[1] Song-chú fûn-fu Mô-sî kóng:
[2] “Châng-ngie̍t chhû-yit, ngì oi chiông sṳn-chong-phùng tap hí-lòi,
[3] chiông ke piong sṳ̍p-kie ke yok-khui piong chhai tî-poi, pin yung chong-man châ-tén.
[4] Ngì oi chiông kiûng-chok pân ngi̍p-hi, chhai chok-táng pài-hó yung-phín; ya chiông tên-thòi pân ngi̍p-hi, yu-oi tiám tên-fó.
[5] Ngì oi chiông sêu-hiông ke kîm-thàn mien-tui yok-khui piong-hó, pin chhai sṳn-chong-phùng mùn-héu koa-song mùn-liàm.
[6] Oi chiông sêu-fa-chi ke chi-thàn pài chhai sṳn-chong-phùng mùn-héu chhièn,
[7] sé-thông-phùn piong chhai sṳn-chong-phùng lâu chi-thàn chûng-kiên, tî-poi chông-tén súi.
[8] Oi chiông thìn-yen chû-vì ke chong-man koa hí-lòi, pin chhai mùn-héu koa-song mùn-liàm.
[9] “Ngì oi nâ sṳn-yù kò sṳn-chong-phùng lâu só-yû yung-phín, fûn-phe̍t kì-têu vì-sṳn,
[10] yèn-heu yung sṳn-yù kò sêu-fa-chi ke chi-thàn lâu só-yû yung-phín, sṳ́ kì-têu chhiòn-phu fûn-phe̍t vì-sṳn.
[11] Ngì ya oi yung sṳn-yù kò sé-thông-phùn lâu phùn-chho, sṳ́ kì-têu fûn-phe̍t vì-sṳn.
[12] “Ngì oi tai Â-lùn lâu kì ke-têu lai-é to sṳn-chong-phùng mùn-héu, pûn kì-têu chhai ke-vi sé-sṳ̂n.
[13] Oi lâu Â-lùn chok-hó sṳn-fu̍k, yung sṳn-yù kò kì, sṳ́ kì fûn-phe̍t vì-sṳn, cho chi-sṳ̂ sṳ-fung Ngài.
[14] Oi tai Â-lùn ke-têu lai-é lòi, lâu kì-têu chok-hó nui-sâm,
[15] yung sṳn-yù kò kì-têu, chhiong kò kì-têu ke â-pâ khiung-yong, sṳ́ kì-têu cho chi-sṳ̂ sṳ-fung Ngài. Thûng-ko liá sṳn-lî kì-têu oi yún-yén cho chi-sṳ̂, sṳ-sṳ thoi-thoi sṳ-fung Ngài.”
[16] Liá yit-chhiet ke sṳ Mô-sî chhiòn-phu cheu Song-chú só fûn-fu ke fa hi-cho.
[17] Só-yî kì-têu chhai lì-khôi Âi-khi̍p heu ke thi-ngi ngièn châng-ngie̍t chhû-yit chiông sṳn-chong-phùng tap hí-lòi.
[18] Mô-sî piong-hó phùng-chho, ôn kut-ka, chhôn vàng-kong, fù-hí chhû-é.
[19] Kì chiông sṳn-chong-phùng ke phùng-táng khièm-hó, táng-kô hàn-yû táng-koi. Liá lûng-chúng he cheu Song-chú fûn-fu Mô-sî ke fa cho ke.
[20] Kì yu chiông lióng-te siá kie-min ke sa̍k-pán piong chhai yok-khui tî-poi, chiông kong-é chhôn-ko yok-khui ke khiên-é, táng-kô ôn su̍k-chhui ke koi-é,
[21] yèn-heu chiông yok-khui piong chhai sṳn-chong-phùng tî-poi, koa chong-man lòi châ-tén yok-khui. Liá lûng-chúng he cheu Song-chú fûn-fu Mô-sî ke fa cho ke.
[22] Mô-sî chiông kiûng-chok pân-ngi̍p sṳn-chong-phùng, piong chhai sṳn-chong-phùng ke pet-phién, chhai chong-man ngoi-mien,
[23] yu chhai chok-táng piong hien-pûn Song-chú ke kiûng-piáng. Liá lûng-chúng he cheu Song-chú fûn-fu Mô-sî ke fa cho ke.
[24] Kì chiông tên-thòi piong chhai sṳn-chong-phùng ke nàm-phién, lâu kiûng-chok siông-tui,
[25] yu chhai Song-chú mien-chhièn tiám tên-chán. Liá lûng-chúng he cheu Song-chú fûn-fu Mô-sî ke fa cho ke.
[26] Kì chiông kîm hiông-thàn piong chhai sṳn-chong-phùng tî-poi, mien tui-tén chong-man,
[27] chhai thàn-táng sêu chhin-hiông ke hiông. Liá lûng-chúng he cheu Song-chú fûn-fu Mô-sî ke fa cho ke.
[28] Kì chhai sṳn-chong-phùng ke mùn-héu koa mùn-liàm,
[29] chiông sêu-fa-chi ke chi-thàn piong sṳn-chong-phùng ngoi mùn-liàm ke chṳn tui-mien, yèn-heu chhai thàn-táng hien sêu-fa-chi lâu su-chi. Liá lûng-chúng he cheu Song-chú fûn-fu Mô-sî ke fa cho ke.
[30] Kì chiông sé-thông-phùn piong chhai sṳn-chong-phùng lâu chi-thàn chûng-kiên, phùn-tú chông-tén súi.
[31] Mô-sî, Â-lùn, lâu Â-lùn ke-têu lai-é chhai chin-ngi̍p sṳn-chong-phùng yî-chhièn ya-he chhiu-khiun chi-thàn ke sṳ̀, chhai phùn-tú sé-sú sé-kiok.
[32] Liá lûng-chúng he cheu Song-chú fûn-fu Mô-sî ke fa cho ke.
[33] Chui-heu Mô-sî chhai sṳn-chong-phùng lâu chi-thàn ke ngoi-vì hí vì-làn, lòi cho thìn-yen, yèn-heu chhai mùn-héu chiông thìn-yen ke mùn-liàm koa hí-lòi. Án-ngiòng, Mô-sî chhiu vàn-sṳ̀n só-yû ke kûng-chok.
[34] Ke-sṳ̀, yùn châ-tén sṳn-chong-phùng, Song-chú ke yùng-kông chhiu chhûng-mân sṳn-chong-phùng.
[35] Mô-sî mò phan-fap chin-ngi̍p sṳn-chong-phùng; yîn-vi yùn thìn chhai sṳn-chong-phùng táng, Song-chú ke yùng-kông chhûng-mân sṳn-chong-phùng.
[36] Tak-pái yùn tui sṳn-chong-phùng sṳ̂n sông-hi, Yî-set-lie̍t-ngìn chhiu sái-yàng hiong chhièn-hàng.
[37] Yùn yit thìn hâ-lòi, kì-têu chhiu thìn hâ-lòi ôn-yàng.
[38] Chhai Yî-set-lie̍t-ngìn chhiòn-phu ke hàng-chhàng chûng, ngit-sṳ̀-thèu, kì-têu khon-tó Song-chú ke yùn chhai sṳn-chong-phùng táng, am-pû-sṳ̀, khon-tó yùn-chûng yû fó sêu-tén.