[1] Ukatsti Tatitux Moisesar sarakïnwa: —Faraonan ukar sarasin sanim: ‘Hebreonakan Tatit Diosapax akham siwa: Markaxar khithanukxam nayar yupaychir sarxañapataki.
[2] Janitix antutkäta, jark'askakïta ukasti,
[3] Tatitux ch'amapampiw uywanakamxar mä jach'a jan wali usu apayanini. Ukatsti caballonaka, asnonaka, camellonaka, vacanaka, ovejanakas taqiw jiwarani.
[4] Ukampis Tatitux Israelan uywanakapxa, Egipton uywanakapat yaqhachaniwa, israelitanakan uywanakapax janiw mayas jiwkaniti’ sasa.
[5] Ukhamarus Tatitux sänwa: —Arumanthiw nayax aka uraqin ukham lurä —sasa.
[6] Ukat qhipärmanthisti, Tatitux arsutaparjamaw luräna. Egipcionakan uywanakapax taqpachaw jiwaräna, ukampis israelitanakan uywanakapax janiw mayas jiwkänti.
[7] Faraonax israelitanakan uywanakap uñjiriw khithäna, ukampis janiw mayas uywanakapat jiwkataynati. Ukhamäkipansa, faraón reyix chuymap qalarayasiskakïnwa, ukatsti janiw israelitanakarux sarxapxañapatak antutkänti.
[8] Tatitusti Moisesampiru, Aaronampiruw säna: —Jumanakax mä hornot qhilla jach'tanipxam, ukatsti Moisesax faraonan nayraqatapan uka qhilla alayar willtpan.
[9] Uka qhillasti laq'aruw tukuni, ukatsti Egipto markpachar phuqhantasin qarachi usunak sartayani, taqi jaqinakampina, uywanakampina —sasa.
[10] Moisesampi, Aaronampisti mä hornot qhilla apxaruwayasin faraonan ukaruw sarapxäna. Ukansti Moisesax alayaruw qhilla willtäna, ukatsti jaqinakasa, uywanakas qarachinkamakiw uñstäna.
[11] Egiptonkir yatirinakasti janiw Moisesar saykatirjamäpkänti, jupanakamppachaw mayni egipcio jaqinakjamarak qarachi usuni uñjasipxäna.
[12] Ukampis Tatitux faraonan chuymap qalarayänwa, ukhamat Moisesampiru, Aaronampiru jan ist'añapataki, kunjämtix Tatitux Moisesar siskatayna ukarjama.
[13] Ukat Tatitux Moisesar saskakïna: —Qharürux willjtat sartasïta, ukatsti faraonan ukaruw saräta akham siri: “Hebreonakan Tatit Diosapax akham siwa: ‘Markaxar khithanukxam, nayar yupaychir sarañapataki,
[14] jichha kutix taqi mutuyäwinakax apayanï, jumataki, yanapirinakamataki, taqi jaqinakamataki, ukhamat yatïta jani yaqhax nayjam aka uraqpachan utjatapa.
[15] Nayatix muniriskäyät ukaxa, mä jan wali usumpiw taqpach egipcionakar mutuyiriskäyäta, niya jiwatäxapxasapänwa.
[16] Ukampis nayaw juman jan jiwañam munkti, ch'amax uñjañamatakiw jakaysma, ukhamat nayan sutixan taqi uraqin uñt'atäñapataki.
[17] Ukhamäkipansa, jumax markaxar jark'askaktawa, janiw sarxañapatak antutañsa munktati.
[18] ¡Walikiwa!, nayax arumanthix walpun chhijchhintayä, ukham chhijchhix janiw Egipto markan utjatapat jichhakamax kunapachas utjirïkiti.
[19] Ukhamasti taqi uywanakamsa, kunanakatix pampan utjktam ukanaksa utarkam uchayam, chhijchhix wal purintasax jan utankkani uka jaqinakarusa, uywanakarus jiwarayaniwa’ ” —sasa.
[20] Faraonan yaqhip yanapirinakapasti Tatitun arunakapat axsarasax uywat jaqinakapampiru, uywanakapampirux utaruw irpantasxapxäna;
[21] ukampis yaqhipanakax janiw Tatitun arunakapar yäqapkänti, uywat jaqinakapsa, uywanakapsa pamparuw jaytanukupxäna.
[22] Ukatsti Diosax Moisesar sänwa: —Amparam alaxpach tuqir luqtam chhijchhin wal purintañapataki, Egipto markpacharu, taqi jaqinakxaru, uywanakxaru, egipcio pampanakan utjir alinakxaru —sasa.
[23] Moisesasti thujrup ayxarusin amparap alaxpach tuqir luqtäna, ukatsti Tatitux qhixu qhixunaka, lliju llijunaka, chhijchhinak uraqxar apayanïna. Egipto markpachan chhijchhintayäna,
[24] chhijchhisa, qhixu qhixusa walpun purintäna. Janipuniw kunapachas Egipton ukham chhijchhintirïkänti.
[25] Chhijchhix taqi kun Egipto uraqin tukjäna: jaqinakaru, uywanakaru; pampankir ch'uxñanak k'utsüna, quqanaksa p'akirarakïnwa, taqi kunanakatix Egipton utjkän ukanak tukjäna.
[26] Ukampis Gosen uraqirux, kawkhantix israelitanakax jakapkän ukkharux janiw mä chhijchhis purkänti.
[27] Ukat faraonax Moisesampiru, Aaronampir jawsayanïna, jupanakarusti akham säna: —Nayan juchanïtax uñt'astwa. Nayampi, markaxampiw juchanïpxta, janiw Tatitun juchapäkiti.
[28] Chhijchhimpi, qhixu qhixunakampix walpun purintxi, ukhamasti janiw juk'amp jark'xapxämati. Nanakatak Tatitut mayirapipxita, nayasti sarxapxañamatak antutxapxämawa —sasa.
[29] Moisesasti sänwa: —Nayax aka markat mistusin ukspachaw amparax luqtas Tatitur mayï, ukatsti qhixu qhixunakasa, chhijchhisa t'akurxaniwa, ukat yatïta aka uraqix Tatitunkatapa.
[30] Ukampis nayax yattwa, janïraw jumansa, yanapirinakamansa Tatit Diosar axsartañanakamax utjapktamti —sasa.
[31] Ukatsti lino satatampi, cebada satatampix q'ala tukjataw uñjasïna; cebadasti ukapachaw puyachrantaskäna, linos panqaraskarakïna.
[32] Ukampis trigompi, centeno sat alimpix janiw tukjatäkänti janïr alsunitap layku.
[33] Moisesasti faraonamp parlasin markat mistuwayäna, amparanakap aytasaw Tatitur mayïna. Ukatsti ukspachaw chhijchhix t'akurawayxäna, janiw jallus purxatkxänti, qhixu qhixunakas janirakiw utjkxänti.
[34] Ukampis faraonax jan jalluntxipana, chhijchhimpi, qhixu qhixunakampis t'akurxipanxa, jucha luraskakïnwa. Janiw jupaki chuymap qalarayaskänti, jan ukasti yanapirinakapamppachaw chuymanakap qalarayasïna.
[35] Ukatsti faraonax chuymap qalarayasisax, janirakikiw israelitanakar antutañ munkxänti, kunjämtix Tatitux Moisés tuqi siskatayna ukhamarjama.