[1] پیغمبرلر اؤولادلاریندان اولان بئر آدامین آروادی اِلئشَعه فریاد ادئب ددی: «سنئن قولون اَرئم اؤلدو! بئلئرسن کی، او قولون ربدن قورخوردو. ائندی بئر طلبکار گلئب کی، ائکی اوغلومو اؤزونه قول گؤتورسون.»
[2] اِلئشَع اوندان سوروشدو: «سنئن اوچون نه ادئم؟ منه دِه گؤروم، اِوئنده نه‌یئن وار؟» آرواد جاواب وردی: «بئر قاب زیتون یاغیندان باشقا بو کنئزئنئن اِوئنده هچ نه یوخدور.»
[3] اِلئشَع ددی: «گت بوتون قونشولاریندان بوش قابلار بورج آل، آز قاب یوخ، چوخ!
[4] سونرا ائچه‌ری گئر، اؤزونون و اوغوللارینین دالینجا قاپینی باغلا، اؤز یاغینی بوتون بو قابلارا تؤک و اونلاری دولدوروب بئر طرفه قوی.»
[5] آرواد اونو ترک ادئب قاپینی اؤزونون و اوغوللارینین دالینجا باغلادی. اوغوللاری قابلاری اونون یانینا گتئرئردئلر، او دا دولدوروردو.
[6] قابلار دولدوقدا او، اوغوللاریندان بئرئنه ددی: «منه داها بئر قاب دا گتئر.» اوغلو اونا ددی: «داها قاب قالمادی.» او واخت زیتون یاغی کَسئلدی.
[7] آرواد گلئب بونلاری تاری آدامینا خبر وردی. او دا ددی: «گت، زیتون یاغینی ساتیب بورجونو ور. قالانی ائله ده اوغوللارینلا بئرلئکده کِچئنَرسن.»
[8] بئر گون اِلئشَع شونِمدن کچئردی. اورادا وارلی بئر آرواد یاشاییردی و آرواد اِلئشَعی یمک یِمَیه دعوت اتدی. سونرالار، اِلئشَع هر دفه کِچَنده، یمک یمک اوچون اورایا گِدَردی.
[9] آرواد اَرئنه ددی: «باخ، ائندی بئلدئم کی، همئشه یانیمیزدان کِچَن بو آدام موقدّس بئر تاری آدامی‌دیر.
[10] گل دامدا اونا کئچئک بئر اوتاق دوزَ‌لدَک، اورایا اونون اوچون یاتاق، مئز، تخت، بئر ده چیراق قویاق کی، بئزه گلنده اورادا قالسین.»
[11] بئر گون اِلئشَع اورایا گلدی و دامداکی اوتاغا چیخیب اورادا یاتدی.
[12] سونرا نؤکری گِخَزئیه ددی: «شونِملی آروادی چاغیر.» او، آروادی چاغیردی و آرواد اونون موقابئلئنده دایاندی.
[13] اِلئشَع نؤکرئنه ددی: «ائندی آروادا دِه: ”باخ، بئزئم اوچون بو قدر زحمت چکئبسن. من سنئن اوچون نه اده بئله‌رم؟ سنئن حاقّیندا پادشاهلا یا دا قوشون باشچیسی ائله دانیشیم؟“» آرواد ددی: «یوخ، لازیم دیئل، من اؤز خالقیملا بئرلئکده یاشاییرام.»
[14] اِلئشَع سوروشدو: «اگر اِله‌دئر، اونون اوچون نه اده بئله‌رم؟» گِخَزی جاواب وردی: «دوغروسو، اوغلو یوخدور، اَری ده قوجادیر.»
[15] اِلئشَع ددی: «آروادی چاغیر.» گِخَزی آروادی چاغیردی و او گلئب قاپیدا دوردو.
[16] اِلئشَع ددی: «بئر ائلدن سونرا بو فصئلده قوجاغیندا بئر اوغلون اولاجاق.» آرواد ددی: «یوخ، ای آغام تاری آدامی، کنئزئنه یالان دِمه!»
[17] اِلئشَعئن ددئیی کئمی آرواد بویلو اولدو و بئر ائل سونرا همئن فصئلده بئر اوغلان دوغدو.
[18] اوشاق بؤیودو. او بئر گون آتاسینین یانینا کی، بئچئنچئلرله بئرلئکده ائشله‌‌یئردی، گتدی.
[19] او، آتاسینا ددی: «باشیم آغری‌ییر، باشیم!» آتاسی نؤکره ددی: «اونو آناسینین یانینا آپار.»
[20] نؤکر اونو گؤتوروب آناسینین یانینا گتئردی. او، گون‌اورتایا قدر آناسینین دئزلری اوستونده قالدی و سونرا اؤلدو.
[21] آرواد یوخاری چیخیب اوشاغی تاری آدامینین یاتاغی اوستونه اوزاندیردی، سونرا قاپینی دالینجا اؤرتوب چیخدی.
[22] او، اَرئنی چاغیریب ددی: «نؤکرلرئندن بئری ائله منه بئر اِششَک گؤندَر. تِز تاری آدامینین یانینا گدئب، قاییداجاغام.»
[23] اَری ددی: «نه اوچون بو گون اونون یانینا گدئرسن؟ نه تزه آی مراسئمی، نه ده سَبّت گونودور.» آرواد ددی: «عیبی یوخ.»
[24] او، اِششه‌یی پالانلاییب نؤکرئنه ددی: «سور و من سنه دِمَیئنجه دایانما.»
