.
[20] Â-lùn vi chṳ-sṳn-só, sṳn-chong-phùng, lâu chi-thàn hàng kiet-chhiang-lî yî-heu, chhiu oi chiông “kûi-pûn Â-sat-siet-le̍t” ke-chak sâng ke sân yòng-kú khiên ko-lòi.
[21] Kì oi chiông sûng-sú piong chhai yòng ke thèu-nà táng, sṳ̀n-ngin Yî-set-lie̍t-ngìn yit-chhiet ke chhui-ok lâu ko-fam, chiông liá-têu chhui chhiòn-phu kûi-to yòng ke thèu-táng, yèn-heu phai yit-sà chiông liá-chak yòng sung-to khóng-yâ hi.
[22] Liá-chak yòng chhiu oi tâm-tông kì-têu yit-chhiet ke chhui, chhiòn-phu tai-to mò ngìn he̍t ke thi-fông hi; ke-sà ngìn chhiu oi chiông yòng liù chhai khóng-yâ.
[23] Yèn-heu, Â-lùn oi chin-ngi̍p sṳn-chong-phùng tî-poi, chiông kì ngi̍p chṳ-sṳn-só ke sṳ̀ só-chok ke chi-sṳ̂ lî-fu̍k thot hâ-lòi, piong chhai ke-vi.
[24] Kì oi chhai sṳn ke só-chhai sé-sṳ̂n, chok-hó phien-fu̍k, yèn-heu chhut-lòi vi chhṳ-kâ lâu ngìn-mìn ke chhui hien sêu-fa-chi.
[25] Kì oi chhai chi-thàn táng sêu sên-ngì ke yù cho su̍k-chhui-chi.
[26] Ke chiông sân-yòng-kú sung-to khóng-yâ “kûi-pûn Â-sat-siet-le̍t” ke ngìn, kì yit-thin oi siên sé-chhiang sâm-fu ya oi sé-sṳ̂n chang cho-tet chón-to yàng-tú.
[27] Oi chiông su̍k-chhui-chi ke ngiù-kú lâu sân yòng-kú tai-to yàng-ngoi sêu; phì, ngiuk, chhòng chhiòn-phu oi sêu-thet. Kì-têu ke hiet yí-kîn tai-ngi̍p chṳ-sṳn-só su̍k-chhui lé.
[28] Ke sêu thèu-sâng ke ngìn yit-thin oi siên sé-chhiang sâm-fu ya oi sé-sṳ̂n chang cho-tet chón-to yàng-tú.
[29] Yî-set-lie̍t-ngìn oi yún-yén chûn-sú yî-ha ke thiàu-li. Tak-ngièn chhit-ngie̍t chhû-sṳ̍p, Yî-set-lie̍t-ngìn lâu chhiam-sṳ̀ he̍t chhai kì-têu tông-chûng ke lî-hak yit-thin oi kim-sṳ̍t, khiet-khú chhṳ-kâ, cho-m̀-tet cho-se.
[30] Chhai liá yit-ngit, oi vi kì-têu hàng su̍k-chhui-lî, kiet-chhiang kì-têu, sṳ́ kì-têu chhai Song-chú mien-chhièn chhiang-li, chhù-thet kì-têu só-yû ke chhui.
[31] Liá he chṳ-sṳn ke ôn-sit-ngit; kì-têu yit-thin oi kim-sṳ̍t, khiet-khú chhṳ-kâ, cho-m̀-tet cho-se. Liá he yún-yén ke thiàu-li.
[32] Ke cheu-fap sat-li̍p, sṳ̀n-chiap â-pâ chṳp-hàng chi-sṳ̂ chṳt-vu ke thai-chi-sṳ̂ oi hàng su̍k-chhui-lî. Kì oi chok-hó chi-sṳ̂ lî-fu̍k,
[33] vi chṳ-sṳn-só, sṳn-chong-phùng, lâu chi-thàn kí-hàng kiet-chhiang-lî, ya vi khì-thâ ke chi-sṳ̂ lâu chhiòn-phu fi-chung kí-hàng su̍k-chhui-lî.
[34] Liá-ke thiàu-li yit-thin oi yún-yén chûn-sú. Liá su̍k-chhui-lî tak-ngièn yit-thin oi kí-hàng yit-pái, vi Yî-set-lie̍t-ngìn chhù-thet só-yû ke chhui. Mô-sî chhiu chûn-cheu Song-chú ke min-lin hi-cho.