[1] ائلیا، اِلئشَعله گئلگالدان گتدی. بو او زامان باش وردی کی، رب ائلیانی عنقرئب فیرلانان یِل‌له گؤیه آپاراجاق ائدی.
[2] او واخت ائلیا اِلئشَعه ددی: «خاهئش ادئرم بورادا قال، چونکی رب منی بِیت ائله گؤندَ‌رئر.» اِلئشَع ددی: «وار اولان ربّه و سنئن جانینا آند اولسون کی، سندن اَل چکمه‌رم.» اونلار بِیت ائله گتدئلر.
[3] بِیت ائلده اولان پیغمبرلر اؤولادلاری اِلئشَعئن یانینا گلئب اوندان سوروشدولار: «آیا بئلئرسن رب بو گون آغانی سنئن باشین اوستوندن گؤتوره‌جک؟» اِلئشَع ددی: «بلی، بئلئرم، ساکئت اولون.»
[4] ائلیا اونا ددی: «اِلئشَع، خاهئش ادئرم بورادا قال، چونکی رب منی اَرئحایا گؤندَ‌رئر.» آمّا اِلئشَع ددی: «وار اولان ربّه و سنئن جانینا آند اولسون کی، سندن اَل چکمه‌رم.» اونلار اَرئحایا گلدئلر.
[5] اَرئحادا اولان پیغمبرلر اؤولادلاری اِلئشَعئن یانینا گلئب اوندان سوروشدولار: «آیا بئلئرسن رب بو گون آغانی سنئن باشین اوستوندن گؤتوره‌جک؟» اِلئشَع جاواب وردی: «بلی، بئلئرم، ساکئت اولون!»
[6] او واخت ائلیا اونا ددی: «خاهئش ادئرم بورادا قال، چونکی رب منی اوردون چایینین یانینا گؤندَ‌رئر.» اِلئشَع ددی: «وار اولان ربّه و سنئن جانینا آند اولسون کی، سندن اَل چکمه‌رم.» اونلار گتدئلر.
[7] پیغمبرلر اؤولادلاریندان اَلّی آدام گدئب اوزاقدا اونلارین موقابئلئنده دایاندی. اونلار دا اوردون چایینین یانیندا دایاندیلار.
[8] ائلیا جوبّه‌سئنی گؤتوردو و اونو بوکوب سویا ووردو. سو ائکی یره آیریلدی و اونلار قورو یرئن اوستوندن کچدئلر.
[9] اونلار کچندن سونرا ائلیا اِلئشَعدن سوروشدو: «من سنئن یانیندان گؤتورولمه‌دن، مندن بئر شی ائسته؛ سنئن اوچون نه اِدئم؟» اِلئشَع ددی: «لوطفن سنده اولان روح، ائکی قات مَنده اولسون.»
[10] ائلیا ددی: «سن چتئن بئر شی ائسته‌دئن. اگر سنئن یانیندان گؤتورولدویومو گؤره‌سن، سنئنله بله اولاجاق، یوخسا بو اولمایاجاق.»
[11] اونلار دانیشا-دانیشا گِدَرکَن قفلتن اودلو بئر عارابا و اودلو آتلار گؤروندولر و اونلاری بئر-بئرئندن آییردیلار. ائلیا فیرلانان یِل‌له گؤیه قالدیریلدی.
[12] اِلئشَع بونو گؤروب قیشقیردی: «آتام، ای آتام! ائسرایئلئن عاراباسی و آتلی‌لاری!» و ائلیانی داها گؤرمه‌دی. او واخت اؤز پالتارلارینی گؤتوردو و اونلاری جیریب ائکی یره بؤلدو.
[13] سونرا ائلیانین اَینئندن دوشَن جوبّه‌نی گؤتوروب گری دؤندو و اوردون چایینین قیراغیندا دایاندی.
[14] ائلیانین اَینئندن دوشَن جوبّه‌نی گؤتوروب سویا ووردو و ددی: «ائلیانین تاریسی رب هارادادیر؟» او دا جوبّه‌نی سویا ووراندا، سو ائکی یره آیریلدی. اِلئشَع اورادان کچدی.
[15] اَرئحادا اولان پیغمبرلر اؤولادلاری اونو اوزاقدان گؤروب ددئلر: «ائلیانین روحو اِلئشَعئن اوستونده‌دئر.» اونلار اِلئشَعئن پئشوازینا گلدئلر و اونون قاباغیندا یره قدر تعظئم اتدئلر.
[16] اونا ددئلر: «باخ، بو قوللارینین یانیندا اَلّی ائگئد وار، لوطفن قوی گدئب آغانی آختارسینلار. بلکه ربّئن روحو اونو قالدیریب داغلارین، یا دا دره‌لرئن بئرئنه آتیبدیر؟» اِلئشَع ددی: «گؤندَ‌رمه‌یئن.»
[17] آمّا اونلار او قدر عئناد اتدئلر کی، اِلئشَع اوتانیب ددی: «گؤندَ‌رئن.» اَلّی نفر گؤندَردئلر و اونلار اوچ گون آختاردیلار، آنجاق ائلیانی تاپا بئلمه‌دئلر.
[18] سونرا اِلئشَعئن یانینا کی، اَرئحادا قالمیشدی، قاییتدیلار. اِلئشَع اونلارا ددی: «من سئزه دِمه‌دئم کی، گتمه‌یئن؟»
[19] شهرئن آداملاری اِلئشَعه ددئلر: «آغامین گؤردویو کئمی بو شهرئن یری یاخشی‌دیر، آنجاق سویو پئسدئر، تورپاغی ثمر ورمئر.»
[20] او ددی: «منه تزه بئر قاب گتئرئن و اونون ائچئنه دوز قویون.» بونو اونا گتئردئلر.
[21] او، بولاغا چیخدی، دوزو اورایا آتیب ددی: «رب بله دیئر: ”بو سولاری تمئز اتمئشم، آرتیق اوندا اؤلوم و ثمرسئزلئک اولمایاجاق.“»
[22] اِلئشَعئن ددئیی سؤزه گؤره بو سو بو گونه قدر ده تمئز قالیر.
[23] اِلئشَع اورادان بِیت ائله قالخدی. او یولا دوشَنده کئچئک اوغلانلار شهردن چیخدیلار و اونو لاغا قویوب ددئلر: «گؤیه قالخ، کِچَل، گؤیه قالخ، کِچَل!»
[24] او آرخایا دؤنوب اوغلانلاری گؤردو و اونلاری ربّئن آدی ائله لعنتله‌دی. مِشه‌دن ائکی دئشی آیی چیخیب اونلاردان قیرخ ائکی نفری پارچالادی.
[25] اِلئشَع اورادان کَرمِل داغینا گتدی، اورادان دا سامئره‌یه قاییتدی.