[1] Song-chú tui Mô-sî kóng:
[2] “Ngì oi fûn-fu Yî-set-lie̍t-ngìn hien lî-vu̍t pûn Ngài. Só-yû lo̍k-yi fung-hien pûn Ngài ke lî-vu̍t, ngì-têu chhiu sû hâ-lòi kûi-pûn Ngài.
[3] Ngì-têu oi chiap-su ke lî-vu̍t he: Kîm, ngiùn, thùng;
[4] làm-set, chṳ́-set, lâu chhṳ̂m-fùng set ke yòng-mô; mà-sâ; sân-yòng-mô chhiak ke pu-liau;
[5] ngiam-fùng ke yòng-kú-phì; chhin-chiâng ke phì-liau; kîm-ha̍p-fôn-muk;
[6] tên-yù; chṳ-chho sṳn-yù lâu hiông ke ngièn-liau;
[7] fùng-mâ-nó lâu khì-thâ pó-sa̍k, oi nâ-lòi siông chhai thai-chi-sṳ̂ ke yî-fut-tet sṳn-fu̍k lâu hiûng-phài táng.
[8] Ngìn-mìn oi vi Ngài hí yit-chho sṳn-só, hó pûn Ngài he̍t chhai kì-têu tông-chûng.
[9] Yû-koân liá sṳn-chong-phùng lâu tî-poi só-yû yung-phín, chhiòn-phu oi cheu Ngài só chṳ́-sṳ ngì ke yong-sṳt lòi chṳ-chho.”
[10] “Oi yung kîm-ha̍p-fôn-muk chho khui-é, khui-é chhòng yit-pak yit-sṳ̍p kûng-fûn, fat liuk-sṳ̍p liuk kûng-fûn, kô liuk-sṳ̍p liuk kûng-fûn.
[11] Oi yung sùn-kîm chiông khui-é ke nui-ngoi chhiòn-phu pâu-tén, si-mien oi siông chhṳ́-hìn kîm-piên.
[12] Oi chu-chho si-chak chhôn kong-é yung ke kîm khiên-é, ôn chhai khui-é ke si-kiok song, yit-phién lióng-chak.
[13] Oi yung kîm-ha̍p-fôn-muk chho lióng-kî kong-é, yung kîm pâu-tén,
[14] nâ-lòi chhôn-ko khui-é lióng-phién ke kîm khiên-é.
[15] Liá lióng-kî kong-é oi sòng-sòng liù chhai khiên-é tú, cho-m̀-tet pâng chhut-lòi.
[16] Chiông Ngài oi su-pûn ngì siá-tén kie-min ke sa̍k-pán piong chhai khui-é tú.
[17] “Oi yung sùn-kîm chho yit-ke khui-é koi, chhiu-he su̍k-chhui koi, chhòng yit-pak yit-sṳ̍p kûng-fûn, fat liuk-sṳ̍p liuk kûng-fûn.
[18] Yu oi yung kîm-é chhùi-chhut lióng-chak kî-lu-pak,
[19] ngiàm chhai koi-é táng, yit-thèu yit-chak, sàng-cho koi-é ke yit phu-fun.
[20] Lióng-chak kî-lu-pak mien-tui-mien, tá-khôi yi̍t-kap, châ-tén khui-é koi.
[21] Chiông Ngài oi su-pûn ngì siá-tén kie-min ke sa̍k-pán piong chhai khui-é tú, yèn-heu chiông koi-é khièm chhai khui-é táng-kô.
[22] Ngài oi chhai ke-vi lâu ngì siông-fi, ya oi chhai koi-é táng-kô, tui lióng-chak kî-lu-pak chûng-kiên, chiông Ngài vi Yî-set-lie̍t ngìn-mìn li̍p ke fap-li̍t chhiòn-phu chhòn-pûn ngì.”
[23] “Oi yung kîm-ha̍p-fôn-muk chho yit-chông chok-è, chhòng pat-sṳ̍p pat kûng-fûn, fat si-sṳ̍p-si kûng-fûn, kô liuk-sṳ̍p liuk kûng-fûn.
[24] Oi yung sùn-kîm lòi pâu-tén, pin oi chhai si-mien siông chhṳ́-hìn kîm-piên.
[25] Chok-è ke chû-vì oi kâ chhit-sṳ̍p ńg kûng-lì fat ke khiông-é, khiông-é oi siông chhṳ́-hìn kîm-piên.
[26] Oi chu-chho si-chak yung-lòi kông ke kîm khiên-é, ôn chhai chok-è si-kok ke kiok-táng.
[27] Ôn kîm khiên-é oi vá-khiun khiông-é, pûn kông chok-è ke kong-é chhôn ko-hi.
[28] Oi yung kîm-ha̍p-fôn-muk chho lióng-kî kong-é, yung kîm pâu-tén.
[29] Oi yung sùn-kîm chho chok-táng ke phàn-è, vón, lâu kin-sṳ̀n yung ke chiú-fù lâu chiú-pî.
[30] Chok-è oi piong chhai yok-khui chhièn, chok-táng sòng-sòng pài-tén hien-pûn Ngài ke kiûng-piáng.”
[31] “Oi yung sùn-kîm chho yit-chho tên-thòi. Tên-chho lâu chhû-é oi yung kîm-é tá-chho; chông-sṳt ke fâ-lúi, fâ-thok, fâ-phan, chhiòn-phu oi chhùi-to yit-te lièn khiung-ha.
[32] Tên-thòi lióng-phién chhûn-chhut liuk-kî kî-é, yit-phién sâm-kî.
[33] Tak-kî kî-é yû sâm-lùi fâ, hìn-chhong chhiong hen-fâ, yû fâ-thok lâu fâ-phan.
[34] Tên-thòi ke chhû-é yû si-lùi fâ, hìn-chhong chhiong hen-fâ, yû fâ-thok lâu fâ-phan.
[35] Sâm-tui kî-é ke mî-yit tui hâ-poi yû yit-ke fâ-thok.
[36] Fâ-thok, kî-é lâu tên-thòi, chhiòn-phu oi yung kûi-te sùn-kîm tá chhut-lòi ke.
[37] Oi vi tên-thòi chho chhit-chán tên, tên-chán oi pûn tên-fó hiong thèu-chhièn cheu.
[38] Oi yung sùn-kîm chho tên-fâ chién-tô lâu tên-phàn.
[39] Oi yung sâm-sṳ̍p ńg kûng-kîn ke sùn-kîm chho tên-thòi lâu só-yû yung-phín.
[40] Oi chu-yi cheu Ngài chhai sân-táng chṳ́-sṳ ngì ke yong-sṳt hi chho.”