[1] او گونلرده خئزقئیا اؤلومجول ناخوشلادی. آموص اوغلو پیغمبر اِشَعیا اونون یانینا گلئب ددی: «رب بله دیئر: ”اِوئنئن ائشلرئنئن ترتئباتینی ات، چونکی ناخوشلوقدان صاغالماییب اؤله‌جکسن.“»
[2] خئزقئیا اوزونو دووارا چِوئردی و ربّه دوعا ادئب ددی:
[3] «یالواریرام، یارب، یادینا سال کی، نجه سنئن قاباغیندا صالحلئک و کامئل اورَکله یاشامیشام، نجه سنئن گؤزونده یاخشی اولان ائشلر اتمئشم.» خئزقئیا آجی-آجی آغلادی.
[4] اِشَعیا حله اورتا حَیَطدن چیخمامیش ربّئن بو سؤزو اونا نازئل اولدو:
[5] «قاییت، منئم خالقیمین رهبری خئزقئیایا دِه کی، آتان داوودون تاریسی رب بله دیئر: ”سنئن دوعانی اشئتدئم، گؤز یاشلارینی گؤردوم. باخ، سنی صاغالداجاغام و اوچونجو گون ربّئن معبدئنه قالخاجاقسان.
[6] سنئن عؤمرونو اون بش ائل آرتیراجاغام. سنی و بو شهری آشور پادشاهینین اَلئندن قورتاراجاغام، اونو اؤزوم اوچون و قولوم داوودون خاطئرئنه حئفظ اده‌جیم.“»
[7] سونرا اِشَعیا ددی: «انجئر کونده‌سی گؤتورون.» بونو گؤتوروب چئبانین اوستونه قویدولار و پادشاه صاغالدی.
[8] خئزقئیا اِشَعیادان سوروشدو: «ربّئن منی صاغالداجاغینا و اوچونجو گون ربّئن معبدئنه قالخاجاغیما علامت نه‌دئر؟»
[9] اِشَعیا جاواب وردی: «سنه ربّئن ددئیی سؤزه عمل اده‌جیئنه علامت بودور: آیا کؤلگه اون قدم اوزانسین، و یا قیسالسین؟»
[10] خئزقئیا ددی: «کؤلگه اوچون اون قدم اوزانماق آساندیر. قوی اون قدم قیسالسین.»
[11] پیغمبر اِشَعیا ربّی چاغیردی، رب ده آخازین تئکدئیی پئلّه‌کَنئن اوستونه دوشَن کؤلگه‌نی اون قدم گری چکدی.
[12] او زامان بابئل پادشاهی بَلَدان اوغلو مِرودَک بَلَدان خئزقئیایا مکتوبلار و هدئیّه‌لر گؤندَ‌ردی، چونکی خئزقئیانین ناخوشلادیغینی اشئتمئشدی.
[13] خئزقئیا اونلارا قولاق آسدی. او، خزئنه‌سئنده اولان بوتون شیلری، قیزیل-گوموشو، عطرئیّاتی، قئیمتلی یاغلاری، سئلاح آنبارینداکی بوتون اشیالاری اِلچئلره گؤرستدی. خئزقئیانین ساراییندا و بوتون پادشاهلیغیندا اونلارا گؤرستمه‌دئیی بئر شی قالمادی.
[14] او واخت اِشَعیا پیغمبر، خئزقئیا پادشاهین یانینا گلئب اوندان سوروشدو: «بو آداملار نه ددئلر؟ سنئن یانینا هارادان گلدئلر؟» خئزقئیا ددی: «اوزاق بئر اؤلکه‌دن، بابئلدن گلدئلر.»
[15] اِشَعیا سوروشدو: «سنئن ساراییندا نه گؤروبلر؟» خئزقئیا ددی: «ساراییمدا اولان بوتون شیلری گؤروبلر. خزئنه‌لرئمده اونلارا گؤرستمه‌دئیئم بئر شی قالمادی.»
[16] اِشَعیا خئزقئیایا ددی: «ربّئن سؤزونو اشئت:
[17] ”باخ، اله گونلر گله‌جک کی، سنئن ساراییندا اولان هر شی و آتالارینین بو گونه قدر ییغدیقلاری شیلر بابئله آپاریلاجاق، هچ نه قالمایاجاق.“ رب دیئر.
[18] ”سنئن نسلئندن اولان و سندن عمله گلن بعضی اوغوللارینی گؤتوروب آپاراجاقلار و اونلار بابئل پادشاهینین ساراییندا حرم‌آغاسی اولاجاقلار.“»
[19] سونرا خئزقئیا اِشَعیایا ددی: «ددئیئن ربّئن سؤزو یاخشی‌دیر.» چونکی دوشونوردو: «هچ اولماسا منئم دؤورومده صولح و اَمئن-آمانلیق اولاجاق.»
[20] خئزقئیانین قالان ائشلری، اونون بوتون قووّتی، نجه حوووض و سو کمری دوزَ‌لدئب سویو شهره گتئرمه‌سی باره‌ده مگر یهودا پادشاهلارینین سالنامه‌لر کئتابیندا یازیلماییبدیر؟
[21] خئزقئیا اؤلوب آتالاری ائله یاتدی و یرئنه اوغلو مِنَسّه پادشاه اولدو.