[1] Song-ti fûn-fu yî-ha liá-têu kie-min, kóng:
[2] “Ngài he Song-chú — ngì ke Song-ti; Ngài sṳt thu ngì tui cho nù-chhòi ke Âi-khi̍p-thi chhut-lòi.
[3] “Ngài yî-ngoi, ngì cho-m̀-tet kin-pai phe̍t ke sṳ̀n-mìn.
[4] “Cho-m̀-tet vi chhṳ-kâ tiâu-khiet ngiéu-siong; ya cho-m̀-tet chho thiên-táng, thi-song, ya-he thi tái-hâ, súi-chûng só-yû ke hìn-siong.
[5] Cho-m̀-tet hiong ke-têu ngiéu-siong khúi-pai, ya cho-m̀-tet fu̍k-sṳ kì-têu, yîn-vi Ngài — Song-chú — ngì ke Song-ti he chôn-chhìn ke Song-ti. Hen Ngài ke ngìn, Ngài yit-thin voi chit-fa̍t kì-têu lâu kì-têu ke chṳ́-ńg, chhṳ̍t-to sâm-si thoi.
[6] Chúng-he kin-oi Ngài, chûn-sú Ngài min-lin ke ngìn, Ngài oi yung chhṳ̀-oi khoán-thai kì-têu, chhṳ̍t-to chhiên-thoi.
[7] “Cho-m̀-tet lám-sám yung Song-chú — ngì Song-ti ke miàng; yîn-vi lám-sám yung Song-chú miàng ke ngìn, Song-chú yit-thin voi chit-fa̍t kì.
[8] “Oi chûn-sú ôn-sit-ngit cho sṳn-ngit.
[9] Ngì yû liuk-ngit hó lò-luk cho yit-chhiet ke kûng-chok;
[10] chúng-he thi-chhit ngit he su̍k Song-chú — ngì Song-ti ke ôn-sit-ngit. Liá-ngit, mò-lun he ngì, ngì ke chṳ́-ńg, nù-phu̍k, nù-pî, thèu-sâng, ya-he sàng-nui chhiam-he̍t ke lî-hak, chhiòn-phu cho-m̀-tet kûng-chok;
[11] yîn-vi Song-chú chhai liuk-ngit nui chhóng-chho thiên, thi, hói, lâu khì-chûng ke van-vu̍t; chúng-he thi-chhit ngit Kì chhiu hiet-khun. Só-yî, Song-chú su-fuk ôn-sit-ngit, thin liá-ngit cho sṳn-ngit.
[12] “Oi hau-kin yà-ôi, hó-pûn ngì chhai Song-chú — ngì Song-ti oi su-pûn ngì ke thú-thi song hióng chhòng-su.
[13] “Cho-m̀-tet chhṳ̀-ngìn.
[14] “Cho-m̀-tet fam kiên-yìm.
[15] “Cho-m̀-tet thêu-nâ.
[16] “Cho-m̀-tet cho ká kien-chṳn hoi-ngìn.
[17] “Cho-m̀-tet thâm phe̍t-ngìn ke vuk; ya cho-m̀-tet thâm phe̍t-ngìn ke pû-ngiòng, nù-phu̍k, nù-pî, ngiù, lì, ya-he khì-thâ ke tûng-sî.”
[18] Ngìn-mìn thâng-tó lùi-kûng sâng lâu phùn yòng-kok ke sâng, khon-tó ngiap-lang lâu sân-táng chhung chhut-lòi ke yên, chhiòn-phu fî-sòng kiâng, yén-yén khî-tén.
[19] Kì-têu tui Mô-sî kóng: “Chhiáng ngì lâu ngài-têu kóng-fa, ngài-têu yit-thin voi-thâng; na-he Song-ti lâu ngài-têu kóng-fa, kiâng-pha ngài-têu voi mò-miang!”
[20] Mô-sî en kì-têu kóng: “M̀-sṳ́ kiâng; Song-ti kong-lìm lòi kháu-ngiam ngì-têu, sṳ́ ngì-têu sṳ̀-sṳ̀ kin-vi Kì, chang m̀-voi fam-chhui.”
[21] Chúng-he ngìn-mìn hàn-he yén-yén khî-tén; chṳ́-yû Mô-sî hàng-khiûn Song-ti só lìm chhai ke phûn-phûn ke yùn-chûng.
[22] Song-chú tui Mô-sî kóng: “Ngì oi lâu Yî-set-lie̍t-ngìn kóng: ‘Ngì-têu yí-kîn khon-tó Ngài — Song-chú ngióng-pân tui thiên-táng hiong ngì-têu kóng-fa.
[23] Cho-m̀-tet chho má-ke ngiéu-siong tông-cho Ngài; cho-m̀-tet vi chhṳ-kâ chho kîm-ngiùn ke sṳ̀n-siong.
[24] Ngì-têu oi yung nài vi Ngài chho yit-chho chi-thàn, chhai thàn-song hien ngiù-yòng cho sêu-fa-chi lâu phìn-ôn-chi. Chhai Ngài chṳ́-thin cho ngì-têu kin-pai Ngài ke mî-yit ke thi-fông, Ngài yit-thin voi-lòi su-fuk pûn ngì-têu.
[25] Na-he ngì-têu yung sa̍k-thèu vi Ngài chho chi-thàn, cho-m̀-tet yung tá-ko ke sa̍k-thèu, yîn-vi chho̍k-ko ke sa̍k-thèu voi tá-lá-sap chi-thàn.
[26] Cho-m̀-tet vi Ngài hí-chho yû ton-é ke thàn, miên-tet ngì-têu sông ton-é ke sṳ̀ lu-chhut chhṳ-kâ ke ha-thí.’ ”