[1] “Ukxarusti, incienso nakt'ayañatakix acacia lawat mä altar lurarakim.
[2] Uka altarasti taqi tuqit mä sapa tupunikïñapawa, sayt'urux pusi tunka phisqan centimetroni, iranarusti pusi tunka phisqan centimetroni, alayarusti llätunk tunka centimetroni, uka altaran waxranakapasti altarampix mayakïñapawa.
[3] Uka altaran patäxapa, pusi thiyanakapa, waxranakapsa qurimpiw lip'suyäta, ukatsti qurimpiw thiyanakap muytayäta.
[4] Ukxarusti quri argollanak thiyanak manqhir uchäta, purap thiyarux pä argolla, maysa purap thiya esquinarusti pä argollaraki, ukanjam muruq'u lawanak ayantasin uka altar kallañataki.
[5] Acacia lawanakat muruq'u lawanak luräta, ukarusti qurimpiw lip'ikipayäta.
[6] Ukatsti uka altarxa arust'äwi arca imt'ki uka cortina nayräxaruw uchäta, kawkhantix nayax jumamp jikiskä uka chiqaru.
[7] Aaronax lamparanak wakichkan ukkhaw, altarxarux sapärmanthi suma q'apkir incienso nakt'ayani,
[8] jayp'thapinakasti lamparanak qhantaykani ukapacharakiw incienso nakt'ayani. Uksti Tatitun nayraqatapan wiñayan wiñayapapuniw lurasini.
[9] Janiw uka altar patxarux yaqha incienso nakhayätati, janirakiw wilañchanaksa, waña juyranakat waxt'anaksa, vino warxatañ waxt'anaksa luqtätati.
[10] Aka altarax Tatitur katuyat altaräniwa, maran mä kutikiw Aaronax altaran waxranakapxar wilañcha luqtata uywan wilap luqtani, jucha luratanakat pampachäwi jikxatañataki. Sapa maraw uka altarxarux juchat pampachayasiñatak wilañcha luqtapxäta.”
[11] Tatitux Moisesaruw parläna akham sasa:
[12] “Israelitanakar jakt'käta ukapachaxa, jupanakax sapa mayni jaqiw Tatiturux kunatix jakañapat churañäki uka churapxañapa, kuna jiwayir usus jakthapiña urunakan jan utjañapataki.
[13] Taqi khitinakatix jakt'atäkani, jupanakax phisqa gramo qullqi Tatitur churapxani, ukasti qullan chiqawjan tupuparjamax chikatapawa.
[14] Khitinakatix pä tunka maranit amstar jakt'atäpki, jupanakaw Tatitur uk churapxañapa.
[15] Jakañapat Tatitur churasaxa, janiw qamir jaqix phisqa gramo qullqit juk'ampi churañapäkiti, jan utjirin jaqis janirakiw ukat juk'ak churañapäkiti.
[16] Ukhamasti jumaw apthapïta, israelitanakax jakañapat churapkani uka qullqi, uk apthapisasti Tatitump Jikisiñ Carpan yupaychäwi lurañatakiw katuyäta. Ukhamat Tatitun israelitanakat amtasiñapataki, jupanakan sapa mayni jakañapat qullqi churapxatapata.”
[17] Diosasti, Moisesaruw parläna akham sasa:
[18] “Broncet uma uchañ luräta, qunt'añapasti pachpa broncet luratäñaparakiwa; ukarusti umampiw phuqhantäta, uksti Jikisiñ Carpampi, altarampi ukanak taypiruw uchäta.
[19] Aaronampi, wawanakapampix uka lamanat uma apsupxani, amparanakapampi, kayunakapamp jariqasiñataki.
[20] Tatitump Jikisiñ Carpar mantañataki, nakt'ayat waxt'a Tatitur luqtañatak altarar jak'achasiñatakix uka umampiw jariqasipxani, ukhamat jan jiwapkaniti.
[21] Jupanakan jan jiwapxañapatakisti, amparanakapsa, kayunakapasa jariqasipxañapawa. Akasti Aaronampitaki, wawanakapan wawanakapampitakix wiñayatak arsut kamachïniwa.”
[22] Tatitux Moisesaruw parläna akham sasa:
[23] “Suma q'apkir alinak ajllïta, suma mirräki ukat suxta kilo, suma q'apkir canelat kimsa kilo, suma q'apkir cañat kimsa kilo,
[24] casia sat quqan sillp'ipat suxta kilo, ukatsti oliva aceitet kimsa litro chikatani, ukanakasti qullan chiqawjankir tupuparjamäñapawa.
[25] Taqi ukanakampiw luqtañ qullan aceite luräta, kamisatix suma q'apkir qullanak luririx wakichki ukhama.
[26] Ukatsti uka aceitempiw Tatitump Jikisiñ Carpampiru, arust'äwi arcampirux warakipäta,
[27] ukhamarak mesaru, taqpach yänakaparu, candelerompiru, yänakapampiru, incienso luqtañ altarxaru,
[28] wilañcha nakhayañ altarxaru, taqi yänakapampiru, jariqasiñ lamanxaru qunt'añapampiru.
[29] Ukham lurasaw Tatitur luqtat uñjasini, ukatsti uka yänakax Qullanan Qullanapäniwa; kunanakatix uka yänakar jak'kani ukanakax luqtatäxarakiniwa.
[30] “Uka aceitempiw Aaronampiru, wawanakapampirux warxatarakïta, nayan sacerdotenakaxar tukuñapataki.
[31] Ukatsti israelitanakarux sarakïtawa: ‘Taqi pachanakan aka aceitex qullanañchañ qullan aceiteruw tukuni.
[32] Janipuniw jumanakax aka aceitempix khiti jaqirus warxatapxätati, janirakiw aka qullan aceiter uñtatsa yaqha aceite wakichapxätati. Aka aceitex qullanawa, jumanakax qullanat uñjapxañamarakiwa.
[33] Khititix aka aceite kipkak yaqha aceite lurkani, jan ukasa aka qullan aceitempi khiti jaqirusa warxatarakin ukaxa, jumanak taypit jaqunukutaw uñjasini’ ” sasa.
[34] Tatitux Moisesar sänwa: “Q'apkir qullanakat mä pachpak apthapïta: quqanakat ch'aqir resina, uña sat q'apkir qulla, suma incienso, gálbano sat q'apkir qullampi;
[35] ukatsti taqi ukanakat suma q'apkir qullan incienso wakichäta, kunjämtix q'apkir qullanak luririx sum kittasin wakichki ukhama.
[36] Mä chikatxa suma ñut'u k'iyjasin arca nayraqataruw uchäta Tatitump Jikisiñ Carpa manqharu, kawkhantix nayax jumamp jikiskä uka chiqaru. Uka inciensox jumanakatak wali qullanapunïniwa.
[37] Janiw khitis jupatak uka inciensor uñtat wakichañapäkiti. Tatitunkir qullanarjamaw uñjäta.
[38] Khititix uka incienso uñtasit yaqha incienso wakichanixa, markap taypit jaqunukutaw uñjasini.”