[1] Song-chú fûn-fu Mô-sî:
[2] “Oi min-lin Yî-set-lie̍t-ngìn chiông chhin-sùn ke kám-lám-yù tai-lòi, cho sṳn-chong-phùng tî-poi tên-thòi ke yù-liau, hó-pûn tên-thòi ke tên sòng-sòng chho̍k-tén.
[3] Tak am-pû, Â-lùn oi chhai piong yok-khui ke chṳ-sṳn-só thèu-chhièn, ke chong-man ngoi tiám tên-fó, sṳ́ liá tên tui lìm-am-é to thiên-kông chhai Song-chú mien-chhièn chho̍k-tén. Liá thiàu-li he kì ke chṳ́-sûn oi sṳ-sṳ thoi-thoi chûn-sú ke.
[4] Â-lùn oi fu-chit ke sùn-kîm tên-thòi táng-kô ke tên-fó, sṳ́ kì chhai Song-chú mien-chhièn sòng-sòng chho̍k-tén.
[5] “Ngì oi yung ngi-sṳ̍p-si kûng-kîn yu-mien-fún phoi sṳ̍p-ngi te piáng,
[6] yèn-heu chiông piáng pài chhai Song-chú mien-chhièn sùn-kîm ke chok-táng; piáng oi pài-cho lióng-hòng, yit-hòng liuk-te.
[7] Ngì oi chhai tak-hòng piáng táng-kô ve-têu sùn-nen-hiông, thoi-péu chiông piáng tông-cho hien-pûn Song-chú ke fó-chi.
[8] Tak-ke ôn-sit-ngit, Â-lùn yit-thin oi chiông piáng pài chhai Song-chú mien-chhièn, yún-yén cho-m̀-tet thìn. Liá he Yî-set-lie̍t-ngìn yún-kiú oi chûn-sú ke yok.
[9] Liá piáng oi kûi-pûn Â-lùn lâu kì ke heu-thoi. Kì-têu oi chhai sṳn ke só-chhai sṳ̍t liá-piáng; yîn-vi liá he hien-pûn Song-chú ke fó-chi chûng chṳ-sṳn ke phu-fun, he su̍k chi-sṳ̂ ke.”
[10] Yû yit-ke ngìn, kiâ pâ he Âi-khi̍p-ngìn, â-mê he Yî-set-lie̍t chûng Tan kî-chhu̍k ngìn Tí-pak-li ke moi-é, miàng ôn-to Sṳ-lò-me̍t. Yû yit-ngit, liá-ke ngìn chhai yàng-tú lâu yit-ke Yî-set-lie̍t-ngìn yên-kâ. Chhai chên-chhàu tông-chûng, kì chu-chú Song-chú ke sṳn-miàng, kì-têu chhiu tai kì to Mô-sî ke-vi,
[12] chiông kì koân hí-lòi, tén Song-chú chṳ́-sṳ oi ngióng-pân hìn-fa̍t kì.
[13] Song-chú lâu Mô-sî kóng:
[14] “Chiông ke-ke ngìn tai-to yàng-ngoi. Só-yû thâng-tó kì chu-chú ke ngìn, chhiòn-phu oi chiông sú piong chhai kì ke thèu-nà táng, chṳn-mìn kì yû-chhui, yèn-heu chhiòn fi-chung oi yung sa̍k-thèu te̍p-sí kì.
[15] Chiap-tén, ngì oi lâu Yî-set-lie̍t-ngìn kóng: Só-yû chu-chú Song-ti ke ngìn oi khâi chhṳ-kâ ke chhui.
[16] Só-yû siet-thu̍k Song-chú miàng ke ngìn yit-thin oi chhú sí-hìn; chhiòn fi-chung oi yung sa̍k-thèu chiông kì te̍p-sí. Mò-lun he Yî-set-lie̍t-ngìn ya-he chhiam-he̍t ke lî-hak, na-he kì chu-chú Song-chú ke miàng, yit-thin oi chhú sí-hìn.
[17] “Chhṳ̀-ngìn ke, thin-chho̍k oi chhú sí-hìn;
[18] chhṳ̀ phe̍t-ngìn thèu-sâng ke, yit-thin oi phòi thèu-sâng, he yung-miang phòi-miang.
[19] “Ngìn na sông-hoi phe̍t-ngìn, oi cheu kì ngióng-pân tui-thai phe̍t-ngìn lòi tui-thai kì:
[20] kut-thèu phòi kut-thèu; muk-chû phòi muk-chû; ngà-chhṳ́ phòi ngà-chhṳ́. Kì ngióng-pân sông-hoi phe̍t-ngìn, ya oi su khiung-yong ke sông-hoi.
[21] Chhṳ̀ phe̍t-ngìn thèu-sâng ke, yit-thin oi phòi thèu-sâng; chúng-he chhṳ̀-sí ngìn ke, yit-thin oi chhú sí-hìn.
[22] Mò-lun he Yî-set-lie̍t-ngìn ya-he chhiam-he̍t ke lî-hak, chhiòn-phu khiung-yong oi sú liá fap-li̍t. Ngài he Song-chú — ngì-têu ke Song-ti.”
[23] Mô-sî tui Yî-set-lie̍t-ngìn kóng-so̍t liá-têu fa, kì-têu chhiu tai ke-ngìn to yàng-ngoi, yung sa̍k-thèu chiông kì te̍p-sí. Án-ngiòng, Yî-set-lie̍t-ngìn chhiu cheu Song-chú pûn Mô-sî ke min-lin hi-cho.