[1] “Oi yung kîm-ha̍p-fôn-muk chho chi-thàn. Thàn he si-fông ke, chhòng lióng kûng-chhak lióng kûng-chhun, fat lióng kûng-chhak lióng kûng-chhun, kô yit kûng-chhak sâm kûng-chhun.
[2] Oi chhai thàn ke si-kok táng chho thu̍t chhut-lòi ke kok, lâu thàn lièn-cho kûi-te, pin yung thùng chiông thàn pâu-tén.
[3] Oi chho fó-fôi-phàn, yu chho chhán-è, vón, ngiuk-chhâ, lâu fó-tín; liá-têu yung-phín chhiòn-phu oi yung thùng-è chu-chho.
[4] Oi vi chi-thàn chho yit-chak thùng-mióng, si-kok yû si-chak yung-lòi kông ke thùng khiên-é.
[5] Oi chiông mióng ôn chhai chi-thàn ke chû-vì ha-pan chiet, tui thàn-tái theu-to thàn ke yit-pan án-kô.
[6] Oi yung kîm-ha̍p-fôn-muk chho chi-thàn ke kong-é, yung thùng pâu-tén,
[7] kông ke sṳ̀ chiông kong-é chhap-ngi̍p lióng-piên ke thùng khiên-é.
[8] Oi yung piông-é chho chi-thàn; thàn ke tûng-ông he khûng-hok ke. Ngì oi cheu Ngài chhai sân-táng chṳ́-sṳ ke yong-sṳt chho.”
[9] “Oi yung mà-sâ chhiak ke chong-man vi sṳn-chong-phùng cho vì-làn, vì yit-chak thìn-yen. Nàm-phién ke chong-man chhòng si-sṳ̍p si kûng-chhak,
[10] yung ngi-sṳ̍p kî yû-chho ke thùng-chhû ka hí-lòi, chhû-é táng ke kiêu-é lâu vàng-kong he yung ngiùn chho ke.
[11] Pet-phién ke chong-man ya he án-ngiòng, chhòng si-sṳ̍p si kûng-chhak, yung ngi-sṳ̍p kî yû-chho ke thùng-chhû ka hí-lòi, chhû-é táng ke kiêu-é lâu vàng-kong he yung ngiùn chho ke.
[12] Sî-phién ke chong-man chhòng ngi-sṳ̍p ngi kûng-chhak, yû sṳ̍p-kî yû-chho ke chhû-é.
[13] Chhai tûng-phién, thìn-yen ke mùn-héu, chong-man ya he ngi-sṳ̍p ngi kûng-chhak fat.
[14] Mùn-héu ke lióng-phién chhiòn-phu oi-yû liuk kûng-chhak liuk kûng-chhun fat ke chong-man,
[15] yung sâm-kî yû-chho ke chhû-é ka hí-lòi.
[16] Thìn-yen mùn-héu oi-yû kiú kûng-chhak chhòng ke mùn-liàm, yung mà-sâ lâu làm-set, chṳ́-set, chhṳ̂m-fùng set ke phong-sien, yung siu-fâ ke sú-kûng chhiak-sṳ̀n, yung si-kî yû-chho ke chhû-é ka hí-lòi.
[17] Thìn-yen si-vì ke chhû-é chhiòn-phu oi yung ngiùn ke vàng-kong lièn-tén, chhû-é táng ke kiêu-é oi yung ngiùn chho ke, chhû-chho yung thùng chho ke.
[18] Thìn-yen oi chhòng si-sṳ̍p si kûng-chhak, fat ngi-sṳ̍p ngi kûng-chhak, kô lióng kûng-chhak lióng kûng-chhun. Chong-man oi yung mà-sâ chhiak ke, chhû-chho yung thùng chho ke.
[19] Sṳn-chong-phùng nui kok-yong ke yung-phín, sṳn-chong-phùng lâu vì thìn-yen só-yung ke tâng-é chhiòn-phu oi yung thùng chho ke.”
[20] “Oi fûn-fu Yî-set-lie̍t ngìn-mìn chiông chui-hó ke kám-lám-yù nâ-lòi pûn ngì, cho tiám tên-fó yung, pûn tên-fó sòng-sòng chho̍k-tén.
[21] Â-lùn lâu kì ke chṳ́-sûn oi chhai sṳn-chong-phùng nui, yok-khui chhièn ke chong-man ngoi tiám-chho̍k tên-fó. Liá tên-fó oi chhai Ngài — Song-chú mien-chhièn tui lìm-am-é yit-chhṳ̍t tiám-to thiên-kông. Yî-set-lie̍t ngìn-mìn lâu kì-têu ke chṳ́-sûn yit-thin oi yún-yén kiún-sú liá min-lin.”