[1] Moisesax Jetró awkch'ipan ovejanakap awatïna, uka awkch'ipasti Madián chiqan sacerdotënwa. Mä urusti, Moisesax wasaranjam ovejanak anakïna, ukatsti Diosan Horeb sat qullupkamaw purïna.
[2] Ukansti Tatitun angelapaw mä lawraskir ninan Moisesar uñstäna, zarza sat ch'aphi ali taypina. Moisesax sum uñtäna, ch'aphi alin aqaskiri, uka alisti janiw nakhantkänti.
[3] Ukat jupax säna: “¡Kunarakïpacha, wali mayjarakisä! ¿Kunatsa uka ch'aphix jan nakhantkpacha? Uñjanipunï” sasa.
[4] Tatitusti Moisesar jutir uñjasin zarza ch'aphi ali taypit art'äna: —¡Moisés, Moisés! —sasa. Moisesasti sänwa: —Akankasktwa —sasa.
[5] Ukat Tatitux sarakïna: —Jan jak'achasinimti, wiskhum apsusim, kawkhankktatix uka uraqix qullanawa.
[6] Nayätwa nayra awkinakaman Diosapaxa. Abraham, Isaac, Jacob jupanakan Diosapätwa —sasa. Uk ist'asasti, Moisesax ajanup imantasïna, jupax Diosar uñkatañ wal axsarayasïna.
[7] Ukampis Tatitux saskakïnwa: —Nayax sum uñjta, kunjämtix markaxax Egipton t'aqhiski ukxa. Uka wali munañan jaqinakan t'aqhisiyat uñjasis arnaqasitanakapsa ist'araktwa, jupanakan t'aqhisitanakap nayax sum yatta.
[8] Ukat nayax jutta egipcionakan amparapat markaxar qhispiyiri; jupanakar uka markat apsunxäwa, ukatsti mä jach'a suma uraqiruw irpxä, kawkhantix lechesa, misk'isa umjam jalaski ukaru. Uka uraqisti cananeonaka, hititanaka, amorreonaka, ferezeonaka, heveonaka, jebuseonakax jakapki uka uraqiwa.
[9] Israelitanakan arnaqasitanakap ist'ta, kunjämtix egipcionakax jupanakar t'aqhisiyki ukanaksa uñjaraktwa.
[10] Ukhamasti wakichasimaya, nayax faraonan ukaruw khithäma Israel markaxar Egiptot irpsuniñamataki —sasa.
[11] Ukat Moisesax Diosar säna: —¿Khitirakït nayasti faraonan ukar sarasin Egipto markat israelitanakar irpsuniñatakisti? —sasa.
[12] Tatitusti sarakïnwa: —Moisés, nayaw jumampiskä, naya pachpa jumar khithatax yatiñamatakisti, akäniw chimpuxa: Israelitanakar Egiptot irpsunxät ukapachasti, jumanakax taqiniw aka qullun nayar yupaychapxitäta —sasa.
[13] Moisesasti ukxarux sarakïnwa: —Nayatix sarasin israelitanakar säxa: “Nayra awkinakaman Diosapaw nayar khithanitu” sasa, ukatsti jupanakax nayar jiskt'apxitani: ¿Kunas sutipaxa? sasa; ukkhasti, ¿kamsarakï jupanakarusti? —sasa.
[14] Diosasti sarakïnwa: —NAYÄTWA KHITÏKTIX UKAXA. Israelitanakarusti sätawa: “NAYÄTWA sataw jumanakan ukar khithanitu” sasa.
[15] Diosasti Moisesar saskakïnwa: —Israelitanakarux sarakim: “Abraham, Isaac, Jacob uka nayra awkinakaman Tatit Diosapaw nayar jumanakan ukar khithanitu.” Jupax siwa: Akaw nayan wiñayatak amtasiñ sutixaxa, ukaw wiñayan wiñayapatak sutixaxa.
[16] Jichhasti saram, israelitanakan jilïrinakap tantachthapisin jupanakar sarakim: “Abraham, Isaac, Jacob, nayra awkinakaman Tatit Diosapaw nayar uñstasin akham situ: ‘Nayax jumanakar ist'apxsmawa, kunjämtix Egipton jumanakar lurapktam ukanaksa uñjaraktwa.
[17] Ukat nayax Egipto markan t'aqhisiñat jumanakar qhispiyañ amtta, ukatsti cananeonakana, hititanakana, amorreonakana, ferezeonakana, heveonakana, jebuseonakan uraqipar irpxaña, lechesa, misk'isa umjam jalaski uka uraqiru’ ” sasa.
[18] Israelitanakan jilïrinakapasti arunakam ist'asax jaysapxätamwa. Ukatsti jumax Egipton reyipan ukaruw jupanakamp saräta, juparusti sätawa: “Hebreonakan Tatit Diosapaw nanakar jikxatapxitu. Ukhamasti, wasarar sarayapxita kimsür sararu, ukan nanakan Tatit Diosaxar wilañchanak luqtapxañaxataki” sasa.
[19] Nayasti yattwa, Egiptonkir reyix janiw antutañ munapkätamti, ukampis nayaw jupar wayt'ä.
[20] Ch'amanïtax uñacht'ayä ukatsti kunayman jach'a muspharkañanak lurä, ukanakampiw egipcionakarux t'unjä. Ukkhakiw jumanakarux sarapxañamatak antutapxätam.
[21] Ukhamarusa, nayaw luraskä egipcio jaqinakan jumanakat khuyapayasiñapataki, Egiptot mistupkäta ukapachasti, janiw jan kunani mistupkätati.
[22] Israelit warminakax taqiniw utap jak'ankir egipcia warmita, jan ukax utapan jakir warmitsa qullqita, qurita lurat yänakampi, isinakampi mayini, ukanakampiw jumanakax wawanakamar isthapiyapxäta; ukham lurasaw egipcionakar jan kuna yänakani jaytawayapxäta —sasa.