[1] Kì-têu yung làm-set, chṳ́-set lâu chhṳ̂m-fùng set ke phong-sien liòn chi-sṳ̂ chhai sṳn-só fu̍k-sṳ ke sṳ̀ só-chok ke kô-kui sṳn-fu̍k. Kì-têu yu vi Â-lùn cho sṳn-fu̍k. Liá he cheu Song-chú fûn-fu Mô-sî ke fa cho ke.
[2] Pí-sat-lie̍t yung kîm-sien, làm-set, chṳ́-set, chhṳ̂m-fùng set ke phong-sien, lâu mà-sâ cho yî-fut-tet sṳn-fu̍k.
[3] Kì-têu chiông kîm-é tá-cho pho̍k-pho̍k, chién-cho se-se thiàu, lâu mà-sâ, làm-set, chṳ́-set, chhṳ̂m-fùng set ke phong-sien, yung yu-siu ke sú-kûng siu khiung-ha.
[4] Kì-têu yu vi yî-fut-tet cho lióng-thiàu cho-tet kiê ke kiên-tai, liòn chhai lióng-phién.
[5] Ke-thiàu lièn chhai yî-fut-tet, yung-lòi kiê chhai sṳ̂n-song ke tai-é, lâu yî-fut-tet yung khiung-yong ke chhòi-liau, he yung kîm-sien, làm-set, chṳ́-set, chhṳ̂m-fùng set ke phong-sien, lâu mà-sâ chhiak ke. Liá lûng-chúng he cheu Song-chú fûn-fu Mô-sî ke fa cho ke.
[6] Kì-têu yu yung lióng-te fùng-mâ-nó siông chhai kîm-sṳ̂-khiên tú, khat-tén Yî-set-lie̍t sṳ̍p-ngi ke lai-é ke miàng.
[7] Liá lióng-te pó-sa̍k liòn chhai yî-fut-tet ke lióng-thiàu kiên-tai song, thoi-péu Yî-set-lie̍t ke sṳ̍p-ngi kî-chhu̍k. Liá lûng-chúng he cheu Song-chú fûn-fu Mô-sî ke fa cho ke.
[8] Kì yung yu-siu ke sú-kûng chho hiûng-phài, lâu cho yî-fut-tet khiung-yong, yung kîm-sien, làm-set, chṳ́-set, chhṳ̂m-fùng set ke phong-sien, lâu mà-sâ liòn-hó.
[9] Hiûng-phài he si-fông hìn ke, thia̍p-cho lióng-chhèn, chhòng ngi-sṳ̍p ngi kûng-fûn, fat ngi-sṳ̍p ngi kûng-fûn.
[10] Kì-têu chhai hiûng-phài táng-kô siông si-hòng pó-sa̍k: thi-yit hòng siông fùng-pó-sa̍k, vòng-ngiu̍k, lâu fùng-ngiu̍k;
[11] thi-ngi hòng liu̍k-pó-sa̍k, làm-pó-sa̍k, lâu chon-sa̍k;
[12] thi-sâm hòng chṳ́-ngiu̍k, pha̍k mâ-nó, lâu chṳ́-chîn;
[13] thi-si hòng súi-chhông-ngiu̍k, fùng-mâ-nó, lâu pit-ngiu̍k. Liá-têu chhiòn-phu siông chhai kîm-sṳ̂-khiên táng-kô.
[14] Sṳ̍p-ngi te pó-sa̍k ke mî-yit te khat-sông Yî-set-lie̍t yit-ke lai-é ke miàng, thoi-péu Yî-set-lie̍t ke sṳ̍p-ngi kî-chhu̍k.
[15] Kì-têu yung sùn-kîm chho hiûng-phài ke lien-é, chhiong nò-hó ke sok-è.
[16] Kì-têu yu chho lióng-chak kîm-sṳ̂-khiên lâu lióng-chak kîm khiên-é, kîm khiên-é ôn chhai hiûng-phài táng-kô ke lióng-thèu.
[17] Kì-têu chiông lióng-thiàu kîm lien-é chhôn chhai hiûng-phài lióng-thèu ke khiên-é tú.
[18] Lien-é ke nang-ngoi lióng-thèu chhôn chhai lióng-chak kîm-sṳ̂-khiên tú, lièn chhai yî-fut-tet thèu-chhièn ke kiên-tai táng-kô.
[19] Kì-têu yu chho lióng-chak kîm khiên-é, ôn chhai hiûng-phài hâ-poi ke lióng-thèu, vá-khiun yî-fut-tet ke nui-piên,
[20] chai chho lióng-chak kîm khiên-é, chiap chhai yî-fut-tet thèu-chhièn lióng-thiàu kiên-tai ke hâ-poi, vá-khiun liòn ke thi-fông, chhai sú-kûng chhiak ke tai-é táng-kô.
