[1] Pí-sat-lie̍t yung kîm-ha̍p-fôn-muk chho yok-khui, chhòng yit-pak yit-sṳ̍p kûng-fûn, fat liuk-sṳ̍p liuk kûng-fûn, kô liuk-sṳ̍p liuk kûng-fûn.
[2] Kì yung sùn-kîm chiông khui-é ke nui-ngoi chhiòn-phu pâu-tén, si-mien siông chhṳ́-hìn kîm-piên.
[3] Kì yu chho si-chak chhôn kong-é yung ke kîm khiên-é, ôn chhai khui-é ke si-kiok song, yit-phién lióng-chak.
[4] Kì yung kîm-ha̍p-fôn-muk chho lióng-kî kong-é, yung kîm pâu-tén,
[5] nâ-lòi chhôn-ko khui-é lióng-phién ke kîm khiên-é.
[6] Kì yung sùn-kîm chho yit-chak khui-é koi, chhiu-he su̍k-chhui koi, chhòng yit-pak yit-sṳ̍p kûng-fûn, fat liuk-sṳ̍p liuk kûng-fûn,
[7] yu yung kîm-é chhùi-chhut lióng-chak kî-lu-pak,
[8] ngiàm chhai koi-é táng, yit-thèu yit-chak, sàng-cho koi-é ke yit phu-fun.
[9] Lióng-chak kî-lu-pak mien-tui-mien, tá-khôi yi̍t-kap, châ-tén khui-é koi.
[10] Pí-sat-lie̍t yung kîm-ha̍p-fôn-muk chho yit-chông chok-è, chhòng pat-sṳ̍p pat kûng-fûn, fat si-sṳ̍p-si kûng-fûn, kô liuk-sṳ̍p liuk kûng-fûn.
[11] Kì yung sùn-kîm lòi pâu-tén, pin chhai si-mien siông chhṳ́-hìn kîm-piên.
[12] Chok-è ke chû-vì yû kâ chhit-sṳ̍p ńg kûng-lì fat ke khiông-é, khiông-é yû siông chhṳ́-hìn kîm-piên.
[13] Kì chho si-chak yung-lòi kông ke kîm khiên-é, ôn chhai chok-è si-kok ke kiok-táng.
[14] Kîm khiên-é ôn kha-khiun khiông-é, pûn kông chok-è ke kong-é chhôn ko-hi.
[15] Kì yung kîm-ha̍p-fôn-muk chho lióng-kî kong-é, yung kîm pâu-tén.
[16] Kì yu yung sùn-kîm chho chok-táng ke yung-phín, chhiu-he phàn-è, vón, hàn-yû kin-sṳ̀n yung ke chiú-fù lâu chiú-pî.
[17] Kì yung sùn-kîm chho yit-chho tên-thòi. Tên-chho lâu chhû-é yung kîm-é tá-chho; chông-sṳt ke fâ-lúi, fâ-thok, fâ-phan, chhiòn-phu tá to lièn khiung-ha.
[18] Tên-thòi lióng-phién chhûn-chhut liuk-kî kî-é, yit-phién sâm-kî.
[19] Tak-kî kî-é yû sâm-lùi fâ, hìn-chhong chhiong hen-fâ, yû fâ-thok lâu fâ-phan.
[20] Tên-thòi ke chhû-é yû si-lùi fâ, hìn-chhong chhiong hen-fâ, yû fâ-thok lâu fâ-phan.
[21] Sâm-tui kî-é ke mî-yit tui hâ-poi yû yit-ke fâ-thok.
[22] Fâ-thok, kî-é, lâu tên-thòi chhiòn-phu he yung kûi-te sùn-kîm tá chhut-lòi ke.
[23] Kì vi tên-thòi chho chhit-chán tên, yu yung sùn-kîm chho tên-fâ chién-tô lâu tên-phàn.
[24] Kì yung sâm-sṳ̍p ńg kûng-kîn ke sùn-kîm chho tên-thòi lâu só-yû yung-phín.
[25] Kì yung kîm-ha̍p-fôn-muk chho yit-chho sêu-hiông ke thàn. Thàn he si-fông ke, chhòng si-sṳ̍p ńg kûng-fûn, fat si-sṳ̍p-ńg kûng-fûn, kô kiú-sṳ̍p kûng-fûn. Liá-thàn ke si-chak kok lâu thàn lièn-cho kûi-te.
[26] Kì yung sùn-kîm pâu-tén thàn ke táng-kô, si-piên lâu si-kok, chû-vì siông chhṳ́-hìn kîm-piên.
[27] Kì yu chho lióng-chak yung-lòi kông-thàn ke kîm khiên-é, ôn chhai thàn lióng-phién kîm-piên hâ-poi, pûn kông-thàn ke kong-é chhôn ko-hi.
[28] Kì yung kîm-ha̍p-fôn-muk chho kong-é, yung kîm pâu-tén.
[29] Kì ya yung chho hiông-súi ke fông-fap lòi chṳ-chho sṳn-yù lâu chhin-hiông ke song-tén hiông.