[1] اِلئشَع ددی: «ربّئن سؤزونو اِشئدئن، رب بله دیئر: ”صاباح بو ساعاتلاردا سامئره دروازاسیندا بئر اؤلچو نارین اون بئر شِکِله، ائکی اؤلچو آرپا دا بئر شِکِله ساتیلاجاق.“»
[2] او سرکرده کی، پادشاه اونون اَلئنه سؤیکَنَردی، تاری آدامینا جاواب ورئب ددی: «باخ، رب گؤیلرده پنجره‌لر آچسا دا، مگر بو ائش اولا بئلر؟» او واخت تاری آدامی ددی: «باخ، سن گؤزلرئنله بونو گؤره‌جکسن، لاکئن اوندان یِمَیه‌جکسن.»
[3] شهر دروازاسینین قاباغیندا دؤرد جوزاملی آدام وار ائدی. اونلار بئربئرلرئنه ددئلر: «نه اوچون بئز اؤلَنه قدر بورادا اوتوروب قالاق؟
[4] دِسَک شهره گئرَک، شهرده اولان آجلیقدان اؤله‌جیئک، اگر بورادا قالساق، بورادا دا اؤله‌جیئک. بونا گؤره ده گلئن اَراملی‌لارین اوردوگاهینا گدئب تسلئم اولاق. اگر بئزی صاغ بوراخسالار، صاغ قالاریق. اؤلدورسه‌لر ده، اؤله‌رئک.»
[5] اونلار اَراملی‌لارین اوردوگاهینا گتمک اوچون آخشام قالخیب آلاقارانلیغیندا اونون کنارینا گلدئلر. اورادا هچ کس یوخ ائدی.
[6] چونکی رب اَراملی‌لارین اوردوسونا دؤیوش عارابالارینین گورولتوسونو، آتلارین تاپّیلتیسینی و بؤیوک قوشونون سَسئنی اشئتدئرمئشدی. اونلار بئربئرلرئنه دِمئشدئلر: «ائسرایئل پادشاهی، خئت و مئصئر پادشاهلارینی اوجرتله توتوب کی، بئزئم اوستوموزه گلسئنلر.»
[7] اونلار آخشام آلاقارانلیغیندا قالخیب قاچمیشدیلار. چادیرلارینی، آتلارینی، اِششَکلرئنی، حتّا بوتون اوردوگاهی اولدوغو کئمی بوراخمیشدیلار. جانلارینی قورتارماق اوچون قاچمیشدیلار.
[8] بو جوزاملی‌لار اوردوگاهین کنارینا گلئب بئر چادیرا گئردئلر و یِیئب-ائچدئلر. اورادان قیزیل، گوموش و پالتار گؤتوروب گتدئلر و اونلاری گئزلَتدئلر. سونرا قاییدیب آیری بئر چادیرا گئردئلر. اورادان دا شیلر گؤتوروب گتدئلر و اونلاری دا گئزلَتدئلر.
[9] اونلار بئربئرلرئنه ددئلر: «اتدئیئمئز یاخشی دیئل، بو گون موژده گونودور، آمّا بئز ساکئت قالمیشیق. اگر سحر آچیلانا قدر گؤزله‌یَک، باشیمیزا جزا گلر. گلئن گِدَک و سارای آداملارینا بو خبری بئلدئرَک.»
[10] بله‌جه اونلار گلئب شهرئن قاپیچیلارینی سَسله‌دئلر و اونلارا بئلدئرئب ددئلر: «اَراملی‌لارین اوردوگاهینا گتدئک. باخ، اورادا هچ کس یوخ ائدی، ائنسان سَسی ده گلمئردی. آنجاق باغلی آتلار، باغلی اِششَکلر و اولدوغو کئمی قالان چادیرلار وار ائدی.»
[11] قاپیچیلار قیشقیریب بو خبری سارای ائچه‌رئسئنده اولان آداملارا بئلدئردئلر.
[12] پادشاه گجه ائکن قالخیب اعیانلارینا ددی: «ائندی سئزه دئیه‌رم کی، اَراملی‌لار بئزه نه ادئبلر: اونلار بئلئرلر کی، بئز آجیق، بونا گؤره ده اوردوگاهدان چیخیب چؤلده گئزله‌نئبلر و دیئرلر: ”شهردن چیخاندا اونلاری دئری توتاریق و شهره گئره‌رئک.“»
[13] اعیانلاردان بئری جاواب ورئب ددی: «قوی بئر نچه آدام شهرده قالمیش آتلاردان بِشئنی گؤتورسون و اونلاری گؤندَ‌رَک. قوی گدئب گؤرسونلر. اونلارین دا عاقئبتی قالان بوتون ائسرایئل جاماعاتینین عاقئبتی کئمی اولاجاق، چونکی بوتون ائسرایئل جاماعاتی هلاک اولاجاق.»
[14] اونلار آتلار قوشولموش ائکی دؤیوش عاراباسی گؤتوردولر. پادشاه اونلاری اَرام قوشونونون دالینجا گؤندَ‌رئب ددی: «گدئن گؤرون.»
[15] اونلار اَراملی‌لارین دالینجا اوردون چایینا قدر گتدئلر. بوتون یول، اَراملی‌لارین تَلَسئکدن آتدیقلاری پالتار و اشیالارلا دولو ائدی. قاصئدلر گری قاییدیب پادشاها بو خبری بئلدئردئلر.
[16] بله‌جه خالق چیخیب اَراملی‌لارین اوردوگاهینی غارَت اتدی. ربّئن ددئیی کئمی بئر اؤلچو نارین اون بئر شِکِله، ائکی اؤلچو آرپا دا بئر شِکِله ساتیلدی.
[17] پادشاه، اَلئنه سؤیکَنَن سرکرده‌نی دروازانین آغزینا قویدو. آمّا خالق دروازانین آغزیندا اونو آیاق آلتیندا تاپدالادیلار و او اؤلدو؛ نجه کی، تاری آدامی، پادشاهین اونون یانینا گلدئیی واخت دمئشدی.
[18] تاری آدامینین پادشاها ددئیی کئمی اولدو. او دمئشدی: «صاباح بو ساعاتلاردا سامئره دروازاسیندا ائکی اؤلچو آرپا بئر شِکِله، بئر اؤلچو نارین اون بئر شِکِله ساتیلاجاق.»
[19] سرکرده ده تاری آدامینا جاواب ورئب دمئشدی: «رب گؤیلرده پنجره‌لر آچسا دا، مگر بو ائش اولا بئلر؟» تاری آدامی دا دمئشدی: «باخ، سن گؤزلرئنله بونو گؤره‌جکسن، لاکئن اوندان یِمَیه‌جکسن.»
[20] همئن ائش ده اونون باشینا گلدی؛ خالق اونو دروازانین آغزیندا آیاق آلتیندا تاپدالادی و او اؤلدو.