[21] Kì-têu yung làm-set ke tai-é chiông hiûng-phài ke khiên-é lâu yî-fut-tet ke khiên-é thak khiung-ha, sṳ́ hiûng-phài thiap chhai yî-fut-tet ke tai-é táng-kô, chhiu m̀-voi lut-thet. Liá lûng-chúng he cheu Song-chú fûn-fu Mô-sî ke fa cho ke.
[22] Kì yung chhiak-fâ ke sú-kûng lâu làm-set ke phong-sien lòi-cho chhai yî-fut-tet tái-hâ ke chhòng-sâm.
[23] Chhòng-sâm ke tûng-ông liù yit-ke khûng-é cho liâng-héu, chû-vì kâ-chhiak liâng-piên, chang m̀-voi lie̍t-thet.
[24] Chhòng-sâm hâ-poi ke sâm-sùn yung làm-set, chṳ́-set, chhṳ̂m-fùng set ke phong-sien, lâu mà-sâ cho sa̍k-liù,
[25] yu yung sùn-kîm ke se lìn-lòng kak chhai sa̍k-liù chûng-kiên.
[26] Liá lûng-chúng he cheu Song-chú fûn-fu Mô-sî ke fa cho ke.
[27] Kì-têu vi Â-lùn lâu kì ke-têu lai-é nâ mà-sâ cho nui-sâm,
[28] yu yung mà-sâ cho mo-é, thèu-kîn lâu tón-fu,
[29] yu yung mà-sâ lâu làm-set, chṳ́-set, chhṳ̂m-fùng set ke phong-sien, yung siu-fâ ke sú-kûng lòi chhiak yit-thiàu yêu-tai. Liá lûng-chúng he cheu Song-chú fûn-fu Mô-sî ke fa cho ke.
[30] Kì-têu yu yung sùn-kîm chho yit-mien péu-sṳ fung-hien ke phài-è, táng-kô khat-tén “Kûi Song-chú vì-sṳn”.
[31] Kì-têu yung làm-set ke tai-é chiông kì kiê chhai mo-é thèu-chhièn. Liá lûng-chúng he cheu Song-chú fûn-fu Mô-sî ke fa cho ke.
[32] Sṳn-chong-phùng, chhiu-he siông-kien ke chong-phùng, yit-chhiet ke kûng-chhàng chhiòn-phu vàn-sṳ̀n. Song-chú fûn-fu Mô-sî ke, Yî-set-lie̍t-ngìn chhiòn-phu cho-hó.
[33] Kì-têu chiông sṳn-chong-phùng lâu sṳn-chong-phùng ke só-yû yung-phín chhiòn-phu tai-to Mô-sî mien-chhièn, khì-chûng yû: kiêu-é, kut-ka, vàng-kong, chhû-é lâu chhû-chho;
[34] ngiam-fùng ke yòng-kú-phì táng-koi, chhin-chiâng ke phì-liau táng-koi, kak-tén yok-khui ke chong-man;
[35] yok-khui, yok-khui ke kong-é, lâu su̍k-chhui ke koi-é;
[36] kiûng-chok, chok ke yung-phín, lâu hien-pûn Song-ti ke kiûng-piáng;
[37] sùn-kîm ke tên-thòi, tên-chán, khì-thâ ke yung-phín, lâu tên-chán yung ke yù;
[38] kîm hiông-thàn, sṳn-yù, chhin-hiông ke hiông, sṳn-chong-phùng mùn-héu ke mùn-liàm;
[39] thùng chi-thàn lâu thàn-táng ke thùng-mióng, thàn ke kong-é lâu yung-phín, sé-thông-phùn lâu phùn-chho;
[40] vì thìn-yen ke chong-man, chong-man ke chhû-é lâu chhû-chho; thìn-yen mùn-héu ke mùn-liàm lâu sok-è, sṳn-chong-phùng ke tâng-é;
[41] chi-sṳ̂ chhai sṳn-só fu̍k-sṳ ke sṳ̀ só-chok chhin-chiâng ke sṳn-fu̍k, chhiu-he chi-sṳ̂ Â-lùn lâu kì ke-têu lai-é ke sṳn-fu̍k.
[42] Song-chú fûn-fu Mô-sî ke, Yî-set-lie̍t ngìn-mìn chhiòn-phu cho-hó lé.
[43] Mô-sî hi-khon kok-hong kûng-chhàng, khon kì-têu só-cho ke vàn-chhiòn chûn-cheu Song-chú ke min-lin. Mô-sî chhiu chuk-fuk kì-têu.