[1] Song-chú tui Mô-sî kóng:
[2] “Ngài yí-kîn tui Yù-thai kî-chhu̍k sién-chhut Fu-ngí ke sûn-é, Vû-li ke lai-é Pí-sat-lie̍t.
[3] Ngài ke Lìn yí-kîn chhûng-mân kì; Ngài yû su-pûn kì chhûng-mìn, chhòi-nèn, kî-su̍t, voi-cho kok-yong sú-ngi,
[4] chhiong sat-kie thù-on, yung kîm, ngiùn, thùng chṳ-chho kok-chúng yung-phín;
[5] voi khat oi siông ke pó-sa̍k; nèn khat su-é; hàn-voi khì-thâ kok-yong khì-kháu ke sú-ngi.
[6] Ngài yu tui Tan kî-chhu̍k chṳ́-phai Â-hî-sat-mat ke lai-é Â-hò-li-â-pak cho kì ke chhu-sú. Ke-têu yû khì-kháu kî-su̍t ke ngìn, Ngài ya-yû su-pûn kì-têu chhòi-nèn, sṳ́ kì-têu voi cho Ngài só fûn-fu ke kok-chúng yung-phín:
[7] chhiu-he sṳn-chong-phùng, yok-khui, yok-khui táng-kô su̍k-chhui ke koi-é, sṳn-chong-phùng ke só-yû yung-phín,
[8] kiûng-chok lâu só-yû ke yung-phín, sùn-kîm ke tên-thòi lâu só-yû ke yung-phín, hiông-thàn,
[9] hien sêu-fa-chi ke thàn lâu só-yû ke yung-phín, sé-thông-phùn lâu phùn-chho,
[10] sú-kûng tông-yu ke chi-sṳ̂ sṳn-fu̍k — Â-lùn lâu kì ke-têu lai-é chṳp-hàng chi-sṳ̂ chṳt-vu ke sṳ̀ só-chok ke sṳn-fu̍k,
[11] sṳn-yù, lâu sṳn-só só yung ke tông-hiông ke hiông. Liá yit-chhiet kì-têu yit-thin oi chhiòn-phu cheu Ngài só fûn-fu ke hi-cho.”
[12] Song-chú fûn-fu Mô-sî chón-ko Yî-set-lie̍t-ngìn, kóng:
[13] “Ngì-têu yit-thin oi sú Ngài ke ôn-sit-ngit; yîn-vi liá he ngì-têu lâu Ngài chûng-kiên yún-yén ke chṳn-kí, péu-sṳ Ngài — Song-chú kién-sién ngì-têu cho Ngài sṳn-kiet ke chṳ́-mìn.
[14] Ngì-têu oi sú ôn-sit-ngit, yîn-vi liá-ngit he sṳn-ngit. Só-yû m̀ chûn-sú, chhai liá-ngit cheu-sòng hi kûng-chok ke ngìn yit-thin oi chhú sí-hìn.
[15] Ngì-têu liuk-ngit cho-tet kûng-chok, chúng-he thi-chhit ngit he ôn-sit sṳn-ngit, he hien-pûn Ngài ke; só-yû chhai ôn-sit-ngit kûng-chok ke ngìn yit-thin oi chhú sí-hìn.
[16] Yî-set-lie̍t-ngìn oi sṳ-sṳ thoi-thoi chûn-sú ôn-sit-ngit, cho yún-yén ke yok.
[17] Liá he Yî-set-lie̍t-ngìn lâu Ngài chûng-kiên yún-yén ke chṳn-kí; yîn-vi Ngài — Song-chú chhai liuk-ngit nui chhóng-chho thiên-thi, chhai thi-chhit ngit thìn-kûng hiet-khun.”
[18] Song-ti chhai Sî-nai-sân táng tui Mô-sî kóng liá-têu fa yî-heu, chhiu chiông lióng-te sa̍k-pán kâu-pûn kì; Song-ti yung sú-chṳ́ chhai sa̍k-pán táng siá-hâ Kì ke kie-min.