[1] Song-chú fûn-fu Mô-sî
[2] tui Â-lùn lâu kì ke-têu lai-é kóng: “Ngì-têu yit-thin oi se-ngi chhú-lî Yî-set-lie̍t-ngìn hien-pûn Ngài ke sṳn-vu̍t, miên-tet ngì-têu vú-yu̍k Ngài ke sṳn-miàng. Ngài he Song-chú.
[3] Ngì-têu ke heu-thoi chûng, na yû-ngìn chhai lî-ngì song mò chhiang-li ke sṳ̀, hàn chiap-khiun Yî-set-lie̍t-ngìn hien-pûn Ngài ke sṳn-vu̍t, kì cho-m̀-tet chai-ko chhai Ngài ke chi-thàn sṳ-fung Ngài. Ngì-têu ke heu-thoi oi yún-yén chûn-sú liá thiàu-li. Ngài he Song-chú.
[4] “Â-lùn ke heu-thoi chûng, só-yû pot thái-kô ya-he pot yì-leu-chṳn ke ngìn, yit-thin oi tén-to chhiang-li heu, chang cho-tet sṳ̍t sṳ̀n-sṳn ke sên-ngì. Chi-sṳ̂ na-he pen-tó ke yîn-vi chiap-chhiuk sṳ̂-thí ya-he chiap-chhiuk leu-chîn-chṳn ke ngìn mò chhiang-li ke tûng-sî,
[5] ya-he miâ-tó khì-thâ mò chhiang-li ke thung-vu̍t ya-he ngìn, chhiu mò chhiang-li.
[6] Chi-sṳ̂ mò chhiang-li yî-heu yit-chhṳ̍t to ke-ngit lìm-am-é chhiòn-phu mò chhiang-li. Kì yit-thin oi sé-sṳ̂n, chang cho-tet sṳ̍t sṳ̀n-sṳn ke sên-ngì.
[7] Ngit-thèu lo̍k-sân yî-heu, kì chhiu chhiang-li, cho-tet sṳ̍t sṳ̀n-sṳn ke sên-ngì, yîn-vi ke chhiu-he kì ke sṳ̍t-vu̍t.
[8] Kì cho-m̀-tet sṳ̍t chhṳ-yèn sí-thet ya-he pûn yâ-chhu ngâu-sí ke thung-vu̍t, miên-tet tá-lá-sap chhṳ-kâ. Ngài he Song-chú.
[9] “Só-yû ke chi-sṳ̂ chhiòn-phu yin-kôi chûn-sú Ngài só pân-pu ke li-kûi; na-mò, kì-têu chhiu yû-chhui, yit-thin voi sí, yîn-vi kì-têu siet-thu̍k Ngài sṳ̀n-sṳn ke li-kûi. Ngài he sṳ́ kì-têu sàng-cho sṳn-kiet ke Song-chú.
[10] “Chṳ́-yû chi-sṳ̂ vuk-hâ ke ngìn chang cho-tet sṳ̍t sṳ̀n-sṳn ke sên-ngì; khì-thâ ke ngìn chhiòn-phu cho-m̀-tet sṳ̍t, chhiu-son he̍t chhai chi-sṳ̂ vuk-hâ ke ngìn-hak ya-he chhiáng ke kûng-ngìn ya cho-m̀-tet sṳ̍t.
[11] Chúng-he chi-sṳ̂ ke nù-phu̍k, mò-lun he yung chhièn mâi ke ya-he chhai kì vuk-hâ chhut-se ke, chhiòn-phu cho-tet sṳ̍t chi-sṳ̂ pûn-tó ke sên-ngì.
[12] Chi-sṳ̂ ke moi-é na ka-pûn m̀-he chi-sṳ̂ ke phìn-mìn chhiu cho-m̀-tet sṳ̍t sṳ̀n-sṳn ke sên-ngì.
[13] Chúng-he chi-sṳ̂ ke moi-é na sàng-cho koá-fu ya-he lì-fûn, yu mò chṳ́-ńg, kì chón-to ngoi-kâ lòi-he̍t, chhiu cho-tet sṳ̍t â-pâ cho chi-sṳ̂ só pûn-tó ke sṳ̍t-vu̍t. Chṳ́-yû chi-sṳ̂ vuk-hâ ke ngìn chang cho-tet sṳ̍t sên-ngì.
[14] “Na-yû yit-pân ngìn m̀ tú-hó sṳ̍t-tó sṳ̀n-sṳn ke chi-vu̍t, kì oi cheu ngièn-lòi ke ka-chhièn kâ ńg-fûn chṳ̂-yit phòi-pûn chi-sṳ̂.
