[1] اوغلوم، تعلئمئمی یاددان چیخارتما، قوی اوره‌یئن سنه وردئیئم امرلره عمل اتسئن؛
[2] اونلار سنئن عؤمرونو اوزادار، حیاتینا ائللر وِرَر، آراملیق وِرَر.
[3] قویما مهرئبانلیق و وفا سنی بوراخسین؛ اونلاری بوینونا باغلا، اونلاری اوره‌یئنئن لؤوحه‌سئنه یاز.
[4] بله‌جه تاری و ائنسان گؤزونده لوطف و اعتئبار قازانارسان.
[5] بوتون اوره‌یئنله ربّه توکّول ات و اؤز آنلاغینا دایانما.
[6] بوتون یوللاریندا اونو تانی؛ او، سنئن یوللارینی دوز ادر.
[7] اؤز گؤزونده حئکمتلی اولما؛ ربدن قورخ، پئسلئکدن دؤن.
[8] بو سنئن بدنئنه شفا، سوموکلرئنه ائلئک اولار.
[9] مال-دؤولتئنله، بوتون محصوللارینین نوباری ائله ربّه عئزّت ور.
[10] بله‌جه آنبارلارین نعمتله دولار، شراب چَنلَرئن تزه شرابلا دولوب داشار.
[11] اوغلوم، ربّئن تربئیه‌سئنی حقئر گؤرمه. اونون تأدئبئندن نئفرت اتمه.
[12] آتا سودئیی اوغولو نجه توبئخ ادر، رب ده سودئیئنی اله توبئخ ادر.
[13] خوش او آدامین حالینا کی، حئکمتی تاپیر، فراستی قازانیر.
[14] چونکی او قازانج، گوموش قازانجیندان، قیزیل گلئرئندن داها یاخشی‌دیر.
[15] حئکمت یاقوتلاردان داها دَیَرلی‌دئر، جانین ائسته‌دئیی هچ بئر شی اونا برابر گلمز.
[16] اونون صاغ اَلئنده اوزون عؤمور، سول الئنده ثروت و شرف وار،
[17] اونون یوللاری، گؤزل‌لئک یوللاری، بوتون طرئقلری امئن-آمانلیقدیر.
[18] حئکمت، اونو توتانلارا حیات آغاجی‌دیر، اونا باغلانان بوتون آداملار نه بختوردئرلر!
[19] رب حئکمت وسئله‌سی ائله یرئن بونؤوره‌سئنی قویدو، فراست واسئطه‌سی ائله گؤیلری برقرار اتدی.
[20] معرئفتئنئن واسئطه‌سی ائله درئنلر یاریلدی، بولودلار شح دامیزدیردیلار.
[21] اوغلوم، قویما بونلار گؤزوندن آیریلسین، شوعور و دوشونجه‌نی برک توت.
[22] اونلار جانینا حیات اولار، بوینونا زئنت اولار.
[23] او زامان، یولوندا امئن-آمانلیقلا گدرسن، آیاقلارین بودره‌مز.
[24] یاتان زامان دهشته دوشمزسن، بلی، یاتارسان، شئرئن یوخو تاپارسان.
[25] قفئلدن گلن دهشت، شر آداملارا گلن طوفان سنی قورخوتماز.
[26] چونکی توکّول اتدیئن ربدئر، او، سنئن آیاقلارینی تله‌لردن حئفظ ادر.
[27] اگر الئندن بئر یاخشیلیق گلئر، اونو، اونا مؤحتاج اولان آداملاردان کسمه.
[28] ائمکانین وارسا، قونشونا دمه؛ «گت، سورا گل، صاباح سنه وره‌رم.»
[29] یانیندا ساکئت یاشایان قونشون اوچون، شر قورما.
[30] سنه پئسلئک اتمه‌ین بئر آداملا سببسئز داعوالاشما.
[31] ظالئم آداما حسد آپارما، او گدن یوللارین هچ بئرئنی سچمه.
[32] چونکی یولدان آزان آدام ربّه مکروهدور، آمّا رب عملی-صالحلرله دوست اولار.
[33] ربّئن لعنتی شر آدامین اِوئنده‌دئر، لاکئن صالح ائنسانلارین اِوئنه برکت ورئر.
[34] او، رئشخند ادنلره رئشخند اده‌جک، آمّا مظلوم ائنسانلارا لوطف گؤرسده‌جکدئر.
[35] حئکمتلی‌لرئن مئراثی شرف اولاجاق، لاکئن آخماقلارین پایی خجالتدئر.