[1] اوره‌یئن ترتئباتی ائنسانینکی‌دیر، آمّا دئلئن جاوابی ربدندئر.
[2] ائنسانین بوتون یوللاری اؤز نظرئنده طاهئردئر، لاکئن روحلاری تفتئش ادن ربدئر.
[3] ائشلرئنی ربّه بوراخ، فئکئرلرئن برقرار اولار.
[4] رب هر شیی مقصدئنه مووافئق یارادیب، بلی، حتّا شر آداملاری بلا گونو اوچون.
[5] اوره‌یئنده مغرور اولان آدام ربّه مکروهدور؛ دوغرودان دا جزاسیز قالماز.
[6] صالحلئک و وفا ائله فسادین اوستو اؤرتولر، ربدن قورخماقلا آدام پئسلئکدن دؤنر.
[7] آدامین یوللاری ربّئن خوشونا گلسه، دوشمنلرئنی ده اونونلا باریشدیرار.
[8] صالحلئکله قازانیلان آز شی، حاقسیز یوللا اولان بول گلئردن یاخشی‌دیر.
[9] ائنسان اوره‌یئنده اؤزو اوچون یول قورار، لاکئن رب قدملرئنی هئدایت ادر.
[10] ائلاهی قرار پادشاهین دوداقلاریندادیر؛ حؤکم اتمکده اونون آغزی گرک سهو اتمه‌سئن.
[11] دوغرو تره‌زی و چکی ربّئندئر؛ او، تورباداکی هر چکی داشینی موعیّن ادر.
[12] شرارت اتمک پادشاهلارا مکروهدور، چونکی بئر تخت صالحلئکله برقرار اولار.
[13] صالح دوداقلاردان پادشاهلار خوشلانارلار، اونلار دوز دانیشانلاری سِوَرلر.
[14] پادشاهین قضبی اؤلوم الچئسئدئر، آمّا حئکمتلی آدام اونون اوستونو اؤرتر.
[15] پادشاهین اوزونون نوروندا حیات وار، راضیلیغی یاز یاغیشی گتئرن بولودا اوخشار.
[16] حئکمت قازانماق قیزیلدان نه قدر یاخشی‌دیر! بلی، آنلاق قازانماق گوموشدن داها افضلدئر.
[17] دوز آداملارین جادّه‌سی پئسلئکدن دؤنمکدئر؛ یولونو ساخلایان آدام جانینی حئفظ ادر.
[18] هلاکتدن قاباق تکبّور گدر، ییخیلماقدان قاباق دا مغرور اورَک.
[19] مظلوم بئر آداملا باشی آشاغی اولماق، تکبّورلو آداملارلا قارت مالینی پایلاشماقدان یاخشی‌دیر.
[20] سؤزه دئقّت ادن یاخشیلیق تاپار، ربّه توکّول ادن نه بختوردئر!
[21] اوره‌یی حئکمتلی اولان دا فهئم چاغیریلار، دوداقلارین شئرئنلئیی علمی آرتیرار.
[22] عاغیل، صاحئبئنه حیات بولاغی‌دیر، لاکئن سفه‌لرئن تربئیه‌سی سفه‌لئکدئر.
[23] حئکمتلی آدامین اوره‌یی اونون آغزینی آغیلّی ادر، دوداقلاری اوستونه علم آرتیرار.
[24] خوش سؤزلر شان بالی کئمی‌دئر، جانا شئرئندئر، سوموکلره شفا.
[25] یول وار کی، آدامین قاباغیندا دوز گؤرونور، آمّا آخیری اؤلومدور.
[26] زحمتکش آدام اؤزو اوچون زحمت چکر، چونکی آج آغزی اونو مجبور ادر.
[27] یاراماز آدام پئسلئک قازار، دوداقلاریندا اله بئل کی، یاندیران اود وار.
[28] اَیری آدام داعوا سالار، سؤز گزدئرن آدام دا یاخین دوستلاری بئربئرئندن آییرار.
[29] زور دئین آدام اؤز قونشوسونو آلدادار، اونو یاخشی اولمایان بئر یولا چکر.
[30] نئیّتی حئیله‌لی اولان گؤز وورار؛ دوداق بوزَر، شر قورار.
[31] آغارمیش ساچلار شرف تاجی‌دیر، صالحلئک یولونون قازانجی‌دیر.
[32] گج قضبلنمک ائگئد اولماقدان یاخشی‌دیر، نفسئنه حاکئم اولماق دا بئر شهری آلماقدان یاخشی‌دیر.
[33] پوشک اَتَکده آتیلار، آمّا اونون هر حؤکمو ربدن گلر.