[15] Chi-sṳ̂ m̀-hó pûn yit-pân ke Yî-set-lie̍t-ngìn sùi-phien sṳ̍t hien-pûn Song-chú sṳ̀n-sṳn ke sên-ngì lòi tá-lá-sap sên-ngì;
[16] án-ngiòng voi hoi ke-têu ngìn fam-chhui, su chit-fa̍t. Ngài he sṳ́ kì-têu sàng-cho sṳn-kiet ke Song-chú.”
[17] Song-chú fûn-fu Mô-sî
[18] hiong Â-lùn, kì ke-têu lai-é, pin Yî-set-lie̍t chhiòn ngìn-mìn kóng: “Yî-set-lie̍t-ngìn ya-he chhiam-sṳ̀ he̍t chhai Yî-set-lie̍t ke lî-hak, só-yû hien sêu-fa-chi pûn Song-chú ke, mò-lun he vàn-ngien ya-he kâm-sîm fung-hien ke,
[19] yit-thin oi hien mò khiet-tiám ke ngiù-kú, mièn-yòng-kú, ya-he sân-yòng-kú chang voi tet-tó chiap-na̍p.
[20] Ngì-têu na hien yû khiet-tiám ke thèu-sâng, Song-chú m̀-voi chiap-na̍p.
[21] Mò-lun má-ngìn, vi-tó vàn-ngien ya-he kâm-sîm hien phìn-ôn-chi pûn Song-chú, yit-thin oi hien mò khiet-tiám ke ngiù ya-he yòng, chang voi tet-tó chiap-na̍p.
[22] Cho-m̀-tet chiông mô-muk ke, pâi-kiok ke, pho-siong ke, phì-ngiuk yû-sông, chúng, ya-he pot-sién ke thèu-sâng hien-pûn Song-chú. Cho-m̀-tet hien liá-chúng thèu-sâng chhai chi-thàn táng cho fó-chi pûn Song-chú.
[23] Ngì-têu cho-tet hien fat-yuk m̀-hó ya-he khì-hìn ke ngiù ya-he se mièn-yòng cho kâm-sîm-chi, chúng-he liá-chúng thèu-sâng cho-m̀-tet cho vàn-ngien-chi.
[24] Cho-m̀-tet chiông ha̍k-lón sún-sông, chak-sui, lie̍t-thet, ya-he kot-thet ke thèu-sâng hien-pûn Song-chú. Chhai ngì-têu ke thi-song cho-m̀-tet yû liá-chúng sṳ.
[25] Yî-song ke thèu-sâng, ngì-têu ya cho-m̀-tet tui ngoi-chhu̍k ngìn nâ-lòi cho hien-pûn Song-ti ke sṳ̍t-vu̍t. Liá-têu thèu-sâng son-he yû sún-sông, yû khiet-tiám ke, m̀-voi tet-tó Song-chú chiap-na̍p.”
[26] Song-chú fûn-fu Mô-sî kóng:
[27] “Chang chhut-se ke se ngiù-kú, se mièn-yòng, ya-he se sân-yòng, chhai chhit-ngit nui cho-m̀-tet sṳ́ kì lâu ngiù-mà ya-he yòng-mà fûn-khôi. Thi-pat ngit yî-heu, kì chhiu cho-tet tông-cho fó-chi hien-pûn Song-chú.
[28] Cho-m̀-tet chhai khiung-ngit chiông ngiù-mà lâu se-ngiù, mièn-yòng-mà lâu se mièn-yòng, sân-yòng-mà lâu se sân-yòng chhṳ̀-lòi hien-chi.
[29] “Hien kám-chhia-chi pûn Song-chú ke sṳ̀, oi cheu thiàu-li hien chang-voi tet-tó chiap-na̍p.
[30] Ngì-têu oi chhai ke-ngit chiông chi-ngiuk sṳ̍t-thet, lièn yit-te cho-m̀-tet liù-to thi-ngi chêu-sṳ̀n. Ngài he Song-chú.
[31] “Ngì-têu oi kiún-sú sṳ̍t-hàng Ngài ke kie-min; Ngài he Song-chú.
[32] Ngì-têu cho-m̀-tet vú-yu̍k Ngài ke sṳn-miàng; Yî-set-lie̍t-ngìn yit-thin oi chûn-kin Ngài cho sṳn-kiet ke. Ngài he sṳ́ ngì-têu sàng-cho sṳn-kiet ke Song-chú;
[33] Ngài sṳt thu ngì-têu chhut Âi-khi̍p, oi cho ngì-têu ke Song-ti. Ngài he Song-chú.”