[1] “Pí-sat-lie̍t, Â-hò-li-â-pak, lâu khì-thâ chîn-lìn ke kûng-ngìn, chhiu-he só-yû mùng Song-chú sóng-su kî-su̍t lâu chhòi-nèn, tî ngióng-pân yàng-chho sṳn-chong-phùng ke ngìn, chhiòn-phu oi on-cheu Song-chú ke fûn-fu hi chin-hàng kok-hong kûng-chhàng.”
[2] Mô-sî seu-si̍p Pí-sat-lie̍t, Â-hò-li-â-pak, lâu só-yû mùng Song-chú sóng-su chhòi-nèn, ngien-yi hia̍p-chhu kûng-chok ke ngìn, fûn-fu kì-têu khôi-kûng.
[3] Kì-têu tui Mô-sî liâng-chéu Yî-set-lie̍t-ngìn vi-tó hí sṳn-chong-phùng só fung-hien ke chhiòn-phu lî-vu̍t. Chúng-he, tak-ngit chêu-sṳ̀n, ngìn-mìn hàn-he ki-siu̍k tai lî-vu̍t lòi, kâu-pûn Mô-sî.
[4] Heu-lòi, ke-têu fu-chit kien-chuk ke kûng-ngìn chhiam-thìn kì-têu ke kûng-chok,
[5] hi-kien Mô-sî, kóng: “Ngìn-mìn só-hien ke lî-vu̍t yí-kîn chhêu-ko Song-chú fûn-fu ke kûng-chhàng só sî-yeu ke.”
[6] Só-yî Mô-sî min-lin chhiòn-yàng, ham ngìn-mìn mò-lun nàm-ńg m̀-sṳ́ chai vi sṳn-chong-phùng fung-hien; án-ngiòng, ngìn-mìn chang mò ki-siu̍k fung-hien.
[7] Yîn-vi só sû-tó ke lî-vu̍t nâ-lòi vàn-sṳ̀n chhiòn-phu ke kûng-chhàng yí-kîn la-yung, hàn-yû hó-chhûn.
[8] Chhai kûng-chok ngìn-yèn chûng ke-têu chui chîn-lìn ke kûng-ngìn fu-chit hí sṳn-chong-phùng. Kì-têu yung sṳ̍p-puk chong-man cho sṳn-chong-phùng; liá chong-man he yung mà-sâ lâu làm-set, chṳ́-set, chhṳ̂m-fùng set ke phong-sien chhiak ke, yu yung yu-siu ke sú-kûng siu kî-lu-pak ke thù-on,
[9] mî-yit puk thai-se siông-thùng, chhòng sṳ̍p-ngi kûng-chhak, fat lióng kûng-chhak.
[10] Kì-têu chiông ńg-puk liòn khiung-ha, sàng-cho yit-chû, nang-ngoi ńg-puk ya he án-ngiòng.
[11] Kì-têu chhai mî-yit chû chong-man chui-mî yit-puk ke piên liòn làm-set ke néu-phan.
[12] Kì-têu chiông ńg-sṳ̍p chak néu-phan liòn chhai thi-yit chû ke thèu-puk, nang-ngoi ńg-sṳ̍p chak néu-phan liòn chhai thi-ngi chû ke chui-mî yit-puk.
[13] Kì-têu yu chho ńg-sṳ̍p chak kîm kiêu-é, chiông lióng-chû chong-man lièn khiung-ha, sàng-cho kûi-te chong-phùng.
[14] Kì-têu yu yung sân-yòng-mô chhiak sṳ̍p-yit puk chong-man lòi-cho sṳn-chong-phùng ke phùng-táng.
[15] Mî-yit puk thai-se siông-thùng, chhòng sṳ̍p-sâm kûng-chhak, fat lióng kûng-chhak.
[16] Kì-têu chiông ńg-puk liòn khiung-ha, sàng-cho yit-chû, khì-thâ liuk-puk nang-ngoi cho yit-chû.
[17] Kì-têu chhai thi-yit chû chong-man chui-mî yit-puk ke piên liòn ńg-sṳ̍p chak néu-phan, nang-ngoi yit-chû ke piên ya liòn ńg-sṳ̍p chak néu-phan.
