[1] Mô-sî ke chhông-mîn-ló — Mí-thien ke chi-sṳ̂ Ya̍p-thi̍t-lò thâng-tó Song-ti thu Yî-set-lie̍t-ngìn chhut Âi-khi̍p ke sṳ̀, vi Mô-sî lâu kì ke ngìn-mìn só-cho ke sṳ,
[2] chhiu lòi-kien Mô-sî, pin chiông Mô-sî liù chhai ngoi-kâ ke pû-ngiòng Sî-pô-lâ
[3] lâu lióng-ke lai-é tai-lòi. Lióng-ke lai-é yit-ke ôn-to Kiet-sun, yîn-vi Mô-sî kóng: “Ngài he chhiam-sṳ̀ he̍t chhai ngoi-pâng ke lî-hak”;
[4] nang-ngoi yit-ke ôn-to Yî-li-yî-chhia, yîn-vi Mô-sî kóng: “Ngâ-pâ ke Song-ti pông-chhu ngài, chṳ́n-kiu ngài thot-lì Âi-khi̍p-vòng ke tô-kiam.”
[5] Ya̍p-thi̍t-lò tai-tén Mô-sî ke pû-ngiòng lâu lióng-ke lai-é lòi-to Song-ti ke sân, chhiu-he Mô-sî chhai khóng-yâ ôn-yàng ke só-chhai.
[6] Ya̍p-thi̍t-lò siên ham-ngìn hi lâu Mô-sî kóng, kì-têu voi lòi ke sêu-sit.
[7] Só-yî Mô-sî chhut-hi ngiàng-chiap kì ke chhông-mîn-ló, lâu kì hàng-lî, yu chîm kì. Kì-têu fu-siông mun-ôn, yèn-heu ngi̍p-hi Mô-sî ke chong-phùng.
[8] Song-chú vi-tó Yî-set-lie̍t-ngìn, tui Âi-khi̍p-vòng lâu Âi-khi̍p-ngìn só-hàng yit-chhiet ke sṳ, hàn-yû Yî-set-lie̍t-ngìn kûi-lu só tù-tó ke khun-nàn lâu Song-chú ngióng-pân chṳ́n-kiu kì-têu ke sṳ, Mô-sî chhiòn-phu kóng-pûn kì ke chhông-mîn-ló thâng.
[9] Ya̍p-thi̍t-lò thâng-tó Song-chú vi-tó Yî-set-lie̍t-ngìn só cho ke yit-chhiet hó-sṳ, Kì ngióng-pân chṳ́n-kiu kì-têu thot-lì Âi-khi̍p-ngìn ke sú, chhiu fî-sòng fôn-hí.
[10] Ya̍p-thi̍t-lò kóng: “Oi chan-mî Song-chú! Kì tui Âi-khi̍p-vòng lâu kì ngìn-mìn ke sú-chûng chṳ́n-kiu ngì-têu chhut-lòi, pûn ngì-têu m̀-sṳ́ chai cho Âi-khi̍p-ngìn ke nù-chhòi!
[11] Liá-ha ngài tî Song-chú pí só-yû ke sṳ̀n-mìn kha ví-thai; yîn-vi Âi-khi̍p-ngìn kiêu-ngau vú-yu̍k Yî-set-lie̍t-ngìn, Kì sṳ̀n-chhiu liá só-yû ke sṳ.”
[12] Só-yî Ya̍p-thi̍t-lò — Mô-sî ke chhông-mîn-ló hiong Song-ti hien sêu-fa-chi lâu khì-thâ ke chi-vu̍t; Â-lùn lâu khì-thâ Yî-set-lie̍t ke chóng-ló chhiòn-phu lòi, lâu kì khiung-ha chhai Song-ti mien-chhièn sṳ̍t-fan.
[13] Thi-ngi ngit, Mô-sî chhô-tén chhai ngìn-mìn tông-chûng chhú-lî fûn-chên, tui thiên-kông to thôn-vû chhin-tô ngìn-mìn khî chhai sùn-thèu kín tén.
