[1] Israelitanakax Egipto uraqit mistuwayapkän uka urutxa kimsa phaxsi saraqataruw Sinaí wasarar puripxäna.
[2] Refidim chiqat mistuwayasinsti, Sinaí wasararuw puripxäna, uka pachpan utjnuqtapxarakïna, qullu uñkatasina.
[3] Mä urusti, Moisesax Diosampi jikisiriw Sinaí qullur makhatäna, Tatitusti qullu patatpach jawsasin jupar sarakïna: —Jacobun israelita wawanakapar aka arunak yatiyam:
[4] “Jumanakax sum uñjapxtaxa kunjämtix egipcionakar nayax mutuykta ukxa, kunjämtix nayan ukar irpanipksma uksa uñjapxaraktawa, mä pakan chhiqhap patxarus jutapkasma ukhama.
[5] Ukhamasti, jumanakatix nayan arunakax sum ist'asin jaysapxitäta, arust'äwi lurataxsa phuqhapxarakïta ukaxa, jumanakax taqi markanak taypin nayan munat markaxäpxätawa, taqi uraqix nayankiwa.
[6] Jumanakax nayar luqtir sacerdotenakäpxätawa, nayatak yaqhachat suma markarakïpxätawa.” Taqi ukanak israelitanakar yatiyam —sasa.
[7] Moisesasti kuttasin markan jilïrinakaparuw jawsäna, ukatsti kuntix Tatitux siskatayna ukanak jupanakar yatiyäna.
[8] Ukatsti israelitanakax mä arukiw sapxäna: —Kunanaktix Tatitux arski ukanak lurapxäwa —sasa. Moisesasti israelitanakan arsusitanakapxa Tatituruw yatiyäna.
[9] Tatitusti Moisesarux akham sarakïna: —Nayax jumar wali ch'amak qinay taypin uñstäma, markan jumampi parlatax ist'añapataki, jumatsti jan pächasisipkañapataki —sasa. Moisesasti israelitanakan arsusitanakap wasitat Tatitur yatiyäna.
[10] Tatitusti Moisesarux saskakïnwa: —Saram, ukatsti markar wakichanim jichhüru, qharüru jupanakax q'umachasipxpan. Isinakap t'axsusipxpan,
[11] jurpür willjtatak sum wakichasipxpan, naya, Tatitusti jurpür willjtaw Sinaí qullur saraqanï, taqi israelitanakan uñjkaña.
[12] Ukampis qullu kayurux chimpunak uchäta, israelitanakan jan makhataniñapataki, jupanakarusti saskakim: “Janiw qullur makhatapxätati, janirakiw thiyanakaparus jak'achasipxätati, chimputäki uksa janiw makhatapxätati, qullur jak'achasirix jiwayataw uñjasini.
[13] Ukampis janiw juchanirux khitis amparamp nuwjañapäkiti jan ukasti, qalanakamp jayat k'upjasa, mich'inakamp antutt'askamaw jiwayapxäta. Jaqïpasa, uywäpasa jiwañapawa. Jaqinakax trompetan phust'asitap ist'askani ukapachakiw qullurux makhatani” sasa.
[14] Moisesasti israelit jaqinakan Diosar katuyasiñapatak wakichiriw qullut saraqanxäna, jupanakasti isinakap t'axsusipxäna,
[15] Moisesasti jupanakar sänwa: —Jurpürutak sum wakichasipxam, ukchañkamasti warminakamamp jan mayachasipxamti —sasa.
[16] Kimsïr uru willjtarusti, qhixu qhixunakampi, lliju llijunakampiw utjäna; qullu patxarusti mä wali ch'amak qinayaw jitxattarakïna. Ukatsti trompetan ch'amamp phust'atapaw campamentonkirinakar axsarañat khathatiyäna.
[17] Ukat Moisesax israelitanakar campamentot irpsuwayasin Sinaí qullu kayur Diosampi jikisiñapatak irpäna.
[18] Taqpach Sinaí qulluw jiwq'ïna, Tatituw nina taypinjam saraqanitayna. Uka jiwq'isti mä hornotjam mistsüna, qullusti walpun khathatïna.
[19] Trompetan phust'atapasti juk'amp juk'ampiw jach'at ist'asïna. Moisesan parlataparusti, Diosax qhixu qhixu arumpiw jaysanïna.
[20] Tatitux Sinaí qulluruw saraqanïna, uka patar makhatañapatakiw Moisesar jawsäna. Moisesasti makhatänwa.
[21] Tatitusti Moisesarux sänwa: —Saraqasin israelitanakaruw yatiyäta, chimputäki uka chiqat janipun nayar uñjañatak makhatanipxpati, jan ist'asis jak'achasinipxaspa ukaxa, waljaniw jiwaraspa.
[22] Nayar jak'achasir sacerdotenakas q'umachasipxpan, jan ukhamäkaspa ukax, jupanakas jiwapxarakispawa —sasa.
[23] Moisesasti Tatitur sarakïnwa: —Israelitanakax janiw Sinaí qullur makhatanipkaniti, juma pachpaw qullu kayur mä chimpu uchayapxistaxa, ukawjan jumatakik yaqhachatätap layku —sasa.
[24] Ukampis Tatitux jupar sänwa: —Qullut saraqawayam, ukatsti Aaronampiw kutkatanïta. Ukampis sacerdotenakasa, markachirinakas nayan ukar makhataniñ jan yant'apxpati, makhatanipxaspa ukax, jiwapxaspawa —sasa.
[25] Moisesasti qullut saraqanisax taqi uka arunak israelitanakarux yatiyäna.