[1] Leví ayllunkir mä chachax uka pachpa ayllunkir warmimpiw jaqichasïna,
[2] ukatsti uka warmix usuriptasin mä yuqall wawa wawachasïna. Jupasti wawapan suma uñnaqt'anïtap uñjasaxa, kimsa phaxsiw uka wawar imantäna;
[3] juk'amp jaya urunak jan imxäsiñjamïpansti, jupax totoranakat lurat mä canastaruw asfaltompi, alquitranampi lluch'ikipäna, p'iyanakat uman jan mantañapataki, ukat uka canastar wawa ichuntasin Nilo jawir thiyan utjir totoranak taypir jaytanïna.
[4] Ukatsti uka wawan kullakapampiw jaya chiqat uñch'ukiyäna, kunatix wawar kamachkaspa uk uñjañapataki.
[5] Uka qhipatsti, faraonan phuchhapaw jawirar jariqasir jutaskäna. Jupar luqtir tawaqunakamp chika jawir thiyan sarnaqañkamasti, akatjamat totoranak taypin uka canasta uñjäna, ukatsti mayni uywataparuw uka canasta apsur khithäna.
[6] Canasta jist'arasinsti, uka manqhin mä wawa jikxatäna, wali jachatap laykusti faraonan phuchhapax uka wawat khuyapt'ayasisin säna: —¡Akax mä hebreo wawarakisä! —sasa.
[7] Ukat uka wawan kullakapax faraonan phuchhapar jikxatasin säna: —¿Jumatak walïspati hebrea warminak taypit mayni irpanirista aka wawar uñjañapataki? —sasa.
[8] Faraonan phuchhapasti sarakïnwa: —Saramaya, irptanim —sasa. Ukat uka tawaqux wawan taykap irptanïna,
[9] faraonan phuchhapasti wawan taykaparux akham sänwa: —Aka wawa uywarapita, uywatamatsti waxt'askämawa —sasa. Wawan taykapasti iyaw sasaw wawa ichxaruwayäna, ukat uka wawa uywarakïna.
[10] Wawax jach'äxän ukkhasti, faraonan phuchhaparuw katuyxäna, faraonan phuchhapasti uka wawarux wawapat uñt'asxäna, ukatsti Moisés sasaw sutichäna; sarakïnwa: —Nayax uma taypit aka wawa apsusta —sasa.
[11] Mä urusti, Moisesax wali waynäxän ukkhaw marka masinakapar tumpt'ir saräna, jupanakan ch'ama lurañanakan irnaqasipkatap amuyasina. Ukatsti akatjamat uñjäna mä egipcio jaqin mayni hebreo masipar nuwjaskiri;
[12] ukat jupax taqi chiqa uñatatasïna, uka chiqan khitis jan utjipan uka egipcior jiwayäna, ukatsti ch'alla manqharuw imantäna.
[13] Qhipürusti Moisesax mistuwayarakikïnwa, ukatsti pani hebreonakar nuwasiskir uñjäna. Ukat masipar nuwir jaqir jiskt'äna: —¿Kunatsa jumax marka masimar ukham nuwjaskta? —sasa.
[14] Uka hebreo jaqisti Moisesar sänwa: —¿Khitirak jumarusti nanak taypiru jilïrita, taripiritsa uchtamsti? ¿Kunjämtix mayni egipcior jiwaykta ukhamti nayar jiwayañ munarakista? —sasa. Moisesasti uka arunak ist'asin axsarayasïnwa, egipcio jaqir jiwayatap yatipxatap amuyasina.
[15] Chiqpachansa, faraonax Moisesan mayni egipcior jiwayatap yatisinxa, jiwayañatakiw thaqhayäna. Ukampis Moisesax jaltxänwa, Madián chiqaruw sarxäna. Uka chiqar purisasti, mä uma phuch'u jak'aruw samart'ir qunt'asïna.
[16] Uka qhipatsti paqallqu tawaqunakaw uka chiqar purinipxarakïna, ovejanakapar umt'ayañatak uma waysuri. Jupanakasti Madián chiqankir Jetró sacerdoten phuchhanakapänwa.
[17] Ukampis yaqha awatirinakaw jutasin uka tawaqunakarux phuch'ut alisnukupxäna. Ukham uñjasin Moisesax tawaqunakat arxatasïna, ukatsti uma apsusin ovejanakar umarayarakïna.
[18] Tawaqunakax utapar purxapxän ukkhasti, awkipax jupanakar jiskt'änwa: —¿Kunatarak jichhürusti wali urut jutxapxtasti? —sasa.
[19] Jupanakasti ukxaruw sapxäna: —Mä egipcio jaqiw mayni awatirinakat arxatapxitu, ukatsti jupaw nanakatak phuch'ut uma apsusin ovejanakar umarayi —sasa.
[20] Awkisti phuchhanakapar sänwa: —Jichhasti, ¿kawkinkarak uka jaqisti? ¿Kunatsa sapak jaytjanipxta? ¡Jawsanipxam, jiwasamp chika manq'asiñapataki! —sasa.
[21] Moisesasti iyaw sasaw uka tawaqunakan awkipan utapan jakxäna. Uka qhipatsti Jetró sacerdotex Séfora sat phuchhapampiw Moisesar jaqichxäna.
[22] Séfora warmisti mä yuqall wawa wawachasïna, Moisesax uka wawapar Guersón sutimpiw uchäna, sarakïnwa: “Aka markanxa sart'ir jaqikïtwa” sasa.
[23] Jaya maranak qhipatsti Egiptonkir reyix jiwxänwa. Ukampis israelitanakax t'aqhisisipkakïnwa, t'aqhisiyat jaqinakäpxatapat jachasipkakïnwa. Ukat Diosax jachatanakap ist'äna,
[24] mayisitanakap ist'arakïna, kuna arust'äwtix Abrahamampi, Isaacampi, Jacobumpi lurkatayna ukat amtasisa.
[25] Diosasti israelitanakar t'aqhisir uñjasinxa, jan walt'añankapxatap amuyäna.