[14] Mô-sî ke chhông-mîn-ló khon-tó kì vi ngìn-mìn só cho ke yit-chhiet sṳ, chhiu kóng: “Ngì vi ngìn-mìn to-tái cho má-ke? Ngióng-pân pûn án-tô ngìn vì chhai sùn-thèu, tui thiên-kông to thôn-vû tén ngì yit-sà lòi chhú-lî.”
[15] Mô-sî en-kóng: “Ngài yit-thin oi án-ngiòng cho, yîn-vi ngìn-mìn to ngài liá-vi lòi khiù-mun Song-ti ke chṳ́-yi.
[16] Na-yû lióng-sà siông-châng, chhiu lòi-chhìm ngài kié-kiet; ngài chhiu thoi kì-têu phan-ton má-ngìn chho̍k, má-ngìn m̀-chho̍k, yu-oi chiông Song-ti ke fap-li̍t pin chṳ́-sṳ lâu kì-têu kóng.”
[17] Mô-sî ke chhông-mîn-ló tui kì kóng: “Ngì ke cho-fap m̀-hó;
[18] ngì lâu ngì ke ngìn-mìn chhiòn-phu voi thet-thiám. Yîn-vi sṳ-chhìn án-tô, ngì yit-sà cho thet-chhûng.
[19] Liá-ha ngì thâng ngài kóng, ngài lâu ngì kien-ngi, ngien Song-ti ya lâu ngì thùng-chhai. Ngì oi thoi-péu ngìn-mìn, chiông kì-têu ke fûn-chên tai-to Song-ti mien-chhièn, hiong Kì chhiáng-sṳ;
[20] ngì ya yin-kôi chiông Song-ti ke fap-li̍t lâu chṳ́-sṳ kau-thô kì-têu, kié-sṳt pûn kì-têu thâng, sṳ́ kì-têu tî oi ngióng-pân hàng-sṳ vì-ngìn.
[21] Ngì hàn-oi sién-phai yû nèn-li̍t ke ngìn cho Yî-set-lie̍t-ngìn ke liâng-chhiu: Mî yit-chhiên ngìn, yit-pak ngìn, ńg-sṳ̍p ngìn, sṳ̍p-ngìn chhiòn-phu yin-kôi yû yit-ke liâng-chhiu. Kì-têu yit-thin he kin-vi Song-ti, khó-kho, m̀ chiap-su fùng-pâu ke ngìn.
[22] Ngì oi chṳ́-phai liá-têu ngìn sùi-sṳ̀ vi ngìn-mìn phan-ton on-khien; chhung-yeu ke on-khien tai-to ngì mien-chhièn lòi chhiu hó, se ke fûn-chên cho-tet chhṳ-kâ chhú-lî. Kì-têu án-ngiòng fûn-tâm ngì ke chit-ngim, ngì ke tâm-thèu chhiu-voi kha-khiâng.
[23] Na-he ngì án-ngiòng cho, Song-ti ya án-ngiòng fûn-fu ngì, ngì chhiu m̀-voi án-khioi án-thiám; liá-têu ngìn-mìn chhiu cho-tet chó têu-é phìn-phìn ôn-ôn chón vuk-hâ.”
[24] Mô-sî chiap-su kiâ chhông-mîn-ló ke kien-ngi,
[25] chhiu chhai Yî-set-lie̍t-ngìn tông-chûng sién-chhut yû nèn-li̍t ke ngìn, cho chhiên-ngìn, pak-ngìn, ńg-sṳ̍p ngìn, lâu sṳ̍p-ngìn ke liâng-chhiu.
[26] Kì-têu sùi-sṳ̀ vi ngìn-mìn phan-ton on-khien; tù-tó yû kha-nàn ke on-khien, chhiu chhiáng-sṳ Mô-sî, se ke fûn-chên chhiu chhṳ-kâ chhú-lî.
[27] Heu-lòi, Mô-sî sung kiâ chhông-mîn-ló lì-khôi, Ya̍p-thi̍t-lò chhiu chón kì ke kâ-hiông hi.