[1] “Ngì oi sṳ́ ngiâ-kô Â-lùn lâu kiâ lai-é Nâ-tap, Â-pí-fu, Yî-li-â-sat, Yî-thâ-mâ tui Yî-set-lie̍t-ngìn tông-chûng fûn-phe̍t chhut-lòi, to ngì sṳ̂n-piên cho chi-sṳ̂ lòi sṳ-fung Ngài.
[2] Oi vi ngiâ-kô Â-lùn cho chi-sṳ̂ ke sṳn-fu̍k, sṳ́ kì yû chûn-ngiàm yu phai-thèu.
[3] Ngì oi chiông só-yû Ngài pûn kì yû kî-su̍t ke sṳ̂-fu hêm-lòi, fûn-fu kì-têu vi Â-lùn cho sâm-fu, pûn kì fûn-phe̍t chhut-lòi cho chi-sṳ̂ lòi sṳ-fung Ngài.
[4] Oi fûn-fu kì-têu cho hiûng-phài, yî-fut-tet sṳn-fu̍k, ngoi-sâm, yû chhiak-fâ ke nui-phàu, mo-é, yêu-tai. Kì-têu oi vi ngiâ-kô Â-lùn lâu kì ke-têu lai-é cho liá-têu sṳn-fu̍k, pûn kì-têu cho chi-sṳ̂ lòi sṳ-fung Ngài.
[5] Ke-têu sṳ̂-fu oi yung kîm-sien, làm-set, chṳ́-set, chhṳ̂m-fùng set ke phong-sien, lâu mà-sâ lòi chhiak.
[6] “Kì-têu oi yung kîm-sien, làm-set, chṳ́-set, chhṳ̂m-fùng set ke phong-sien, lâu mà-sâ, yung yu-siu ke sú-kûng cho yî-fut-tet sṳn-fu̍k.
[7] Oi chhai yî-fut-tet lióng-phién liòn lióng-thiàu cho-tet kiê ke kiên-tai.
[8] Oi yung khiung-yong ke chhòi-liau chhiak yit-thiàu tai-é, liòn chhai yî-fut-tet, pûn kì sàng-cho kûi-te.
[9] Oi nâ lióng-te fùng-mâ-nó, chhai táng-kô khat Yî-set-lie̍t sṳ̍p-ngi ke lai-é ke miàng,
[10] cheu kì-têu chhut-se ke sun-si, chhai tak-te pó-sa̍k táng-kô khat liuk-ke miàng.
[11] Oi ham sú-kûng hó ke tá-sa̍k sṳ̂-fu chhai lióng-te pó-sa̍k táng-kô khat Yî-set-lie̍t ke-têu lai-é ke miàng, chiông pó-sa̍k siông chhai kîm-sṳ̂-khiên tú,
[12] yèn-heu liòn chhai yî-fut-tet ke kiên-tai song, thoi-péu Yî-set-lie̍t sṳ̍p-ngi kî-chhu̍k. Án-ngiòng, Â-lùn ke kiên-thèu voi tai-tén sṳ̍p-ngi kî-chhu̍k ke miàng, pûn Ngài — Song-chú yún-yén ki-tet Ngài ke chṳ́-mìn.
[13] Oi tá lióng-chak kîm-sṳ̂-khiên,
[14] lâu lióng-thiàu sùn-kîm ke lien-é; lien-é oi chhiong nò-hó ke sok-è án-ngiòng, kiet chhai kîm-sṳ̂-khiên táng-kô.”
[15] “Oi yung yu-siu ke sú-kûng vi thai-chi-sṳ̂ chho yit-chak phan-ton ke hiûng-phài, chhiu-he yung-lòi thûi-son Song-ti chṳ́-yi ke hiûng-phài; lâu chho yî-fut-tet khiung-yong, oi yung kîm-sien, làm-set, chṳ́-set, chhṳ̂m-fùng set ke phong-sien, lâu mà-sâ liòn-hó.
[16] Hiûng-phài oi cho si-fông hìn ke, thia̍p-cho lióng-chhèn, chhòng ngi-sṳ̍p ngi kûng-fûn, fat ngi-sṳ̍p ngi kûng-fûn.
[17] Oi chhai hiûng-phài táng-kô siông si-hòng pó-sa̍k: thi-yit hòng oi siông fùng-pó-sa̍k, vòng-ngiu̍k, lâu fùng-ngiu̍k;
[18] thi-ngi hòng liu̍k-pó-sa̍k, làm-pó-sa̍k, lâu chon-sa̍k;
[19] thi-sâm hòng chṳ́-ngiu̍k, pha̍k-mâ-nó, lâu chṳ́-chîn;
[20] thi-si hòng súi-chhông-ngiu̍k, fùng-mâ-nó, lâu pit-ngiu̍k. Liá-têu chhiòn-phu oi siông chhai kîm-sṳ̂-khiên táng-kô.
[21] Sṳ̍p-ngi te pó-sa̍k ke mî-yit te oi khat-sông Yî-set-lie̍t yit-ke lai-é ke miàng, thoi-péu Yî-set-lie̍t sṳ̍p-ngi kî-chhu̍k.
[22] Oi yung sùn-kîm chho hiûng-phài ke lien-é, chhiong nò-hó ke sok-è.
[23] Oi chho lióng-chak kîm khiên-é, ôn chhai hiûng-phài táng-kô ke lióng-thèu,
[24] chiông ke lióng-thiàu kîm lien-é chhôn chhai hiûng-phài lióng-thèu ke khiên-é tú.
