[1] Yî-set-lie̍t ke-têu lai-é tak-sà tai-tén kâ-su̍k, lâu Ngâ-kok khiung-ha to Âi-khi̍p hi. Kì-têu ke miàng he:
[2] Lî-phien, Sî-mién, Li-vi, Yù-thai,
[3] Yî-sat-kâ, Sî-pu-lùn, Phien-ngâ-mén,
[4] Tan, Nâ-fut-thâ-li, Kâ-tet, Â-sat.
[5] Ngâ-kok chhòn-hâ ke chṳ́-sûn, chúng-su yû chhit-sṳ̍p ngìn. Ngâ-kok nang-ngoi yit-ke lai-é Yok-sit chó chhiu chhai Âi-khi̍p.
[6] Heu-lòi, Yok-sit sí-thet, kì ke-têu hiûng-thi lâu ke sṳ-thoi ke ngìn ya chhiòn-phu sí-thet.
[7] Chúng-he, kì-têu ke heu-thoi, chhiu-he Yî-set-lie̍t-ngìn, ngìn-khiéu chen-kâ tông-kiak, tông-vong tông-khiòng; Âi-khi̍p koet-nui tak-vi khon tet-tó kì-têu.
[8] Heu-lòi, Âi-khi̍p yû yit-ke sîn-vòng hîn-hí, kì tui Yok-sit ke sṳ vàn-chhiòn m̀-tî.
[9] Kì tui Âi-khi̍p-ngìn kóng: “Liá-têu Yî-set-lie̍t-ngìn yu-tô yu khiòng-chong, tui ngài-têu he chhin-thai ke vî-hia̍p.
[10] Na-he fat-sên chan-chên, kì-têu khó-nèn lâu thi̍t-ngìn lièn-ha̍p kûng-tá ên-têu, lì-khôi ngài-têu ke koet-kâ. Ngài-têu yit-thin oi sat-fap mo̍k pûn kì-têu ke ngìn-khiéu chen-kâ.”
[11] Só-yî Âi-khi̍p-ngìn chṳ́-phai kam-kûng, khiòng-pet Yî-set-lie̍t-ngìn cho khú-kûng, ham kì-têu hí Pí-tûng-sàng lâu Làn-sai-sàng, lòi-cho koet-vòng ke pú-kip chûng-sîm; yung liá fông-fap lòi tá-kit kì-têu ke sîm-chhìn.
[12] Chúng-he Âi-khi̍p-ngìn ye̍t fái khoán-thai Yî-set-lie̍t-ngìn, Yî-set-lie̍t-ngìn chhiu ye̍t-kiung ye̍t-tô, ngìn-khiéu fûn-phu ye̍t-fat; só-yî Âi-khi̍p-ngìn chhin-kiâng Yî-set-lie̍t-ngìn.
[13] Âi-khi̍p-ngìn khiòng-khiòng pet Yî-set-lie̍t-ngìn cho tông-chhûng ke khú-kûng,
[14] châu-tha̍p kì-têu, oi kì-têu lien-nài cho chôn-é, yu oi cho thièn-tú yit-chhiet ke kûng-chok, sṳ́ kì-têu fî-sòng thung-khú.
[15] Âi-khi̍p-vòng ham Hî-pak-lòi ke sán-phò lòi, yit-ke ôn-to Sṳ̂-fut-lâ, nang-ngoi yit-ke ôn-to Phú-â; kì fûn-fu kì-têu kóng:
[16] “Ngì-têu vi Hî-pak-lòi ke fu-ńg chiap-sên ke sṳ̀, na-he kì-têu kiung ke he se-lai-é, oi chiông kì chhṳ̀-thet; na-he se-moi-é, chhiu liù kì ke sâng-miang.”
[17] Chúng-he liá lióng-ke sán-phò kin-vi Song-ti, mò cheu Âi-khi̍p-vòng ke min-lin cho; kì-têu hàn-he liù se-lai-é ke sâng-miang.
[18] Só-yî Âi-khi̍p-vòng hêm lióng-ke sán-phò lòi, mun kì-têu: “Ngì-têu cho-má-ke án-ngiòng cho? Cho-má-ke liù se-lai-é ke sâng-miang nè?”
[19] Sán-phò en vòng kóng: “Hî-pak-lòi ke fu-ńg mò chhiong Âi-khi̍p ke fu-ńg; kì-têu tông chap, ngài-têu hàn-màng kón-to, kì-têu yí-kîn kiung lé.”
[20] Yîn-vi sán-phò kin-vi Song-ti, Song-ti thi̍t-phe̍t khon-ku kì-têu, pûn kì-têu yû chhṳ-kâ ke kâ-thìn. Yî-set-lie̍t-ngìn ki-siu̍k chen-kâ, ye̍t-lòi ye̍t-khiòng.
[22] Chui-heu, Âi-khi̍p-vòng min-lin chhiòn-koet ngìn-mìn kóng: “Hî-pak-lòi-ngìn yit-chhiet só-kiung ke se-lai-é, oi chhiòn-phu fit-lo̍k Nì-lò-hò, se-moi-é ke sâng-miang chhiu liù hâ-lòi.”