[25] او گتدی و کَرمِل داغینا، تاری آدامینین یانینا گلدی. تاری آدامی آروادی اوزاقدان گؤردوکده، نؤکری گِخَزئیه ددی: «باخ، شونِملی آرواد بورایا گلئر.
[26] ائندی اونون پئشوازینا قاچ و سوروش: ”نجه‌سن، آیا یاخشی‌سان، اَرئن یاخشی‌دیر؟ اوغلون یاخشی‌دیر؟“» آرواد جاوابدا ددی: «یاخشی‌ییق.»
[27] آرواد داغا چیخیب تاری آدامینین یانینا گلدی و اونون آیاقلارینا ساریلدی. گِخَزی یاخینلاشدی کی، اونو گری ائته‌له‌سئن. آمّا تاری آدامی ددی: «اونو بوراخ، چونکی اوره‌یی، ائچئنده چوبالاییر. رب بونون سببئنی گئزلَدئب و منه بئلدئرمه‌یئب.»
[28] آرواد ددی: «من آغامدان مگر اوشاق ائسته‌دئم؟ مگر ”منی آلداتما“ دِمه‌دئم؟»
[29] اِلئشَع گِخَزئیه ددی: «بِلئنی باغلا و عصامی اَلئنه گؤتوروب گت. اگر بئر آداملا راستلاشاسان، اونا سالام ورمه و سنه سالام وره‌نئن سالامینی دا آلما. گت، عصامی اوغلانین اوزونون اوستونه قوی.»
[30] اوغلانین آناسی ددی: «وار اولان ربّه و سنئن جانینا آند اولسون کی، سندن اَل چکمه‌رم.» اِلئشَع قالخیب اونون دالینجا گتدی.
[31] گِخَزی اونلاردان قاباق گتدی و عصانی اوغلانین اوزونون اوستونه قویدو، آنجاق نه بئر سَس، نه ده بئر جاواب اولدو. گِخَزی قاییتدی کی، اِلئشَعی گؤرسون و اونا خبر ورسئن کی، «اوغلان دئرئلمه‌دی.»
[32] اِلئشَع اِوه گئردی. باخ، اؤلَن اوغلان اونون یاتاغی اوستونده اوزانمیشدی.
[33] او ائچه‌ری گئرئب قاپینی اونلارین اوزونه باغلادی و ربّه دوعا اتدی.
[34] سونرا یاتاغا قالخیب اوشاغین اوستونه اَیئلدی. آغزینی اونون آغزینین، گؤزلرئنی اونون گؤزلرئنئن، اوووجلارینی اونون اوووجلارینین اوستونه قویدو. اوشاغین اوستونه سَرئلدی و اوشاغین بدنی قیزیشدی.
[35] اِلئشَع یاتاقدان دوشوب اِوده او طرفه-بو طرفه گَزدی. سونرا گئنه یاتاغا قالخیب اونون اوستونه اَیئلدی. اوغلان یدّی دفه آسقیریب گؤزلرئنی آچدی.
[36] اِلئشَع گِخَزئنی چاغیریب ددی: «شونِملی آروادی چاغیر.» او، آروادی چاغیردی. آرواد اِلئشَعئن یانینا گلنده، او ددی: «آل اوغلونو.»
[37] آرواد گلئب اِلئشَعئن آیاقلارینا دوشدو. یره قدر اَیئلئب اوغلونو گؤتوردو و گتدی.
[38] اِلئشَع گئلگالا قاییتدیقدا، اؤلکه‌یه قیتلیق دوشموشدو. پیغمبرلر اؤولادلاری اونون قاباغیندا اوتورموشدولار. او، نؤکرئنه ددی: «بؤیوک قازانی اوجاغا قوی و پیغمبرلر اؤولادلاری اوچون شوربا پئشئر.»
[39] اونلاردان بئری اوت ییغماق اوچون چؤله چیخدی. بئر چؤل تَنه‌یی تاپیب اوندان اَتَک دولوسو قرئب بالقاباق ییغدی و گتئرئب شوربا قازانینا دوغرادی. بونون نه اولدوغونو بئلمئردئلر.
[40] شوربانی یمک اوچون آداملارا وردئلر. شوربا یئیَنلر قیشقیریب ددئلر: «قازانداکی یمکدن یِسَک، اؤله‌رئک، ای تاری آدامی!» هچ کس اوندان یئیه بئلمه‌دی.
[41] اِلئشَع ددی: «اون گتئرئن.» سونرا اونو قازانا آتیب ددی: «آداملار اوچون تؤک، یِسئنلر.» قازاندا ضررلی بئر شی اولمادی.
[42] بَعَل‌‌شالئشادان بئر آدام گلدی. او، تاری آدامی اوچون ائلک ثمردن ائیئرمی کؤمبه آرپا چؤره‌یی و اؤز محصولوندان سونبول‌لر گتئردی. اِلئشَع ددی: «آداملارا ور، یِسئنلر.»
[43] اونا خئدمت ادن ددی: «بونو یوز آدامین قاباغینا نجه قویاق؟» اِلئشَع ددی: «آداملارا ور، یِسئنلر. چونکی رب بله دیئر: ”یئیه‌جکلر، حله آرتیق دا قالاجاق.“»
[44] بله‌جه یِمه‌یی اونلارین قاباغینا قویدو. ربّئن ددئیی کئمی اونلار یدئلر و یمک آرتیق قالدی.