[25] Lien-é ke nang-ngoi lióng-thèu oi chhôn chhai lióng-chak kîm-sṳ̂-khiên tú, án-ngiòng ke-têu chhiu lièn chhai yî-fut-tet thèu-chhièn ke kiên-tai táng-kô.
[26] Oi chho lióng-chak kîm khiên-é, ôn chhai hiûng-phài hâ-poi ke lióng-thèu, vá-khiun yî-fut-tet ke nui-piên.
[27] Oi chai chho lióng-chak kîm khiên-é, chiap chhai yî-fut-tet thèu-chhièn lióng-thiàu kiên-tai ke hâ-poi, vá-khiun liòn ke thi-fông, chhai sú-kûng chhiak ke tai-é táng-kô.
[28] Oi yung làm-set ke tai-é chiông hiûng-phài ke khiên-é lâu yî-fut-tet ke khiên-é thak khiung-ha, sṳ́ hiûng-phài thiap chhai yî-fut-tet ke tai-é táng-kô, chhiu m̀-voi lut-thet.
[29] “Â-lùn chin-ngi̍p sṳn-só ke sṳ̀, oi kiê-tén liá khat-yû Yî-set-lie̍t sṳ̍p-ngi kî-chhu̍k miàng, phan-ton ke hiûng-phài; án-ngiòng, Ngài — Song-chú chhiu yún-yén ki-tet Ngài ke chṳ́-mìn.
[30] Oi chiông vû-lìn lâu thú-mìn piong chhai phan-ton ke hiûng-phài tú, pûn Â-lùn ngi̍p-to Ngài — Song-chú mien-chhièn ke sṳ̀ cho-tet kiê-tén. Án-ngiòng, Â-lùn chhai Ngài mien-chhièn ke sṳ̀ yit-thin oi sòng-sòng tai-tén phan-ton ke hiûng-phài, kì chang-nèn thûi-son Ngài tui Ngâ chṳ́-mìn Yî-set-lie̍t ke chṳ́-yi.”
[31] “Chok chhai yî-fut-tet tái-hâ ke chhòng-sâm oi vàn-chhiòn yung làm-set ke phong-sien lòi chhiak.
[32] Chhòng-sâm ke tûng-ông oi vi-tó thèu-nà liù yit-ke khûng-é cho liâng-héu; chû-vì oi kâ-chhiak liâng-piên, chang m̀-voi lie̍t-thet.
[33] Chhòng-sâm hâ-poi ke sâm-sùn oi yung làm-set, chṳ́-set, chhṳ̂m-fùng set ke phong-sien chhiak cho sa̍k-liù,
[34] yu oi yung sùn-kîm ke se lìn-lòng kak chhai sa̍k-liù chûng-kiên.
[35] Â-lùn chṳp-hàng chi-sṳ̂ chṳt-vu ke sṳ̀, yit-thin oi chok liá chhòng-sâm. Tông kì chin-ngi̍p sṳn-só, to Ngài mien-chhièn ya-he thui-chhut ke sṳ̀, Ngài chhiu voi thâng-tó se lìn-lòng ke sâng; án-ngiòng, kì chhiu m̀-voi sí.
[36] “Oi yung sùn-kîm chho yit-mien phài-è, táng-kô khat-tén ‘Kûi Song-chú vì-sṳn’.
[37] Oi yung làm-set ke tai-é chiông kì kiê chhai mo-é thèu-chhièn.
[38] Â-lùn oi chiông liá phài-è koa chhai ngiak-thèu lòi tâm-tông Yî-set-lie̍t-ngìn fam-tó sṳn-vu̍t thiàu-li ke chhui. Án-ngiòng, Ngài — Song-chú chhiu-voi fôn-hí chiap-na̍p ngìn-mìn hien-pûn Ngài só-yû ke lî-vu̍t. Â-lùn oi yit-chhṳ̍t chiông liá phài-è koa chhai ngiak-thèu.
[39] “Oi nâ mà-sâ cho Â-lùn ke nui-sâm, ya oi yung mà-sâ cho mo-é, yung yû siu-fâ ke liau-é cho yêu-tai.
[40] “Oi vi Â-lùn ke-têu lai-é cho nui-sâm, yêu-tai, lâu mo-é, sṳ́ kì-têu yû chûn-ngiàm lâu phai-thèu.
[41] Oi chiông liá-têu sâm-fu chok chhai ngiâ-kô Â-lùn lâu kì ke-têu lai-é sṳ̂n-hong, yu-oi kò kám-lám-yù, su sṳn-chṳt pûn kì-têu, sat-li̍p kì-têu cho chi-sṳ̂ sṳ-fung Ngài.
[42] Oi yung mà-sâ cho-fu pûn kì-têu chok; fu oi tui yêu-kiên to chhit-thèu, châ-tén ha-thí.
[43] Â-lùn lâu kì ke-têu lai-é chin-ngi̍p sṳn-chong-phùng to Ngài mien-chhièn, ya-he chhai sṳn-só chṳp-hàng chi-sṳ̂ chṳt-vu ke sṳ̀, yit-thin oi chok liá fu, miên-tet hien-chhut ha-thí chṳ-sí. Liá he vi Â-lùn lâu kì ke heu-thoi só-thin yún-yén ke li-kûi.”