[1] Tatitusti Moisesar saskakïnwa: —Nayaw jumarux uchsma naya lanti faraón jak'an lurañamataki, Aarón jilamaw juma lanti parlaskani.
[2] Jumasti kuntix nayax siskäma taqi ukanak Aarón jilamar yatiyäta; ukatsti jupaw faraonarux parlaskani, israelitanakar markapat antutxañapataki.
[3] Ukampis nayaw faraonarux chuymap qalarayä jan munañapataki, walja muspharkañ uñacht'äwinak Egipton lurarakï.
[4] Faraonasti janiw jumanakarux ist'añ munapkätamti, ukampis nayaw ch'amaxa Egipto markar uñacht'ayä, ukatsti jach'a muspharkañ chiqa luräwinak uñacht'ayasaw israelita ejército markaxarux Egiptot irpsunï.
[5] Egipto markar ch'amax uñacht'ayasa, israelitanakar uka markat apsunkä, ukkhaw egipcionakax yatipxani nayan Tatitütaxa —sasa.
[6] Moisesampi, Aaronampisti kunjämtix Tatitux siskatayna ukhamarjamaw lurapxäna.
[7] Faraón reyimp parlapkän ukkhasti Moisesax kimsaqallqu tunka maranïnwa, Aaronasti kimsaqallqu tunka kimsan maranirakïnwa.
[8] Tatitux Moisesampiru, Aaronampir parlaskakïnwa:
[9] —Faraonatix “mä muspharkañ luräwi lurapxam” sapxätam ukaxa, jumax Aaronaruw säta: “Thujrum faraonan nayraqatapar liwnuqam” sasa, ukhamat uka thujrux mä katarir tukuni —sasa.
[10] Moisesampi, Aaronampisti faraonan ukar sarasin kunjämtix Tatitux siskatayna ukhamarjamaw lurapxäna. Aaronasti faraón nayraqatana, jilïr yanapirinakap nayraqatan thujrup liwnuqäna, uka thujrusti mä katariruw tuküna.
[11] Uk uñjasinsti faraonax yatiñan jaqinakaparu, layqanakaparuw jawsayanïna, jupanakasti yatiñanakapampix kipkarak lurapxäna;
[12] jupanakat sapa mayniw thujrunakap uraqir liwnuqapxäna, uka thujrunakapasti katarinakarurakiw tuküna. Ukampis Aaronan jach'a thujrupax uka yatiñan jaqinakampina, layqa jaqinakampin thujrunakap manq'antäna.
[13] Ukhamäkipansa, faraonax chuymap qalarayasïna, janiw Moisesampiru, Aaronampir ist'añ munkänti, Tatitux siskatayna ukhamarjama.
[14] Ukxarusti Tatitux Moisesar saskakïnwa: —Faraonax q'apisiñampi chuymapan qalarayasisax janiw israelitanakar antutañ munkiti.
[15] Ukampis arumanthi willjtaw jupan ukar saräta. Nilo jawir thiyan jupar suyt'äta, katarir tukki uka thujru ayasirakïta.
[16] Ukansti akham jupar säta: “Hebreonakan Tatit Diosapaw nayar khithanitu jumar akham yatiyiri: ‘Markaxan sarxañapatak antutxam, jupanakan nayar wasaran yupaychapxañapataki.’ Ukampis jumax janiw jichhakam ist'asiñ munktati.
[17] Ukat Tatitux saraki: ‘Jichhaw yatïta nayan chiqa Tatit Diosätaxa.’ Aka thujruxamp jawir umar jisktkä ukkhaxa, umax wilaruw tukuni.
[18] Jawir uman jakir chawllanakasti jiwaraniwa, ukat jawirax wal q'aphini, egipcionakax axtasiñat janiw uka uma umañ munapkaniti” —sasa.
[19] Tatitux Moisesar parlaskakïnwa: —Aarón jilamar akham säta: “Thujrum ayxarusin luqtam, Egiptonkir taqi umanakxaru, jach'a jawiranakankiri, jisk'a jawiranakankiri, tantat umanakankiri, taqi kunanakatix umanïki ukxaru, uka umanakan wilar tukuñapataki. ¡Ukhamarak lawata, qalat lurat wayuchanakan uchat umanakas wilar tukuñapataki!” —sasa.
[20] Ukatsti Moisesampi, Aaronampix kunjämtix Tatitux jupanakar siskatayna ukhamarjamaw lurapxäna. Aaronasti thujrup aytasin jawir umar jisktäna, faraonan uñjkaña, yanapirinakapan uñjkaña, ukatsti jawir umax wilaruw tuküna.
[21] Uka jawiran utjir chawllanakax jiwaränwa, ukatsti jawirax walpun thujsäna, egipcionakax janiw uka umat umkxapxänti, taqi Egipto uraqinkir umanakaw wilaru tuküna.
[22] Egiptonkir yatir jaqinakasti yatiñanakapampix kipkarak lurapxäna, ukatsti kunjämtix Tatitux siskatayna ukhampun faraonax chuymap qalarayasïna, janiw Moisesampiru, Aaronampir ist'añ munkänti.
[23] Faraonax ukar jan yäqasaw reyi utapar kutt'xäna.
[24] Egipcio jaqinakasti janiw Nilo jawirat uma umkxapxänti, jan ukasti jawir thiyanakan phuch'unak allipxäna uka phuch'unakat q'uma uma apsuñataki, jawir uman jan umt'añjamätap layku.
[25] Tatitux jawir umaru wilar tukuykän uka urutxa, paqallqu urunakaw mäkipxäna.