[1] ائسرایئل پادشاهی، داوودون اوغلو سولیمانین مثل‌لری:
[2] حئکمت و تربئیه‌نی بئلمک اوچون، آنلاقلی سؤزلری باشا دوشمک اوچون،
[3] صالحلئک، عدالت و ائنصاف باره‌ده عاغیلّی تربئیه‌نی آلماق اوچون،
[4] جاهئل آداملارا شوعور، جاوان اوغلانا معرئفت و دوشونجه ورمک اوچون؛
[5] قوی حئکمتلی آدام قولاق آسیب علمی آرتیرسین و فهئم آدام تدبئر قازانسین.
[6] اوندان اؤتری کی، مثل‌لر و کئنایه‌لری، حئکمتلی آداملارین سؤزلر و تاپماجالارینی آنلاسین.
[7] ربدن قورخماق معرئفتئن باشلانیشی‌دیر، آمّا سفه‌لر حئکمت و تربئیه‌نی حقئر گؤرَرلر.
[8] اوغلوم، آتانین وردئیی تربئیه‌نی اشئت، آنانین اؤیرتدئکلرئنی بوراخما.
[9] چونکی سنئن باشینا گؤزل بئر چَلَنگ کئمی، بوینونا بویونباغی کئمی اولار.
[10] اوغلوم، اگر گوناهکارلار سنی آزدیرماق ائسته‌سه‌لر، راضی اولما.
[11] اگر دسه‌لر: «بئزئمله گل، قوی قان تؤکمک اوچون گئزله‌نک، ناحاق یره گوناهسیز ائنسان اوچون کمئنده گؤزله‌یک.
[12] گل اونلاری اؤلولر دئیاری کئمی دئری-دئری اوداق، دئبسئز قبئره دوشَنلر کئمی تامامن اوداق.
[13] جوربه‌جور قئیمتلی شیلر تاپاریق، قارت مالی ائله اِولرئمئزی دولدوراریق.
[14] بئزئمله آیاق اول، قوی کئسه‌مئز بئر اولسون.»
[15] اوغلوم، اونلار گدن یوللاری گتمه، آیاغینی اونلارین یولوندان اوزاق ساخلا.
[16] چونکی اونلارین آیاقلاری پئسلئک اوچون قاچیر، قان تؤکمه‌یه تله‌سئرلر.
[17] دوغرودان دا، بئر قوشون گؤزو قاباغیندا تور سرمک فایداسیزدیر.
[18] لاکئن اونلار اؤز قانلارینی تؤکمک اوچون گئزله‌نئرلر، اؤز جانلاری اوچون کمئنده گؤزله‌یئرلر.
[19] حاقسیز قازانجا طاماح ادن هر کسئن یوللاری بله‌دئر؛ طاماحی اونون جانینی آلار.
[20] حئکمت باییردا اوجا سسله چاغیریر، سسئنی میدانلاردا اوجالدیر.
[21] سسلی-کویلو کوچه‌لرئن باشیندا چیغیریر، شهرئن دروازالاریندا بله دیئر:
[22] «نه واختا کئمی سئز جاهئل آداملار، اؤز جهالتئنئزی سوه‌جکسئنئز؟ نه واختاجاق رئشخند ادنلر اؤز رئشخندلرئندن حظّ اده‌جکلر؟ آخماقلار دا معرئفتدن نئفرت اده‌جکلر؟
[23] اگر منئم مذمّتئمدن دوزَ‌لسَیدئنئز؛ روحومو اوستونوزه تؤکردئم، سؤزلرئمی ده سئزه بئلدئرَردئم.
[24] چونکی سئزی چاغیردیم، سئز منی ردّ اتدئنئز، الئمی اوزاتدیم، هچ کس دئقّت ورمه‌دی.
[25] منئم بوتون نصئحتلرئمی هچ سایدینیز، مذمّتلرئمی قبول اتمه‌دئنئز.
[26] بونا گؤره ده، بلا اوستونوزه گلنده من ده سئزه گوله‌جیم، دهشت سئزی بوروینده، من ده سئزی رئشخند اده‌جیم.
[27] دهشت سئزه طوفان کئمی هوجوم ادنده، بلا سئزه فیرلانان یل کئمی گلنده، دارلیق و زحمت اوستونوزه دوشَنده،
[28] اونلار منی چاغیراجاقلار، لاکئن من جاواب ورمه‌یه‌جیم. منی جهدله آختاراجاقلار، لاکئن تاپا بئلمه‌یه‌جکلر.
[29] چونکی اونلار معرئفتدن نئفرت اتدئلر، ربدن قورخماغی سچمه‌دئلر.
[30] منئم نصئحتلرئمی ائستمه‌یئب، بوتون مذمّتلرئمی اله سالدیلار.
[31] اونون اوچون ده، اؤز یولونون ثمره‌سئندن یئیه‌جکلر، اؤز مشورتلرئندن دویاجاقلار.
[32] چونکی جاهئل آداملارین اؤزباشینالیق‌لاری اونلاری اؤلدوره‌جک، آخماق آداملارین لاقیدلئیی اونلاری یوخ اده‌جک؛
[33] آمّا منه قولاق آسان هرکس امئن-آمانلیقدا یاشایاجاق، پئسلئیئن دهشتئندن قورخوماییب راحات قالاجاقدیر.»