[1] Tatitux Moisesarux sänwa: —Nayan ukar makhatanim, Aarón, Nadab, Abihú, israelitanakan paqallq tunka jilïrinakapampi; ukampis janiw jak'achasinipxitätati, jaya chiqar purisin ukawjaruw killt'asipxäta.
[2] Juma sapakiw nayan ukar jak'achasinïta; mayninakax janiw jak'achasipxañapäkiti, jaqinakas janirakiw jumamp chikax makhatapxañapäkiti —sasa.
[3] Ukatsti Moisesax israelitanakar yatiyiriw saräna kunanaktix Tatitux siskatayna uka arunaka, ukatsti taqiniw mä wawaki arsupxäna: —¡Taqi kuntix Tatitux arski ukanak lurapxä! —sasa.
[4] Ukat Moisesax kunanaktix Tatitux siskatayna ukanak qillqäna, qhipärmanthisti, wali willjtat sartasin jupax qullu kayur mä altar luräna, ukatsti tunka payan qalanak uchäna; Israelan sapa ayllunakapat mä qala uchäna.
[5] Ukatsti Israelit waynanakaruw khithäna urqu vacanak kharsupxañapataki, ukatsti Tatitur jach'añchañatak nakt'ayat wilañcha, sumankañ wilañchanak luqtapxañapataki.
[6] Moisesasti chikat wila katuqasin lamananakaruw warantäna, chikat wilampisti altararuw ch'allsurakïna.
[7] Ukatsti arust'äwi qillqat aptasinxa israelitanakatakiw ullart'arapïna, jupanakasti sapxänwa: —Tatitun arsutaparjamaw phuqhapxä, jaysapxarakï —sasa.
[8] Ukatsti Moisesax wila aptasinxa, jaqinakxaruw ch'allakipäna akham sasa: —“Aka wilaw yatiyi, Tatitun mä arust'äwi jumanakamp luratapa” —sasa.
[9] Moisesasti qulluruw makhatäna Aaronampi, Nadab, Abihú, ukhamarak Israelankir paqallq tunka jilïr jaqinakampi.
[10] Ukansti Israelan Diosaparuw uñjapxäna: Sayt'atäkän uka chiqasti walipuniw qhanäna zafiro sat qaljama, pachpa alaxpach qhanjama.
[11] Ukampis Diosax janiw uka jilïr israelitanakarux kuns kamachkänti, jupanakasti Diosaruw uñjapxäna, ukatsti manq'apxänwa, umapxarakïnwa.
[12] Tatitux Moisesar sänwa: —Qullur makhatanim, nayan ukaru, ukan suyt'ita, nayasti qalat lurat tablanak churäma, ukaruw nayax kamachinakampi, kamachi arunakamp qillqta israelitanakar yatichañataki —sasa.
[13] Moisesasti sartasin Diosan qulluparuw makhatäna Josué yanapiripamp chika.
[14] Jilïr jaqinakarusti sänwa: —Nanakan kutt'aniñaxkamax akawjat suyt'apxitäta. Aaronampi, Hur chachampisti jumanakampïskaniwa, kuna jan walt'ayasiñanakas utjani ukaxa, jupanakaruw yatiyapxäta —sasa.
[15] Ukham sasinsti, Moisesax qulluruw makhatäna, uka qullurusti qinayaw wali urpxatäna.
[16] Tatitun qhapaq kankañapaw Sinaí qullunkäna, suxta uruw qinayax qullur urpxatäna. Paqallqüri urusti Tatitux Moisesaruw qinay taypit jawsäna.
[17] Tatitun qhapaq kankañapasti israelitanakatakix qullu patan mä nakhantir ninar uñtatänwa.
[18] Moisesasti qinay taypinjam qullurux makhatäna, ukatsti pusi tunka urumpi, pusi tunka arumampiw qullunkäna.