[1] Tatitusti Moisesar sarakïnwa: “Aka kamachinak jumax israelitanakar yatiyäta:
[2] “Jumatix hebreo uywat jaqi alasïtaxa, suxta maraw irnaqañapa, ukampis paqallqüri maranxa antutatäxañapawa, janiw jupax kunsa antutatäxatapat churañapäkiti.
[3] Uka uywat jaqitix sapak purinchixa, sapakirakiw sarxañapa; ukampis warmin purinchixa, warmipampiw sarxañaparaki.
[4] Uka uywat jaqin uywiripatix mä warmi jupar churchisti, uka warmitix jupatak wawanakanïchi ukaxa, warmimpi wawanakampix uywirinkaniwa, uywat jaqisti sapakiw sarxani.
[5] Ukampis uywat jaqitix sani: ‘Nayax uywirixar munastwa, warmixarusa, wawanakaxarus munasiraktwa, janiw antutatäñ munkti’ sasaxa;
[6] uywiripax Diosan nayraqataparuw irpani, ukatsti uta punkur irpkatasin mä p'iyañampiw uywat jaqin jinchup p'iysuni. Ukhamat uka uywat jaqix wiñayatak jupankxani.
[7] “Maynitix phuchhapar uywatäñatak aljani ukaxa, jupax janiw chacha uywatanakjam antutatäkaniti.
[8] Uywiripatix uka uywat tawaqur warmipäñatak jan katuqañ munkani, jan munatap laykuxa, uywirix iyawsañapawa, khitiy uka tawaqu alasiñ munchispa ukaru, jan munkchi ukasa, janiw jaya markankir jaqirux aljañapäkiti.
[9] Ukampis yuqapampitix uka tawaqur jaqichayani ukaxa, phuchhaparjam uñjañapawa.
[10] Alasiritix uka tawaqumpi jaqichasini, ukatsti yaqha warmimpirak jaqichasin ukaxa, janiw uywatapäkän uka warmipat apaqañapäkiti manq'añsa, isinaksa, warmi kankañapsa.
[11] Ukampis aka kimsa lurañanaktix alasirix jan phuqkani ukaxa, tawaqux antutatäxañapawa, jupasti janiw kunsa antutatäxatapat churañapäkiti.
[12] “Khititix masipar chhuxriñchjas jiwaykani ukax, jiwayatäniwa.
[13] Ukampis khititix jan amtañampi maynir jiwaykani, jan ukasti, Diosat jiwañapax wakischi ukaxa, nayaw yatiyäma kawkha chiqarutix jiwayir jaqix jaltxañapäki ukxa.
[14] Ukampis khititix masipamp jachjayasisin jan wali amtañamp jiwayani ukarux jiwayatäñapatak juchañchatäniwa, altaraxarus imantasiskpan ukasa.
[15] “Khititix awkiparu, taykapar chhuxriñchjkani ukaxa, jiwayatäñapatak juchañchatäniwa.
[16] “Khititix mä jaqi lunthatasin yaqhar aljkani, jan ukax utapansa jikxatatäkani ukaxa, jiwayatäñapatak juchañchatäniwa.
[17] “Khititix awkiparu, taykapar jan wali arunakamp tuqkani ukaxa, jiwayatäñapatak juchañchatäniwa.
[18] “Pä chachatix nuwasipxaspa, ukat maynix masipar ch'akumpi, jan ukax qalamp chhuxriñchjasin ikiñar jaquntaspa ukaxa;
[19] chhuxriñchjirix janiw juchañchatäkaniti, chhuxriñchjat jaqitix ikiñat sartxas thujrut yanapan sarnaqxani ukkhaxa, ukampis chhuxriñchjirix usutäki ukarux qullayañapawa, usutäki uka urunakatsa qullqi churañapa.
[20] “Khititix uywat jaqipar chachäpasa, warmïpasa lawampi jawq'jas jiwaykani ukaxa, ukham luratapat juchañchatäniwa.
[21] Ukampis uywat jaqitix mä urusa, jan ukax pä urusa jakaskanixa, jawq'jir jaqix janiw juchañchatäkxaniti, uywatapätap layku.
[22] “Pä jaqitix nuwasisin usur warmir nuwatatas sullsuyani; ukampis uka warmitix jan jiwkani ukaxa, juchan jaqix qullqi churañapawa, qawqtix warmin chachapax maykani ukkha, taripirinakaw ukxat uñjapxarakini.
[23] Ukampis uka usuchjat warmitix jiwanixa, juchanirux pachparak phuqhayatäni, jakañatxa jakañaraki,
[24] nayratxa nayraraki, laka ch'akhatxa laka ch'akharaki, amparatxa ampararaki, kayutxa kayuraki,
[25] nakhantayatax nakhantayataraki, chhuxritxa chhuxriraki, ch'akutxa ch'akuraki.
[26] “Khititix uywataru chachäpasa, warmïpasa nayrat ch'akutatas ch'ulla nayrap juykhuptayaspaxa, uka uywataparux antutxañapawa, nayra juykhuptayatap layku.
[27] Khititix uywataparu, chachäpasa, warmïpasa nuwjasin laka ch'akha apsuspaxa, laka ch'akha apsutapat antutxañaparakiwa.
[28] “Mä urqu vacatix waxrjasa chacharusa, jan ukax warmirusa jiwayani ukaxa, urqu vacax qalampi k'upjat jiwañapawa, aychapasti janiw manq'añatakïkaniti, vacanisti janiw juchañchatäkaniti.
[29] Urqu vacatix waxrasiripunïchi, ukat maynir waxrantasin jiwaychi ukaxa, qalamp k'upjat jiwañapawa, vacanix yatkasin jan ist'asis uywatapatsti jiwayatäñaparakiwa.
[30] Ukampisa, vacanix qullqimpi phuqhasaw jakañap qhispiyasispa.
[31] Pachpa kamachirakiw phuqhasini, vacatix maynin yuqall wawaparusa, imill wawaparusa waxrjani ukkhaxa.
[32] Uka urqu vacatix mä uywat jaqiru, chacharusa warmirus waxrantchi ukaxa, urqu vacarux qalamp k'upjasaw jiwayatäñapa, vacanisti uywat jaqin uywiriparux kimsa tunka qullqi churañapa.
[33] “Maynitix mä phuch'u jan atxatkaspa, jan ukax phuch'u p'iysusin jan atxatkaspa, ukat ukar mä urqu vacasa, jan ukax mä asnos jalantasin jiwaspa ukaxa,
[34] phuch'unix uka uywanir qullqi churañapawa, ukampis jiwat uywax jupatakïxaniwa.
[35] “Maynin urqu vacapatix masipan urqu vacapar waxrantas jiwayaspa ukax, jakaski uka urqu vaca aljapxani, ukatsti paniniw chikatkam qullqi jaljasipxani, uka kipkarak jiwat vacan aychapsa jaljasipxani.
[36] Ukampis urqu vacatix waxrasiripunïchi, ukat vacanix yatkasin jan ist'asis uywaskakchi janirak chinxäskchi ukaxa, wakisiw jiwat vacat jakkir vaca maynir churxañapa, jiwat vacasti jupatakïxaniwa.