[1] Ukampis jaqinakax Moisesan qullut jan jank'as saraqanxatapatxa, Aaronaruw sapxäna: —Moisesaw Egipto markat irpsunipxitu, jichhasti janiw jupat kunas yatiskxiti, nanakar irpañapatakix diosanak lurarapipxita —sasa.
[2] Aaronasti jupanakar sänwa: —Warminakamana, wawanakaman jinchur uchasiñ quri aretenakap apthapisin akar apanipxam —sasa.
[3] Ukatsti taqpachaniw jinchur uchasiñ quri aretenak apsusisin Aaronan ukaru apapxäna.
[4] Aaronasti uka quri aretenak katuqasin ninampiw umatatayäna, ukatsti mä vaca qallur uñtat lursüna. Ukat jaqinakax sapxäna: —¡Israel, akaw Egiptot irpsunktam uka diosamaxa! —sasa.
[5] Aaronasti uk uñjasinxa, vaca qallur uñtat ídolo nayraqatarux mä altar luräna, ukatsti jach'at markar sarakïna: —¡Arumanthix Tatitur jach'añchañatakiw phunchhäwi lurañäni! —sasa.
[6] Qhipürusti, taqiniw willjtat sartasipxäna ukatsti altar patxan sumankthapiñ wilañchanaka, waxt'anaka luqtapxäna. Uka qhipatsti markax manq'añataki umañatakiw qunt'asïna; ukatsti thuqhupxarakïnwa.
[7] Ukat Tatitux Moisesar säna: —Qullut saraqxam, Egiptot irpsunkta uka markamax jan walinak lurasipki.
[8] ¡Jupanakax jank'akiw, nayax uñachaykta uka thakhit saranukupxi! Quri umatatayasaw mä vaca qallu lursusipxi, jichhasti ukaruw yupaychasipki wilañchanaksa luqtasipkaraki; ukhamarus sapxarakiwa: “¡Israel, akaw Egiptot irpsunktam uka diosamaxa!” —sasa.
[9] Tatitusti Moisesarux saskakïnwa: —Nayax aka jaqinakar uñjasax amuyxtwa, jupanakan jan suma amuyt'asirïpxatapa.
[10] ¡Jichhax janis kunsa arxaykita, sinti q'apisitapunïtwa, jupanakarux taq t'unjä! Ukampis wawanakamat mä jach'a marka sayt'ayä —sasa.
[11] Moisesasti aka arunakampiw Tatit Diosapar sumachañ munäna: —Tatay, ¡janikiy aka markatak q'apisimti! Juma pachpaxay Egipto markat jupanakar jach'a ch'amamampi, jach'a kankañamamp irpsunstaxa.
[12] ¡Janiy q'apisimti! ¡Janikiy markamar t'unjamti! Janiy egipcio jaqinakan jumat phiskasipxañap munamti, ukat sasipkañapataki: “Diosax jan wali amtampiw jumanakar irpsuwayapxtam wasar qullunakan jiwarayañataki” sasa.
[13] Amtasimay Abrahamaru, Isaacaru, Israelaru juramento luratamata. Juma pachpaw juramento lurasin sistaxa: “Nayax jumanakan wawanakaman wawanakaparux alaxpach warawaranakjam walja tukuyä, ukatsti kawkïr uraqtix jumanakar churañ arsupksma ukxa wiñayatak mä tuti katuqasipxañapatakiw churä” —sasa.
[14] Tatitusti markapar t'unjañ amtkatayna ukxa armasxänwa.
[15] Ukat Moisesax Sinaí qullut saraqanxäna, amparanakapar pä qala tablanak apt'ata, uka tablanakasti purapäxar qillqatänwa.
[16] Tatit pachpaw uka tablanak luratayna, Tatit pachparakiw tablanakxar qillqatanak qillqantatayna.
[17] Josué chachax jaqinakan arnaqasitanakap ist'asax Moisesar sänwa: —Nuwasïwin arnaqasitanakjamaw campamentot ist'asi —sasa.