[18] Kì-têu cho ńg-sṳ̍p chak thùng kiêu-é, chiông lióng-chû chong-man lièn hí-lòi, sàng-cho kûi-te phùng-táng.
[19] Kì-têu nang-ngoi yu yung yit-te ngiam-fùng ke yòng-kú-phì lâu nang-ngoi yit-te chhin-chiâng ke phì-liau chho lióng-te phùng-táng, cho sṳn-chong-phùng chui ngoi-chhèn ke táng-koi.
[20] Kì-têu yung kîm-ha̍p-fôn-muk chho hí sṳn-chong-phùng ke kut-ka.
[21] Tak-kî kut-ka kô si kûng-chhak, fat liuk-sṳ̍p liuk kûng-fûn,
[22] kok-yû lióng-chak sún-thèu, yung-lòi lièn-chiap kut-ka. Só-yû ke kut-ka chhiòn-phu yû liá-chúng sún-thèu.
[23] Kì-têu chhai sṳn-chong-phùng ke nàm-phién cho ngi-sṳ̍p kî kut-ka,
[24] ka-tái yû si-sṳ̍p chak ngiùn-chho, tak-kî kut-ka yû lióng-chak ngiùn-chho ku-thin.
[25] Kì-têu yu chhai sṳn-chong-phùng ke pet-phién cho ngi-sṳ̍p kî kut-ka,
[26] lâu si-sṳ̍p chak ngiùn-chho, tak-kî kut-ka tái-hâ lióng-chak ngiùn-chho.
[27] Chhai sṳn-chong-phùng ke heu-poi, chhiu-he phùng ke sî-phién, kì-têu chho liuk-kî kut-ka;
[28] lióng-thèu lióng-chak chón-kok kâ lióng-kî kut-ka.
[29] Chón-kok lióng-kî kut-ka ke hâ-poi siông lièn-chiap, yit-chhṳ̍t lièn-to táng-thèu, sàng-cho yit-chak chón-kok; lióng-chak chón-kok ke lióng-kî kut-ka chhiòn-phu he án-ngiòng lièn-cho yit-ha.
[30] Só-yî yit-khiung yû pat-kî kut-ka lâu sṳ̍p-liuk chak ngiùn-chho, mî-yit kî kut-ka tái-hâ kok-yû lióng-chak ngiùn-chho.
[31] Kì-têu yu yung kîm-ha̍p-fôn-muk chho sṳ̍p-ńg kî vàng-kong; sṳn-chong-phùng yit-phién ke kut-ka yû ńg-kî vàng-kong,
[32] nang-ngoi yit-phién ńg-kî; phùng ke heu-poi, chhiu-he phùng ke sî-phién, ya-yû ńg-kî.
[33] Chûng-kiên ke vàng-kong ôn chhai kut-ka pan tûng-ông, tui phùng ke liá-thèu thûng-to nang-ngoi ke-thèu.
[34] Kì-têu yung kîm pâu-tén kut-ka, pin ôn kîm khiên-é, pûn vàng-kong chhôn-ko; vàng-kong ya yung kîm pâu-tén.
[35] Kì-têu yung mà-sâ lâu làm-set, chṳ́-set, chhṳ̂m-fùng set ke phong-sien lòi-chhiak yit-puk chong-man, táng-kô yung yu-siu ke sú-kûng siu kî-lu-pak ke thù-on.
[36] Kì-têu yu yung kîm-ha̍p-fôn-muk chho si-kî koa chong-man ke chhû-é, chhû-é yung kîm pâu-tén; chhû-é táng yû kîm kiêu-é. Kì-têu yu vi chhû-é chho si-chak ngiùn-chho.
[37] Kì-têu yu yung mà-sâ lâu làm-set, chṳ́-set, chhṳ̂m-fùng set ke phong-sien, yung siu-fâ ke sú-kûng, vi sṳn-chong-phùng mùn-héu lòi-chhiak yit-puk mùn-liàm.
[38] Kì-têu vi liá-puk mùn-liàm chho ńg-kî chhû-é, chhû-é táng yû kiêu-é. Chhû-táng lâu chhû-é táng ke kong-é chhiòn-phu yung kîm pâu-tén; yu vi chhû-é chho ńg-chak thùng-chho.