[18] Moisesasti sänwa: —Nayas ist'araktwa, ukampis janiw atipjirinakan kusisiñ arnaqasitapjamäkiti, janirakiw atipjatanakan llakit arnaqasitapjamäkisa, jan ukasti, nayax q'uchunak ist'ta —sasa.
[19] Campamentor jak'achasasti, Moisesax qurit lurat vaca qallu uñjäna, thuqhurinakaruw uñjarakïna, ukat walpun q'apisïna, amparapankkän uka tablanaksa uraqir jaqt'asin qullu kayun jisk'a jisk'a t'unjäna;
[20] ukatsti uka quri vaca qallu katusin ninampiw phichkatäna, ukatxa laq'ar tukuyañkam k'iyjasin umaruw willintäna; ukatsti israelitanakarux uka uma umantayarakïna.
[21] Ukatsti Aaronaruw sarakïna: —¿Kunarak aka markasti lurtam, akham jach'a jucha jupanakar lurayañamatakisti? —sasa.
[22] Aaronasti ukxaruw säna: —Tatay, janiy nayatak q'apisimti. Jumax sum yattaxa aka jaqinakan kunatix jan walïki ukak lurañ munirïtapxa.
[23] Jupanakax sapxituwa: “Mä dios lurarapipxita nanakar irpañapataki, Egipto markat irpsunipkitu uka Moisesarux kunapunix kamachxchi, janiw kunas yatiskxiti” sasa.
[24] Nayasti ukxaruw jupanakar sarakta: “Khititix qurinïki ukax apanpan” sasa. Ukat jupanakax quri churapxitu, nayasti uka quri ninaruw jaquntta, ¡ukat aka vaca qallux mistu! —sasa.
[25] Moisesasti markar jan jark'añjamätap amuyäna, uñisirinakapatakis laruskayätap uñjarakïna, Aaronax janiw jark'irjamäkataynati.
[26] Ukat Moisesax campamento mantañäki ukkhan sayt'asis säna: —Khitinakatix Tatitumpïpkta ukanakax nayamp chikachasipxam —sasa. Ukatsti Leví ayllunkirinakaw Moisesamp chikachasipxäna.
[27] Moisesasti jupanakar sänwa: —Israelan Tatit Diosapax akham siwa: “Jumanakat sapa mayni espada ayxarusin campamentor kuttapxpan, ukatsti utat uta sarasin jilaparusa, masiparusa, uta jak'apankirirus jiwaypan” —sasa.
[28] Levitanakasti Moisesan arunakaparjamaw phuqhapxäna, uka urusti niya kimsa waranqa chachanakaw jiwaräna.
[29] Ukat Moisesax sarakïna: —Jichhüruw jumanakax Tatit nayraqatan jilïrïñ katuqapxtaxa; mayninakax wawanakamaru, yaqhipanakax jilanakamar jan jaysapxatam layku. Ukat Tatitux jichhürun jumanakar aski waxt'äwinakamp phuqt'apxtam —sasa.
[30] Qhipürusti, Moisesax jaqinakaruw säna: —Jumanakax wali jach'a jucha lurapxtaxa. Jichhasti nayax Tatitun ukaruw qullur makhatä, inach jupax uka juchat pampachapxiristam —sasa.
[31] Ukhamaw Moisesax Tatit thiyar kutt'äna, juparusti akham sarakïna: —Chiqpachapuniw jaqinakax qurit mä dios lursusisax wali jach'a jucha luri.
[32] Jupanakar juchanakap pampachakimaya; jan pampachkäta ukasti, ¡juman qillqatamat nayan sutix apsxita! —sasa.
[33] Ukampis Diosax Moisesar sänwa: —Nayatak jucha lurkani juparukiw qillqataxat sutip apsü.
[34] Jichhasti saramaya, kawkharutix sisksma uka chiqar marka irpam. Angelaxaw irpätam. Mutuyañ uru purinkani uka urusti, nayaw juchanakapat mutuyaskä —sasa.
[35] Ukatsti Tatitux mä usumpiw markar t'aqhisiyäna, Aaronan lurat vaca qallur yupaychapxatapata.